დასავლეთის ქვეყნებზე განხორციელებული კიბერშეტევების დიდი ნაწილის უკან რუსეთი და მისი მეზობელი ქვეყნები დგანან - განაცხადა ბრიტანეთის კიბერუსაფრთხოების სააგენტოს დირექტორმა ლინდსი კემერონმა. მისი თქმით, სწორედ ონლაინგამოძალვა წარმოადგენს ყველაზე სერიოზულ საფრთხეს კიბერშეტევების ყველა სახეობას შორის.

„ეროვნული უსაფრთხოების სამსახურთან ერთად, ჩვენ ჩავატარეთ გარკვეული სამუშაო და მივედით დასკვნამდე, რომ რუსეთში და მის მეზობელ ქვეყნებში ბაზირებული კიბერდამნაშავეები არიან უშუალოდ პასუხისმგებლები ბრიტანეთზე და დასავლეთის სხვა ქვეყნებზე გახორციელებულ კიბერთავდასხმებზე,“ - განაცხადა მან.

რუსეთს უკვე დიდი ხანია ადანაშაულებენ ჰაკერების მფარველობაში. მოსკოვი დიდი ხანია ეჭვმიტანილია  დასავლურ ბიზნესზე კიბერშეტევებში, რომელმაც ეპიდემიის სახეც კი მიიღო ბოლო პერიოდში მისი სიხშირის გამო.

ამა წლის მაისში ბრიტანეთის საგარეო საქმეთა მინისტრმა დომინიკ რააბმა უფრო დიპლომატიური ფორმულირებები გამოიყენა და განაცხადა, რომ „რუსეთს არ შეუძლია უბრალოდ გაიმართლოს თავი იმით, რომ მის ტერიტორიაზე მოქმედ კიბერ-დანაშაულთან არავითარი კავშირი არა აქვს“.

ჯო ბაიდენმა ეს საკითხი ვლადიმერ პუტინის წინაშე 2-ჯერ დააყენა და მიანიშნა, რომ რუსეთის ხელისუფლების უმოქმედობის შემთხვევაში, აშშ მზადაა შეუტიოს სერვერებს, საინადაც თავდასხმები ხორციელდება.

2020 წლის ოქტომბერში ლონდონის ჰაქნის რაიონის ადგილობრივი საბჭო გამომძალველ პროგრამების გამოყენებით სერიოზული ჰაკერული შეტევის მსხვერპლი გახდა. კიბერთავდასხმამ რამდენიმე თვით შეარყია რაიონის საპენსიო სისტემა, რადგანაც საბჭომ ჰაკერებს გამოსასყიდი არ გადაუხადა. თუმცა, ფინანსური დანაკარგის თავიდან არიდება მაინც ვერ მოხერხდა, რადგან სისტემის აღდგენას 10 მლნ. ფუნტზე მეტი დასჭირდა.

ლინდსი კემერონის თქმით, დანაშაულებრივ ჯგუფებს სწორედ გამოსასყიდის გადახდა ახალისებს, მით უმეტეს, რომ ჰაკერულ ჯგუფთა დიდი ნაწილი ჯერ ტერორისტებად გამოცხადებული არაა.

ექსპერტების თქმით, რუსეთი თვალს ხუჭავს მის ტერიტორიაზე მოქმედი კიბერგამომძალველების ჯგუფებზე, სანამ მათი საქმიანობა უცხოეთზეა კონცენტრირებული. თუმცა, ერთი ცნობილი ჯგუფი - REvil – ივლისში, ბაიდენის და პუტინის შეხვედრის შემდეგ, ინტერნეტსივრციდან გაქრა. სხვა ჯგუფებმა კი უზარმაზარი თანხები იშოვეს. მაგალითად, ისეთმა კიბერბანდებმა, როგორც WizardSpider-ი და RYUK-ია   ბერშეტევებით დაახლოებით 150-150 მლნ. დოლარი მიიღეს.

კემერონის თქმით, კიბერუსაფრთხოების სფეროში რუსეთი ყველაზე სერიოზულ გამოწვევად რჩება, თუმცა, გარკვეულ პრობლემებს ჩინეთიც ქმნის.

ავტორი: თენგიზ აბლოთია

წყარო: The Guardian