22 ივლისს აფხაზეთში “როსპოტრებნადზორის“ დელეგაცია ჩავიდა, რომელიც ტურისტული ობიექტების შემოწმებას იწყებს.
სოხუმი აცხადებს, რომ რუსი ტურისტების მისაღებად მზადაა, ხოლო რესტორნებისა და სასტუმროებისთვის სპეციალური რეკომენდაციებია შემუშავებული. თუმცა, მოსკოვი საზღვრის გახსნას არ ჩქარობს.
აფხაზეთის ტურიზმის საბჭოს პრეზიდენტის ანა კალიაგინას თქმით, ყველაფერი დამოკიდებულია ტურისტული ობიექტების მზადყოფნაზე.
რამდენიმე დღის წინ, აფხაზეთის პრეზიდენტმა ასლან ბჟანიამ რუსეთთან საზღვრის გახსნა 28 ივლისამდე გადადო - ამის მიზეზად როსპოტრებნადზორის სპეციალისტების ჩამოსვლა დასახელდა . როგორც გაირკვა, სწორედ მათ უნდა დადონ დასკვნა - არის თუ არა აფხაზეთი უსაფრთხო ადგილი რუსი ტურისტებისთვის.
ანა კალიაგინას თქმით, რას გადაწყვეტს აფხაზური მხარე - მნიშვნელობა არა აქვს - საბოლოო ჯამში, საზღვარი მხოლოდ რუსი ექსპერტების დადებითი დასკვნის შემდეგ გაიხსნება. მისივე განმარტებით, აფხაზეთი საზღვრების გახსნას ჯერ კიდევ ივნისში გეგმავდა და ამისთვის საბუთები ჯერ კიდევ მაისში წარადგინა.
„დელეგაცია ჯერ გაგრას, შემდეგ ბიჭვინთას, გუდაუთას და ახალ ათონს შეამოწმებს. ყველაფერი ეტაპობრივად მოხდება. ჩვენ ვიცოდით, რომ გადაწყვეტილების მიღებას დრო დასჭირდებოდა - რუსეთში დიდი ბიუროკრატიაა, და პროცესები ისე სწრაფად და მარტივად როგორც აფხაზეთშია, არ მიმდინარეობს . აფხაზეთში საკმარისია ქაღალდი ერთი ოთახიდან მეორეში გადაიტანო, მოსკოვში კი ყველაფერი ბევრად უფრო რთულადაა“ - განაცხადა ტურიზმის საბჭოს პრეზიდენტმა.
კალიაგინა განმარტავს, რომ ბიუროკრატიული პროცედურების გარდა ობიექტური სირთულეებიც არსებობს - სეზონისთვის მომზადება ერთ კვირაში შეუძლებელია, ისევე როგორც რამდენიმე დღეში საზღვარი ვერ გაიხსნება.
„სავარაუდოდ, აგვისტოს პირველ რიცხვებში საზღვარი გაიხსნება. ჩვენ გარკვეული რეკომენდაციები უკვე მივიღეთ და მათი შესრულების შემთხვევაში ტურისტული სეზონის გახსნა შესაძლებელი გახდება. სასტუმროებს და რესტორნებს ამ წესების შესასრულებლად 1 კვირა მიეცათ. დღეიდან რუსი ექსპერტები შეამოწმებენ ვინ და როგორ შეასრულა დადგენილი წესები “ - განაცხადა ანა კალიაგინამ.
ჯერ კიდევ 3 ივლისს ასლან ბჟანიამ რუსეთის პრემიერ-მინისტრს მიხაილი მიშუსტინს საზღვრის გახსნის თხოვნით მიმართა, და მას ტურისტების მიღების მზადყოფნის შესახებ შეატყობინა.
თუმცა, შესაძლებელია, საქმე უფრო რთულად იყო, ვიდრე კალიაგიანას წარმოუდგენია - რუსეთი უკვე დიდი ხანია საზღვრების გახსნას თურქეთთან, ბელორუსიასთან, მოლდოვასთან, და რამდენიმე სხვა ქვეყანასთან გეგმავს, თუმცა ეს გეგმები ჯერ მხოლოდ სურვილების დონეზე რჩება.
მოამზადა თენგიზ აბლოთიამ