საქართველოში არსებული ბიზნეს-გარემო, რომელიც ყოველთვის ერთ-ერთი გამორჩეული იყო ჩვენს რეგიონში, კვლავ შენარჩუნდა და ამისათვის ხელისუფლებამ უკანასკნელ პერიოდში ძალიან მნიშვნელოვანი ნაბიჯები გადადგა, - განაცხადა საპარლამენტო უმრავლესობის წევრმა, დარგობრივი ეკონომიკისა და ეკონომიკური პოლიტიკის კომიტეტის თავმჯდომარემ, რომან კაკულიამ, რომელმაც საინვესტიციო გარემო შეაფასა.
კაკულიას განცხადებით, მაშინ, როდესაც მსოფლიო ელოდება 40%-ის ფარგლებში ინვესტიციების შემცირებას, რაც ბოლო წლების კრიზისების ფონზეც კი უპრეცედენტოა, ასეთ დროს ქვეყანაში ინვესტიციებთან მიმართებაში ზრდის მაჩვენებელი ხელისუფლების ეფექტურ ძალისხმევაზე მიანიშნებს.
„ინვესტიციებთან მიმართებაში ზრდის მაჩვენებელი ასევე მიანიშნებს, რომ ხელისუფლების მიერ კრიზისით დაზარალებული მოსახლეობის მხარდაჭერა ძალიან მნიშვნელოვანი იყო და მოხერხდა საერთო სტაბილურობის შენარჩუნება. ამავდროულად, გატარდა მთელი რიგი ღონისძიებები, რომლებმაც მაკროეკონომიკური სტაბილურობის შენარჩუნებას შეუწყო ხელი, რამაც მთლიანობაში უზრუნველყო ის შედეგი, რომელიც სტატისტიკურ მონაცემებში აისახა. ვფიქრობ, ობიექტურმა შემფასებელმა, ეს უნდა დაინახოს.
ამ ყველაფერმა ერთობლიობაში - მაკროეკონომიკურმა სტაბილურობამ და გონივრულმა წამახალისებელმა ინსტრუმენტებმა შესაძლებელი გახადა, არსებული კრიზისის მიუხედავად, შენარჩუნებულიყო წლების განმავლობაში კონკურენტულ უპირატესობებად ჩამოყალიბებული სექტორების საინვესტიციო მიმზიდველობა“, - განაცხადა რომან კაკულიამ.
imedinews.ge
ბიზნეს-გარემო
