სტატია მომზადებულია ekhokavkaza.com-ზე დაყრდნობით. მასში გამოთქმული მოსაზრებები და ტერმინები ეკუთვნის მასალის ავტორს და შესაძლოა არ გამოხატავდეს „კომერსანტის“ შეხედულებებს.
რუსეთის სამომხმარებლო ზედამხედველობის უწყებამ როსპოტრებნადზორმა გადაწყვეტილება მიიღო, რომლის თანახმადაც, უცხოეთიდან ჩამოსული ქვეყნის მოქალაქეები ვალდებულები არიან პსრ-ტესტი გაიარონ.
ეს ნორმა ასევე აფხაზეთსაც შეეხო, რაც არაღიარებული რესპუბლიკის ტურისტულ სეზონზე უარყოფითად აისახება.
აფხაზეთის ტურისტული კავშირის თავჯდომარის ანა კალიაგინას თქმით, ეს გადაწყეტილება რესპუბლიკისთვის უსიამოვნო მოულოდნელობა აღმოჩნდა.
„ყველა დაძაბულ მოლოდინში ვართ და გარკვეულ შეღავათებს ველით. სავარაუდოდ ყველაფერი მაისის არდადაგებზე გაირკვევა. სადღეისოდ შეგვიძლია ვთქვათ, რომ როსპოტრებნადზორის ახალმა გადაწყვეტილებამ არ იმოქმედა ტურისტებზე, რომლებიც ჩამოსვლას მაღალი და საშუალო სეგმენტის სასტუმროებში გეგმავენ. თუმცა, ყველაზე მეტად ზარალდებიან მცირე და საშუალო სასტუმროები, რომლებიც ერთდღიან ტურებზე მუშაობენ“ - ამბობს კალიაგინა.
მისი თქმით, ეს ბუნებრივიც არის რადგანაც იმისთვის, ვინც 100-150 ათას რუბლს სასტუმროში იხდის, არც ტესტის ჩატარებაა პრობლემა, თუმცა, ეს დამატებითი სირთულეა იმათთვის, ვინც 1-2 დღით ჩამოსვლას გეგმავდა.
„დღეს ეს უკვე ნათლად ჩანს - 10 ავტობუსის ნაცვლად მხოლოდ 2 ჩამოდის. ჩვენ ვიმედოვნებთ, რომ აფხაზეთისთვის გარკვეული შეღავათები დაწესდება და საბოლოო ჯამში ტურისტული სეზონი ნორმალურად ჩაივლის“, - იმედოვნებს კალიაგინა.
აფხაზეთის სასტუმროთა კავშირის პრეზიდენტის ასტამურ ახბას თქმით, როსპორტებნადზორის გადაწყვეტილების მიღების შემდეგ ჯავშნების მასობრივი გაუქმება არ დაწყებულა, თუმცა, ტურისტული ნაკადის სავარაუდო დანაკარგი 30%-ს მიაღწევს.
„ჩვენს სასარგებლოდ ის ფაქტორიც მუშაობს, რომ რუსეთმა საზღვრები რამდენიმე ტურისტულ ქვეყანასთან დაკეტა, მათ შორის თურქეთთან და ამან შესაძლოა აფხაზეთისადმი ინტერესი გაზარდოს. მაგრამ რა თქმა უნდა, მოკლევადიან ტურიზმზე ეს შეზღუდვები უარყოფითად აისახება. იმას, ვინც 2 კვირით ჩამოდის ტესტიც გაკეთება უღირს, თუმცა 1-2 დღიან ტურისტს - არა“, - მიიჩნევს ასტამურ ახბა.
მაგრამ ზომების შერბილების იმედი ჯერ არ გამართლდა. მეტიც, 1 მაისიდან უცხოეთიდან ჩამოსულ რუსეთის მოქალაქეებს პსრ-ტესტის ჩაბარება 2-ჯერ მოუწვეთ.
„ეს ყველაფერი ფული ღირს. წარმოიდგინეთ რამხელა ხარჯებია ეს 4-წევრიანი ოჯახისთვის? ეს მაშინ, როდესაც ჩვენთან მდიდრები არ ჩამოდიან. შესაბამისად, მოთხოვნა აუცილებლად შემცირდება“ - განაცხადა სასტუმრო „გაგრა“-ს დირექტორმა ლუდმილა ლოლუამ.
მისი თქმით, სასტუმრო ყველანაირი რეგულაციების დაცვით კლიენტების მისაღებად მზადაა, ამიტომაც აფხაზეთის ტურისტული სექტორი ისევ რუსეთის მხრიდან გამონაკლისის დაშვების იმედზეა.
ekhokavkaza.com
მოამზადა თენგიზ აბლოთიამ
ოკუპირებული აფხაზეთი
