კონკურენციის სააგენტო არ იყო აღჭურვილი რეალური ინსტრუმენტებით, რათა მას რეალური კონკურენცია შეეთავაზებინა საზოგადოებისათვის. არსებობდა პროცედურული ნორმები, რომლებიც არ იძლეოდა საშუალებას, რეალურად შესწავლილიყო საკითხი, არ არსებობდა არავითარი სანქციები, - ამის შესახებ ტელეკომპანია „იმედის“ გადაცემაში „დღის ქრონიკა“ დარგობრივი ეკონომიკისა და ეკონომიკური პოლიტიკის კომიტეტის თავმჯდომარემ, რომან კაკულიამ განაცხადა.
„თუ ჩვენ საბაზრო ეკონომიკას ვაშენებთ, ბაზარი უნდა დაემსგავსოს ბაზარს. მივედით განვითარების იმ ეტაპამდე, როდესაც ბაზრიდან გამომდინარე ყველამ გამოავლინა თავისი უნარები, მაგრამ ჩვენ უნდა დავინახოთ, როგორია თამაშის რეალური წესები. როდესაც მთავრობების ეკონომიკურ საქმიანობას ვაფასებთ, მთავარია ის, თუ როგორი თამაშის წესები დააწესა მთავრობამ. კონკურენციის სააგენტო არ იყო აღჭურვილი რეალური ინსტრუმენტებით, რათა მას რეალური კონკურენცია შეეთავაზებინა საზოგადოებისათვის. არსებობდა პროცედურული ნორმები, რომლებიც არ იძლეოდა საშუალებას, რეალურად შესწავლილიყო საკითხი, არ არსებობდა არავითარი სანქციები. როდესაც რომელიმე მოთამაშეს აქვს ბაზრის დიდი წილი, მას შეუძლია შეიქმნას დომინანტური მდგომარეობა. ეს მდგომარეობა, როგორც ასეთი, დანაშაულს არ წარმოადგენს, მაგრამ მისი ბოროტად გამოყენება უკვე დანაშაულია. საკითხების ის ჩამონათვალიც, რომელსაც სააგენტომ უნდა მიაქციოს ყურადღება, მიანიშნებს ამაზე - დომინანტური მდგომარეობის ბოროტად გამოყენება, როდესაც შენ საბაზრო წილის მაქსიმუმს დააწესებ და სააგენტოს ყურადღების არეალში ხვდები. საკმაოდ მკაფიოდ არის გაწერილი, რას ნიშნავს არახელსაყრელი და არაკეთილსინდისიერი კონკურენცია. ერთ-ერთი გამოწვევაა კონცენტრაციები, როდესაც ბაზრის მნიშვნელოვანი წილის მფლობელები ერთიანდებიან და საფრთხეს უქმნიან კონკურენციას, ამ შემთხვევაშიც სააგენტო ძალიან მყარი და მკაფიო ინსტრუმენტებითაა აღჭურვილი. ამიტომ ეს ყველა ფაქტორი - დომინანტური მდგომარეობის ბოროტად გამოყენება, კონკურენციის ხელის შემშლელი ხელშეკრულებები, არაკეთილსინდისიერი კონკურენცია და კონცენტრაციები ძალიან მკაფიოდაა გაწერილი. დაზუსტდა ტერმინები და მათი განმარტებები, დაზუსტდა სანქციებიც და სააგენტო ფუნქციებიც“, - განაცხადა კაკულიამ.
imedinews.ge