რუსეთი აცხადებს, რომ მზადაა ევროკავშირთან კავშირების გაწყვეტისთვის. ამის შესახებ CNBC სერგეი ლავროვის ინტერვიუს ფრაგმენტზე დაყრდნობით წერს, რომელიც რუსეთის საგარეო საქმეთა სამინისტრომ ვებგვერდზე გამოაქვეყნა.

ინტერვიუში, სერგეი ლავროვი ამბობს: „როდესაც ჩვენ ვხედავთ კვლავ სანქციებს, რომელსაც ცალკეულ სექტორეზე აწესებენ, ეს ჩვენს ეკონომიკას რისკების წინაშე აყენებს, მათ შორის ყველაზე სენსიტიურ სფეროებში“.

”ჩვენ არ გვსურს გლობალური ცხოვრებისგან იზოლირება, თუმცა, ჩვენ მზად ვართ ამისთვის. თუ გსურს მშვიდობა, მაშინ უნდა მოემზადო ომისთვის“, – განაცხადა ლავროვმა.

აღნიშნულთან დაკავშირებით CNBC-მ სცადა ევროკომისიის წარმომადგენლებსაც დაკავშირებოდა და რუსეთის საგარეო საქმეთა სამინისტროსაც, თუმცა, არცერთ უწყებაში ჯერჯერობით კომენტარი არ გააკეთეს.

ცნობისთვის, გასულ კვირას ევროკავშირის უმაღლესი წარმომადგენელი საგარეო პოლიტიკის საკითხებში, ჯოზეფ ბორელი მოსკოვში რუს კოლეგას შეხვდა. ვიზიტის პერიოდში ლავროვმა აღნიშნა: „ევროკავშირი არ არის დასაყრდენი პარტნიორი, სულ მცირე ამ ეტაპზე“. ბორელმა ამ კომენტარს იქვე ვერ უპასუხა, რამაც ევროპელ კანონმდებლებში გაღიზიანება გამოიწვია.

ამას გარდა, ბორელმა მხოლოდ „ტვიტერით“ შეიტყო ლავროვთან ვიზიტის დროს, რომ რუსეთმა სამი ევროპელი დიპლომატი ნავალნის მხარდასაჭერ დემონსტრაციაზე დასწრების გამო ქვეყნიდან გააძევა.

ვიზიტის შემდეგ რამდენიმე დღეში კი ჯოზეფ ბორელმა თავის ბლოგში აღნიშნა:

„ჩემი ვიზიტის დროს აგრესიულად დაგეგმილი პრეს-კონფერენცია და სამი ევროპელი დიპლომატის გაძევება ნიშნავს იმას, რომ რუსეთის მთავრობას არ სურს გამოიყენოს შესაძლებლობა ევროკავშირთან უფრო კონსტრუქციული დიალოგისთვის“.

მან ასევე გამოთქვა აზრი, რომ ევროკავშირმა რუსეთს სანქციები უნდა დაუწესოს. ეს არ იქნება პირველი შემთხვევა, როდესაც ევროკავშირი მოსკოვს სანქციებს დაუწესებს. ცნობისთვის, მხარეებს შორის კავშირები განსაკუთრებით 2014 წელს, ყირიმის ანექსიის შემდეგ დაიძაბა.

ანალიტიოსების თქმით, მოსკოვსა და ბრიუსელს შორის ბოლო პერიოდში განვითარებული მოვლენები ერთგვარი ზეწოლა იქნება გაზსადენ „ჩრდილოეთის ნაკადი 2“-ის პროექტის განხორციელებაზე, რომელმაც ბუნებრივი აირის ტრანსპორტირება რუსეთიდან გერმანიამდე უნდა უზრუნველყოს.

forbes.ge