მომხმარებელთა უფლებების შესახებ ახალი კანონი 1-ლი ნოემბრიდან ამოქმედდა. ამ ერთი თვის განმავლობაში 42 საჩივარი იქნა შეტანილი. როგორც რადიო „კომერსანტის“ დილის ეთერში „გრანთ თორნთონ საქართველოს“ უფროსმა იურისტმა ზურაბ ახალაძემ განაცხადა, ახალი კანონისთვის ეს ძალიან კარგი შედეგია და ნიშნავს, რომ კანონი დროში და სივრცეში მუშაობს.
ზურაბ ახალაძემ ისაუბრა იმის შესახებ, თუ რა შემთხვევაში არ ხდება ონლაინს პლატფორმებზე ნაყიდი ნივთის დაბრუნება
ეს შემთხვევებია : თუ ნივთი პირადი ჰიგიენის დანიშნულებისაა; თუ ინდივიდუალურად ვიღაც კონკრეტული პიროვნებისთვისაა დამზადებული და სხვა მომხმარებელი არ დაინტერესდება; თუ ნივთი ჰერმეტულად იყო დახურული და ჰერმეტიზაციაა დარღვეული; თუ ნივთი მალფუჭებადია და ვარგისიანობის ვადა იწურება.
შეგახსენებთ, რომ ახალ კანონში მნიშვნელოვანი სიახლეა ის არის, რომ ონლაინ პლატფორმებით შეძენილი ნივთების შემთხვევაში მომხმარებელს უფლება აქვს, რომ ნივთი 14 კალენდარული დღის ვადაში, ყოველგვარი მიზეზის გარეშე, დააბრუნოს.
აქ საუბარია მხოლოდ საქართველოში რეგისტრირებულ და ოპერირებად პლატფორმებზე. Ebay-ზე და amazon-ზე ნაყიდ ნივთებს 14 დღეში ვერ დავაბრუნებთ. ასევე არ ბრუნდება 30 ლარზე ნაკლები ღირებულების ნივთები.
მოამზადა მაკა ბიბილაშვილმა