რუსეთის პრეზიდენტმა ვლადიმერ პუტინმა ქვეყნის მთავრობას სამშენებლო პროექტებში უცხოელების დასაქმების წესების გამარტივება დაავალა.
მანამდე ვიცე-პრემიერმა მარატ ხუსნულინმა განაცხადა, რომ რუსეთში მშენებლობებზე მუშახელი არ ჰყოფნით, ხოლო თათარისტანის პრეზიდენტმა რუსტამ მინიხანოვმა მთავრობას მიგრანტების თუნდაც შეზღუდული რაოდენობის შემოყვანა სთხოვა.
იაფი სამუშაო ძალის, ძირითადად შუა აზიის ყოფილი საბჭოთა რესპუბლიკებიდან, მკვეთრი გადინება თვითიზოლაციასთან და კარანტინთანაა დაკავშირებული. ბევრმა მიგრანტმა სამუშაო დაკარგა და სამშობლოში იძულებით დაბრუნდა. ყველაზე მეტად ეს მოსკოვს შეეხო.
„არის პრობლემა იმასთან დაკავშირებით, რომ მოსკოვში მიგრანტების რაოდენობა 40%-ით შემცირდა“ - განაცხადა დედაქალაქის მერმა სერგეი სობიანინმა.
რუსეთის მშენებლობის სამინისტროს ინფორმაციით მუშახელის დეფიციტის მშენებლობებზე 100 000-ზე მეტია. მოსკოვში კი სამშენებლო პროექტებში დაკავებულთა 40%-დან 70% -მდე - უცხოელია.
ეკონომიკის უმაღლესი სკოლის კვლევის თანახმად, ყველაზე დიდია მოთხოვნა არაკვალიფიცირებულ სამუშაო ძალაზე - სასურველია განათლების გარეშე.
დეფიციტი სხვა დარგებსაც ეხება, თუმცა, ყველაზე მეტად - მშენებლობას და პუტინის ხსენებული გადაწყვეტილება სწორედ ამით იყო გამოწვეული. ბიზნესი ყველანაირი მუშახელის დეფიციტზე ლაპარაკობს, როგორც არაკვალიფიცირებულზე, ასევე კვალიფიცირებულზეც.
„პანდემიის გამო ქვეყნის შიდა მიგრაციაც 20%-ით შემცირდა. რუსები სხვადასხვა რეგიონებში გადასვლაზე და სახლისგან შორს მუშაობაზე უარს ამბობენ“ - ამბობს ეკონომიკის უმაღლესი სკოლის პროფესორი ელენა ვაკულენკო.
მისი აზრით, სამშენებლო კომპანიების მხრიდან მუშახელის შემოყვანის პროცედურების გამარტივების მოთხოვნა იმაზე მეტყველებს, რომ ისინი საკადრო პოლიტიკის გადახედვას არ გეგმავენ. ისევე როგორც პანდემიამდე მათთვის პრიორიტეტია სამსახურში მიგრანტების დაქირავება.
„რუსებისგან განსხვავებით შუა აზიელი მიგრანტებინებისმიერ, ყველაზე ცუდ პირობებზე და დაბალ ხელფასებზე თანხმდებიან. ისინი დღეში 10 საათი მუშაობენ, სარდაფებში ცხოვრობენ. დეველოპერების მთავარი არგუმენტია ასეთი სამუშაო ძალის დაბალი ღირებულება. რუსეთის მოქალაქეების სამსახურში აყვანა ბევრ სირთულეებთანაა დაკავშირებული. მაგალითად, დამსაქმებლებს სხვადასხვა გადასახადების გადახდა უწევთ, რაც ზოგჯერ დასაქმებულის ხელფასის 45%-ს აღწევს“ - ამბობს ექსპერტი.
თანაც რუსები პერიოდულად ხელფასების მკვეთრ ზრდას ითხოვენ, მაშინ როდესაც აზიელები თითქმის ხურდა ფულზე მუშაობენ.
ასე რომ დეველოპერული კომპანიების ეს მიდგომა არ შეიცვლება, მიგრანტების გამარტივებული წესებით დაქირავება და ექსპლუატაცია არა მხოლოდ ბიზნესისთვის, არამდე სახელმწიფოსთვისაც მომგებიანია, სხვადასხვა სატენდერო შეკვეთების შესრულებისას.
ვაკულენკოს აზრით, წარმოდგენა, თითქოს მიგრანტების რუსეთის მოქალაქეებს სამუშაოს ართმევენ - გადაჭარბებულია, რადგანაც მათ შორის კვეთა თითქმის არაა, ისინი სხვადასხვა პოზიციებზე მუშაობენ.
„მიგრანტები ყველაზე მძიმე და არაკვალიფიციურ სამუშაოს ასრულებენ. რუსეთის მოქალაქეებს ამ პოზიციებზე თითქმის ვერ ნახავთ“ - ამბობს ვაკულენკო.
თენგიზ აბლოთია
წყარო: gazeta.ru