ბოლო პერიოდში რუსეთის ხელისუფლებამ, კერძოდ კი სოფლის მეურნეობის ზედამხედველობის სამსახურმა (როსსელხოზნადზორმა) რამდენიმე ქვეყნიდან სხვადასხვა პროდუქტების იმპორტი აკრძალა.
აი რა მოხდა ამ კუთხით ბოლო რამდენიმე დღის მანძილზე:
-სასათბურე პომიდორების და წიწაკის იმპორტის აკრძალვა უზბეკეთის ფერგანის რეგიონიდან. მიზეზი - მავნებლების აღმოჩენა.
- ჩირის იმპორტის აკრძალვა უზბეკეთის ფერგანის რეგიონიდან. მიზეზი - მავნებლების აღმოჩენა.
- სასათბურე პომიდორების და წიწაკის იმპორტის აკრძალვა უზბეკეთის კაშკადარის რეგიონიდან. მიზეზი ისევ მავნებლების აღმოჩენა.
- სასათბურე პომიდორების იმპორტის აკრძალვა სომხეთის არმავირის ოლქიდან - მავნებლების აღმოჩენის გამო.
-პომიდორების და ვაშლის იმპორტის აკრძალვა აზერბაიჯანიდან, რაც ასევე დააზარალებს ირანელ მწარმოებლებს, რადგანაც ირანიდან რუსეთში პომიდორების ექსპორტი სწორედ აზერბაიჯანის გავლით ხორციელდებოდა.
- პომიდორების იმპორტის აკრძალვა თურქეთიდან. მიზეზი - მავნებლების აღმოჩენა.
-პომიროდების და წიწაკის იმპორტის აკრძალვა ბელორუსიის რამდენიმე ოლქიდან - იგივე მიზეზით.
ცხადია, რომ ასეთი მასობრივი აკრძალვები, თანაც თითქმის ერთდროულად და საახალწლო დღესასწაულების წინ, ხილ-ბოსტნეულის ბაზრის მონაწილეებს შორის დიდ ეჭვებს იწვევს.
ეს ეჭვები უსაფუძვლო ნამდვილად არაა - თუ გავითვალისწინებთ იმას, რომ მავნებლების აღმოჩენა სხვადასხვა პროდუქტებში ხშირად პოლიტიკური მიზეზების გამო ხდებოდა.
გადადგმული ნაბიჯების გაანალიზება ცხადყოფს, რომ 11 დეკემბრიდან რუსეთში თითქმის მთლიანად აიკრძალა პომიდორების და წიწაკის იმპორტი. ასევე დაიხურა ვაშლის იმპორტი აზერბაიჯანიდან, რომელსაც ამ ბაზარზე პირველი ადგილი ეკავა.
თუმცა, თუ ჩავღრმავდებით, დავინახავთ, რომ ეს პროცესი ჯერ კიდევ 2020 წლის დასაწყისიდან მზადდებოდა. კერძოდ, 2020 წლის აპრილში რუსეთის პომიდორების მწარმოებელთა ასოციაციამ აზერბაიჯანიდან და თურქეთიდან ამ პროდუქტის იმპორტის აკრძალვის თხოვნით მთავრობას მიმართა.
ზოგადად, ხილ-ბოსტნეულის რუსი მწარმოებლები ხშირად აცხადებდნენ, რომ ამ დარგს სახელმწიფოსგან მეტი ხელშეწყობა სჭირდება და ამისთვის აუცილებელია იმპორტის მკვეთრი შეზღუდვა. თანაც იმ პირობებში, როდესაც სახელმწიფო დოტაციები მკვეთრად შემცირდა.
შესაბამისად, ეს ზომები შესაძლებელია როსსელხოზნადზორის მხრიდან საახალწლო საჩუქრად ჩაითვალოს, თუმცა პირველ რიგში მომხმარებლების ხარჯზე, რომლებსაც მეტის გადახდა მოუწევთ.
იმპორტის შეწყვეტის შემთხვევაში ფასები რუსულ ბაზარზე რეკორდულად გაიზრდება თანაც ქვეყანაში წარმოებული ხილ-ბოსტნეულის რაოდენობა მოთხოვნას ვერ აკმაყოფილებს.
ყველა შემთხვევაში ბაზრის მონაწილეებმა შექმნილ სიტუაციაში სერიოზული დასკვნა უნდა გააკეთონ - ერთ ქვეყანაზე ორიენტაცია, განსაკუთრებით ისეთ არასანდო სავაჭრო პარტნიორზე, როგორიცაა რუსეთი, ძალიან საშიშია.
მით უმეტეს, თუ აღმოჩნდა, რომ რუსეთის გადაწყვეტილება პოლიტიკურ ხასიათს ატარებს, მოსალოდნელია რომ აკრძალვები სხვა ქვეყნებს და სხვა დარგებსაც შეეხოს. პირველ რიგში კი ეს იმ ქვეყნებს და მწარმოებლებს დააზარალებს, ვისი ექსპორტიც კრიტიკულადაა რუსეთზე დამოკიდებული.
east-fruit.com