„რუსეთის სოფლის მეურნეობის სამინისტრომ უკვე დაადასტურა, რომ იანვრის ბოლოდან მარცვლეულზე არასატარიფო კვოტის მექანიზმი ამუშავდება. კვოტირების სისტემა 20 მლნ ტონაზე მეტი მარცვლეულის გატანის შემთხვევაში წესდება,“ - ამის შესახებ „საქართველოს ხორბლისა და ფქვილის მწარმოებელთა ასოციაციის“ ხელმძღვანელმა ლევან სილაგავამ „კომერსანტთან“ საუბრისას განაცხადა.
ლევან სილაგავა ამბობს, რომ კვოტირების სისტემის დაწესებამ რუსეთშიც უარყოფითი გამოხმაურება ჰპოვა, რადგან ეს ფაქტობრივად, ხელოვნური ბარიერების შექმნას გულისხმობს.
„ახალი მექანიზმის ამოქმედებას რუსეთშიც უარყოფითი გამოხმაურება მოჰყვა, რადგან ეს ფაქტობრივად, ხელოვნური ბარიერების შექმნაა. აქვე ავღნიშნავ, რომ ეს არასატარიფო კვოტა არ ეხება მხოლოდ საბაჟო კავშირის წევრ ქვეყნებს, როგორიცაა სომხეთი, ყაზახეთი და ბელორუსი. აქამდე რუსეთიდან შემოსული ხორბლის ფასი დაახლოებით 220 დოლარს შეადგენდა, რას გამოიწვევს კვოტირების სისტემა ჯერ რთულია ამაზე საუბარი, თუმცა დიდ რყევას არ ველოდებით“, - განმარტავს „საქართველოს ხორბლისა და ფქვილის მწარმოებელთა ასოციაციის“ ხელმძღვანელი.
ლევან სილაგავა ამბობს, რომ „სოფლის მეურნეობის წელი“ რუსეთში 1 ივლისიდან იწყება, შესაბამისად, ნახევარი წელი გასულია და საეჭვოა დარჩენილ 6 თვეში 20 მლნ ტონაზე მეტი მარცვლეული გავიდეს. თუმცა, ის ასევე საუბრობს ბაზრების დივერსიფიცირებაზე, რომელიც აშშ-დან და ყაზახეთიდან საქართველოში ხორბლის შემოტანას გულისხმობს.
„ექსპერტების ნაწილი ვარაუდობს, რომ ეს არ იმოქმედებს ბაზარზე, რადგან დარჩენილი 6 თვის განმავლობაში 20 მლნ ტონაზე მეტი რუსეთიდან ისედაც ვერ გავა, თუმცა, მეორე ნაწილი ფიქრობს, რომ ამან შეიძლება რუსეთში მარცვლეულის ფასებზე იმოქმედოს, მაგრამ მსოფლიოში სხვა ქვეყნებიდანაც არის შესაძლებელი ხორბლის შემოტანა. მაგალითად, ჩვენი ასოციაციის წევრმა „ფოთის მარცვლეულის ტერმინალმა“ დეკემბერში 30 000 ტონამდე ამერიკული ხორბალი შემოიტანა, რომელიც დაბინავებულია. გარდა ამისა, 60 000 ტონა ყაზახეთიდან გვაქვს შემოტანილი. შეიძლება ითქვას, რომ ბაზარი დივერსიფიცირებული გვაქვს და დიდ რყევებს არ ველოდებით. თავდაპირველად რაღაც ეტაპზე შესაძლოა ხორბალზე ფასის ზრდა მოხდეს, მაგრამ იქედან გამომდინარე რომ რუსეთის თემა უფრო გადაზღვევას ჰგავს, იმედი გვაქვს რომ ფასზე მკვეთრად არ აისახება. გარდა ამისა, ჩვენ ორი გამოწვევა გვაქვს მუდმივად, ეს არის ხორბლის ფასი მსოფლიო ბაზარზე და ლარის კურსი დოლართან მიმართებით, რას ასევე მოქმედებს ხორბლის ფასზე“, - აცხადებს ლევან სილაგავა.
ნინო თამაზაშვილი