მსოფლიო სასურსათო რუკა (World Food Map), როკფელერის ფონდის დაფინანსებით, სურსათის ხარისხის გლობალური პროექტის (GDQP) ფარგლებში მუშავდება. ეს პროექტი Gallup-ის, ჰარვარდის გლობალური ჯანმრთელობისა და მოსახლეობის დეპარტამენტის, ასევე, გაუმჯობესებული კვების გლობალური ალიანსის (GAIN) თანამშრომლობის შედეგია, რომლის მეშვეობით მკვლევარები მსოფლიო სასურსათო რუკაზე მუშაობენ. ინფორმაციას პორტალი „აგრობიზნესი“ ავრცელებს.

რუკამ მთელი მსოფლიოდან კვების მოდელებზე ინფორმაცია უნდა გააერთიანოს და ასახოს.

GDQP-მა სხვადასხვა ქვეყნის კვების რაციონის შესახებ საიმედო მონაცემები შეაგროვა და ურთიერთშესადარებელი ინსტრუმენტები შეიმუშავა. მთავარი ინსტრუმენტი კვების ხარისხის კითხვარია (DQQ), რომელსაც ხუთი წუთი სჭირდება და მოსახლეობის დონეზე კვების მოდელის შესახებ უამრავ ინფორმაციას მოიცავს. DQQ კვების რაციონზე რამდენიმე მაჩვენებლის მისაღებად გამოიყენება, რაც დაკავშირებულია არასრულფასოვან კვებასთან მისი ყველა ფორმით, დიეტური მრავალფეროვნებისა და არაინფექციური დაავადებების რისკების, ანუ დიაბეტისა და გულ-სისხლძარღვთა დაავადებების ჩათვლით. კითხვარი როგორც ჯანსაღი, ისე არაჯანსაღი საკვები პროდუქტების 29 ჯგუფის მოხმარებაზე ინფორმაციას აგროვებს.

ქვეყნების მიხედვით კითხვარის შესაქმნელად, პროექტის გუნდმა 104 ქვეყნის ადამიანები გამოკითხა, რომ თითოეულ ლოკაციაზე ყველაზე გავრცელებული პროდუქტებისა და მათი სახელწოდებების სია შეედგინა. საერთო ჯამში, მკვლევარებს ინფორმაცია 750-ზე მეტმა ადამიანმა მიაწოდა.

ეს არის სისტემატიზირებული და შესადარებელი ინფორმაციის შეგროვების პირველი მცდელობა იმაზე, თუ რითი იკვებებიან ადამიანები მთელ მსოფლიოში. DQQ მონაცემების გამოყენებით, საბოლოო რუკა 2023 წლისთვის შეიქმნება. მასზე ინფორმაცია საინტერესო, ინტერაქტიული ფორმატით იქნება წარმოდგენილი. მომხმარებელს საშუალება ექნება, თითოეულ ქვეყანას ვირტუალურად ეწვიოს, რომ ადგილობრივი მოსახლეობის სასურსათო ლტოლვას გაეცნოს.

რუკას, ასევე, როკფელერის ფონდის მიერ დაფინანსებულ Food Initiative-ის პერიოდული ცხრილიდან საკვების შემადგენლობის მონაცემები დაერთვება. ეს მონაცემები კვების ხარისხის კულტურულად მისაღები გზებით გაუმჯობესებაზე მნიშვნელოვან ინფორმაციას წარმოადგენს.

bpn.ge