სოციალურ ქსელში გავრცელდა ფოტოები,სადაც ჩანს, რომ იტალიაში ქართული წარმოების „ნატახტარის“ ლიმონათი რუსული ეტიკეტით იყიდება. პოსტის და ფოტოს ავტორმა გიორგი ხუხია პროდუქტი რომის სუპერ მარკეტებში აღმოაჩინა. „კომერსანტი“ დაინტერესდა როგორ მოხვდა ევროპის საცალო ქსელში ქართული ლიმონათი რუსული ეტიკეტით. ამ საკითხზე კომპანია „ნატახტარს“ (სს „ლომისი“) მივმართეთ, სადაც აღნიშნული ფაქტის შესახებ ინფორმაცია არ ჰქონდათ. კომპანიის კორპორაციულ საქმეთა დირექტორი ნიკოლოზ ხუნძაკიშვილი აცხადებს, რომ კომპანიას რუსი დილერებისთვის რუსული ეტიკეტით ლიმონათის ექსპორტის უფლება არ მიუციათ.
„ჩვენ ევროკავშირის ქვეყანაში ექსპორტს ეტიკეტირების სტანდარტების სრული დაცვით ვახდენთ და ეს არის ინგლისური ენა. წინააღმდეგ შემთხვევაში ჩვენ ექსპორტს ვერ განვახორციელებთ. არც ერთი რუსეთის დილერი არ ფარავს იტალიას, ეს არის პარალელური ექსპორტი, რადგან ჩვენ იტალიაში სხვა დილერები გვყავს. პატარა ე.წ. რუსულ მაღაზიაში მოხვდა ჩვენი პროდუქცია რუსული წარწერით, ასეთი შემთხვევა ბევრია, ეს ევროკავშირის ეტიკეტირების წესის დარღვევაა, თუმცა, ასეთ მაღაზიებს თავიანთი მომხმარებელი ჰყავთ, ყოფილი საბჭოთა რესპუბლიკიდან წასული ადგილობრივი რუსები“-აღნიშნავს ხუნძაკიშვილი.
„კომერსანტის“ კითხვაზე რა რეაგირება მოჰყვება კომპანიის მხრიდან ევროპაში რუსული ეტიკეტით ქართული ლიმონათის გაყიდვას, ნიკოლოზ ხუნძაკიშვილი გვპასუხობს:
„საფრთხის შეფასება ხდება მასშტაბის მიხედვით, თუ ეს არის ერთეული შემთხვევა რამოდენიმე ათეულ მილიონ ლიტრში ეს პრობლემას არ ქმნის. ასეთი ერთეული შემთხვევების პრევენცია როგორც წესი ძნელია“, განმარტავს ნიკოლოზ ხუნძაკიშვილი.
ბაჩო ადამია