ფრენების შეწყვეტის გადაწყვეტილების უკან დგას გარკვეულ შემოსავლებზე უარის თქმა, რაც უკვე დამტკიცებული ბიუჯეტების პირობებში იოლად მისაღები გადაწყვეტილება არ არის, - ამის შესახებ პარლამენტის დარგობრივი ეკონომიკისა და ეკონომიკური პოლიტიკის თავმჯდომარემ, რომან კაკულიამ იტალიაში ფრენების შეჩერებაზე საუბრისას განაცხადა.
„იტალიაში ფრენები უკვე შეწყდა და ასეთივე გადაწყვეტილება იქნება მიღებული ნებისმიერ სხვა შემთხვევაში. არ დაგვავიწყდეს, ამ გადაწყვეტილების უკან დგას გარკვეულ შემოსავლებზე უარის თქმა, რაც უკვე დამტკიცებული ბიუჯეტების პირობებში იოლად მისაღები გადაწყვეტილება არ არის. პოპულისტური განცხადებების გაკეთება ძალიან ადვილია, მაგრამ თუ ასეთ განცხადებას აკეთებ, უნდა ჩახვიდე ბოლომდე: საიდან შევამციროთ? ამის შედეგად რა შემოსავალი შემცირდება? რის ხარჯზე უნდა მოხდეს ეს შემცირება? მაშინ ჰქვია ასეთ წინადადებას პროფესიონალური“, - განაცხადა რომან კაკულიამ.
საზღვარზე საქართველოსა და უცხო ქვეყნის მოქალაქეებისთვის შეზღუდვები დაწესდა და იტალიასთან პირდაპირი ფრენები დროებით შეჩერდა.ეპიდემიური რისკის მქონე ქვეყნებიდან ჩამოსული მგზავრებისთვის დღეიდან 14-დღიანი კარანტინი სავალდებულოა.
საქართველოში კორონავირუსის 5 ახალი შემთხვევა გამოვლინდა. ამ დროისთვის უკვე ჯამში 9 შემთხვევაა დადასტურებული. საქართველოს მთავრობის მიერ შექმნილ სპეციალური ვებგვერდის თანახმად, კარანტინის რეჟიმშია 162 ადამიანი, ხოლო სტაციონარში მეთვალყურეობის ქვეშ – 45.
საქართველოში კორონავირუსის პირველი შემთხვევა 2020 წლის 26 თებერვალს დადასტურდა. დაავადებული საქართველოს მოქალაქე ქვეყანაში აზერბაიჯანის გავლით ირანიდან შემოვიდა. კორონავირუსის მეორე შემთხვევა საქართველოში 2020 წლის 28 თებერვალს, მესამე 29 თებერვალს, მეოთხე კი 5 მარტს დადასტურდა.4 მარტს კი ცნობილი გახდა, რომ ვირუსით იტალიაში მცხოვრები საქართველოს მოქალაქე დაინფიცირდა. ბოლო მონაცემებით, COVID-19-ს მსოფლიოს მასშტაბით 3220 ადამიანი ემსხვერპლა, 51,193 კი გამოჯანრთელდა.
30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.
21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.
imedinews.ge