„აჭარა ჯგუფი“ შავი ზღვის სანაპიროზე „ROOMS BATUMI“-ს სასტუმროს გახსნას 2020 წლის ბოლომდე გეგმავს. როგორც „კომერსანტს“ კომპანიაში განუცხადეს, სასტუმროში მინიმუმ 100 ნომერი მოეწყობა. სასტუმროს კონცეფციას ამ ეტაპზე „აჭარა ჯგუფი“ ამუშავებს.
„Rooms Hotel Batumi აჭარის დედაქალაქში, ძველი ბათუმის ტერიტორიაზე სრულიად ახალ კონცეფციას შეიტანს. „აჭარა ჯგუფისთვის“ დამახასიათებელი, დიზაინზე ორიენტირებული სასტუმრო დამსვენებელს „ფერმიდან-მაგიდამდე“ კონცეფციის რესტორანსა და მაღალი ხარისხის სერვისს შესთავაზებს“, - განმარტავენ აჭარა ჯგუფში.
„ROOMS BATUMI“-ს სასტუმროს ფასადი კომპანიამ უკვე დაასრულა 4 სართულიანი სასტუმროს გარდა „აჭარა ჯგუფი“ 2020 წელს არაერთი პროექტის განხორციელებას გეგმავს:
კომპანიამ აბასთუმნის ისტორიულ კურორტზე ახალი პროექტის განვითარების შესახებ ინფორმაცია უკვე გაავრცელა. 1924 წელს აშენებული ძველი სანატორიუმის ცნობილი შენობა მალე Rooms Hotel Abastumani გახდება. პროექტი ამ ეტაპზე დაწყებული არ არის.
“აჭარა ჯგუფის” კიდევ ერთი ინიციატივა მუხიანის დასახლებაში კრეატიული ეკონომიკის პლატფორმად ყოფილი რადიოქარხნის გარდაქმნაა. პროექტის მიზანია არტისტების, მწარმოებლების, განმანათლებლებისა და სხვადასხვა გამოცდილების მქონე პროფესიონალების საერთო ეკოსისტემაში გაერთიანება. “რადიოქალაქი” ვრცელ - 12 ჰექტარ ტერიტორიას მოიცავს, რომელსაც სხვადასხვა დანიშნულებით გამოიყენებენ, მათ შორის - საერთაშორისო ფესტივალების, გამოფენების, არტ ფესტივალების, სახელოვნებო რეზიდენციების, co-working სივრცეების, კრეატიული ატელიეებისა და სტუდიების მოსაწყობად.
“აჭარა ჯგუფის” კორპორატიული კულტურის ბირთვს განათლება და პროფესიული განვითარება წარმოადგენს. შესაბამისად, კომპანიამ გადაწყვიტა ქართველი და შესაძლოა უცხოელი მომავალი პროფესიონალებისთვისაც შეექმნა საგანმანათლებლო პლატფორმა - “აჭარა ჯგუფის აკადემია”, რომელიც მალე თავის პირველ პროფესიულ პროგრამას - “კულინარიის სკოლას” გახსნის.
„ფერმიდან მაგიდამდე“ (Farm to Table) „აჭარა ჯგუფის“ ერთ-ერთი კონცეფციაა, რომელიც პროექტ უდაბნოს ფარგლებში 2020 წლისთვის განხორციელდება. კონცეფცია გულისხმობს სასტუმროსა და რესტორნების შექმნას. 2020 წლის ბოლოს სასტუმრო უკვე კახეთში უდაბნოს ტერიტორიაზე გაიხსნება.
ბაჩო ადამია