საქართველოს პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარე, რომან კაკულია მსოფლიო ბანკის რეგიონულ დირექტორს სებასტიან მოლინეუსს შეხვდა. ინფორმაციას პარლამენტი ავრცელებს. 

შეხვედრის მთავარი თემა ცოდნაზე დაფუძნებული ეკონომიკა, სატრანსპორტო კორიდორთან დაკავშირებით ჩატარებული კვლევები და კონკურენტულ უპირატესობებთან დაკავშირებული საკითხები იყო.

რომან კაკულიას თქმით, - „ჩვენი შეხვედრის მთავარი მიზანი იყო კიდევ ერთხელ განგვეხილა საქართველოსთან მიმართებაში მსოფლიო ბანკის ის პორტფელი, რომელიც 2018 წელს შეთანხმდა და 11 ძირითად მიმართულებას მოიცავს. მათგან ამ შეხვედრისას ჩემთვის ძალიან მნიშვნელოვანი იყო გამომეყო ის კომპონენტი, რომელიც ინოვაციების მიმართულებით ეხმარება შესაბამის სააგენტოს. ჩვენ შევთანხმდით, რომ მსოფლიო ბანკის პროექტის ფარგლებში, ინსტიტუციების ჩართულობით განხორციელდება კვლევა და მომზადდება ამომწურავი ანგარიში მეცნიერული კვლევების შედეგების ეკონომიკური განვითარების პროცესებში ჩართვასთან დაკავშირებით. ასევე, შევისწავლით ანალოგიური ქვეყნების პრაქტიკას, სადაც მეცნიერებამ, კვლევებმა და ტექნოლოგიურმა განვითარებამ წამყვანი როლი ითამაშა ეკონომიკის განვითარებაში და იმ ინსტიტუციონალურ თუ სამართლებრივ ნაბიჯებს, რომელიც წინ უძღოდა ამ შედეგების მიღწევას“.

შეხვედრაზე მხარეებმა ისაუბრეს სატრანსპორტო კორიდორის გამოწვევებთან დაკავშირებულ კვლევებზე, რომელიც მსოფლიო ბანკის მეშვეობით ტარდება და დაიგეგმა, რომ შესაბამისი სემინარი ჩატარდება ყველა შესაძლო უწყების მონაწილეობით, სადაც დაკონკრეტდება დღეისათვის საქართველოს, როგორც სატრანზიტო ჰაბისა და სატრანზიტო კორიდორის პრეტენზიის მქონე ქვეყნის წინაშე არსებული გამოწვევები.

შეხვედრაზე ასევე, განიხილეს მსოფლიო ბანკის წინა რეგიონულ დირექტორთან დაწყებული საკითხები, კერძოდ კი, ახალი კონკურენტული უპირატესობების გამოვლენის დასავლური პრაქტიკისა და ტექნოლოგიების შესახებ. - „წინა ხელმძღვანელთან შეხვედრის დროს ჩემი თხოვნა იყო, რომ ჩვენ გვინდოდა მსოფლიო ბანკის დახმარება, რათა ახალი კონკურენტული უპირატესობების გამოვლენის დასავლური პრაქტიკა და ტექნოლოგიები უფრო მკაფიოდ ყოფილიყო გამოყენებული ქართველი მკვლევარების საქმიანობაში, რომელიც სწორედ ახალი კონკურენტული უპირატესობების გამოვლენას ეხება. ამ მიმართულებითაც მსოფლიო ბანკი ახორციელებს კვლევას და მისი წინასწარი შედეგები იქნა წარმოდგენილი“, - განაცხადა რომან კაკულიამ შეხვედრის დასრულების შემდეგ.

შეხვედრას ესწრებოდა მსოფლიო ბანკის რეგიონული წარმომადგენლობის უფროსი ეკონომისტი ევგენი ნაიდოვი.