2022 წლის პირველ ნახევარში საქართველოში ფულადი გზავნილების სახით 1.78 მილიარდი გადმოირიცხა, რაც წინა წელთან შედარებით 65%-ით მეტია. ქვეყნებს შორის გზავნილებით პირველ ადგილზე რუსეთია, საიდანაც 750 მილიონი დოლარი შემოვიდა.
ფულადი გზავნილების არსებულ მაჩვენებლებს პოზიტიურ ეკონომიკურ ფაქტორად მიიჩნევს პარლამენტის საფინანსო-საბიუჯეტო კომიტეტის თავმჯდომარე ირაკლი კოვზანაძე და აღნიშნავს, რომ რუსი მიგრანტების გზავნილებს დღეს არამარტო სახარჯო, არამედ საინვესტიციო შეფერილობაც აქვს ანუ მათი მხრიდან ქართულ აქტივებზე გაზრდილია მოთხოვნა.
საქართველოს ეროვნული ბანკის პრეზიდენტის კობა გვენეტაძის განცხადებითაც გაზრდილი ფულადი გზავნილები რუსეთიდან ქართველების კაპიტალის მიგრაციით აიხსნება და ეს ეფექტი მალე ამოიწურება.
რამდენად ხშირია დიდი რაოდენობით თანხების გადმორიცხვის პრაქტიკა რუსეთიდან საქართველოში ბოლო თვეებში და საშუალოდ რა რაოდენობით თანხას რიცხავენ ისინი, ამ თემაზე „კომერსანტი“ ფულადი გზავნილების ქართულ კომპანია ინტელიექსპრესის ბიზნესის განვითარების დეპარტამენტის ხელმძღვანელს ლევან თავართქილაძეს ესაუბრა.
„ამ წლის პირველ 6 თვეში 1 786 მილიონი დოლარია უკვე ჩარიცხული, რაც წინა წელთან შედარებით 65%-იანი ზრდაა. ცხადია ამის გამომწვევი მთავარი მიზეზი რუსეთ-უკრაინის ომის შედეგად წარმოშობილი მიგრაციაა, და კოლოსალური ზრდა რუსეთიდან გზავნილების ზრდაზე მოდის. სტანდარტული ერთი ფულადი გზავნილის საშუალო მოცულობა რუსეთიდან ბოლო 8 წლის განმავლობაში 400 დოლარის გარშემო მერყეობდა +/- 100$. ხოლო ამ წლის მეორე კვარტალში 3.5-ჯერ გაიზარდა და 1300$ შეადგინა, მათ შორის პიკი იყო მაისის თვე, ერთი ტრანზაქციის საშუალო მოცულობით 1500$ გადააჭარბა. რაც ცხადია არ არის, შრომითი მიგრანტების მიერ ოჯახის დასახმარებლად გადმორიცხული თანხები. რამდენად გრძელვადიანი იქნება ეს „ინვესტიციები” ამას მომავალში ვნახავთ“, — ამბობს ლევან თავართქილაძე.
მისი თქმით, რუსეთიდან გზავნილები მეორე კვარტალში წინა კვარტალთან შედარებით 6-ჯერ არის გაზრდილი, თუმცა ეს ერთჯერადი ეფექტია.
„ივნისი და ფაქტობრივად მთლიანად მეორე კვარტალი, 2021 წლის მეორე კვარტალთან შედარებით, ფულადი გზავნილების ჭრილში გაორმაგებულია. ამის მიზეზი რუსეთიდან გზავნილების მნიშვნელოვანი ზრდაა, წინა კვარტალთან შედარებით გზავნილები 6-ჯერაა გაზრდილი. თუმცა ვფიქრობთ, რომ ეს უფრო ერთჯერადი ეფექტია და უკვე შეინიშნება დასტაბილურების ტენდენცია“, — აღნიშნავს თავართქილაძე.
ივნისის მდგომარეობით გზავნილებში, პირველ ადგილზეა რუსეთის ფედერაცია, საიდანაც ივნისში 231.4 მილიონი გადმოირიცხა. ეს წინა წელთან შედარებით 492%-ით მეტია.