2022 წლის იანვარში რუსეთიდან საქართველოში 22,382 მლნ აშშ დოლარი გადმოირიცხა, რაც წინა თვესთან შედარებით 17,3 მლნ აშშ დოლარით ნაკლებია. 2021 წლის დეკემბერში აღნიშნული ქვეყნიდან საქართველოში 39,701 მლნ აშშ დოლარი ჩაირიცხა.

6 მარტს, რუსეთის ცენტრალურმა ბანკმა ოფიციალურად განაცხადა, რომ ზღუდავს უცხოეთში მყოფი ფიზიკური პირებისთვის, მათ შორის მეუღლის, ახლო ნათესავებისთვის ფულის გადარიცხვას თვეში $5 000-მდე. ბანკის განცხადების თანახმად, ახლო ნათესავებში მოიაზრებიან შვილები, შვილიშვილები, მშობლები, ბებიები და ბაბუები, დები, ძმები, მშვილებლები და ნაშვილებები.

ფულადი გზავნილების ქართული კომპანია „ინტელიექსპრესის” ბიზნესის განვითარების დეპარტამენტის ხელმძღვანელი ლევან თავართქილაძე “კომერსანტთან” ამბობს, რომ რუსეთიდან საქართველოში ჯამში თვის განმავლობაში 5000$-ზე მეტს მხოლოდ მომხმარებლების 1% რიცხავს.

“რუსეთის ცენტრალური ბანკის მიერ დაწესებული უშუალოდ ეს შეზღუდვა ფულადგზავნილების დინამიკასა და სტატისტიკაზე პირდაპირ მყისიერ გავლენას ვერ მოახდენს. რუსეთიდან საშუალოდ ერთი გზავნილის მოცულობა შეადგენს 300$-დან 350$-მდე. ჯამში თვის განმავლობაში 5000$-ზე მეტს მხოლოდ მომხმარებლების 1% რიცხავს. ამიტომ დინამიკა არ შეიცვლება. თუმცა მომავალში ეკონომიკური სიტუაციიდან გამომდინარე ცვლილებები აუცილებლად იქნება. თუ ანგარიშსწორების პრობლემაც მსგავსად შენარჩუნდება გზავნილები კიდევ უფრო დაიკლებს”, - ამბობს თავართქილაძე.

ნინო თამაზაშვილი