სუპერმარკეტების ქსელის „სპარისა“ და მისი თანამშროლების სამუშაო გრაფიკის საკითხი რამდენიმე დღეა განხილვისა და კრიტიკის საგნად იქცა. კერძოდ, საუბარია, იმაზე რომ სუპერმარკეტების ქსელი კომენდანტის საათის პირობებშიც მუშაობს 21:00-დან 06:00 სთ-მდე პერიოდში, შესაბამისად, ის თანამშრომლები, ვისაც ღამის საათებში უწევთ მუშაობა, მთელი ღამის განმავლობაში რჩებიან მარკეტის შიდა ტერიტორიაზე. აღნიშნულ გადაწყვეტილებას, თავად „სპარი“ იმით ხსნის, რომ ამ გადაწყვეტილებით, ღამის ცვლის თანამშრომლების სამსახურიდან გაშვება აღარ მოხდება და ისინი ჩვეულ რეჟიმში გააგრძელებენ მუშაობას.
„ბიზნესპრესნიუსი“ დაინტერესდა, როგორია კომპანიის ფინანსური მაჩვენებლები. სს „ფუდმარტს“, რომელიც ბაზარზე სამი ბრენდით („ფუდმარტი“, „იოლი“, „სპარი“) არის წარმოდგენილი, 2018 წლის ფინანსური ანგარიშგება აქვს გამოქვეყნებული. (2019 წლის ფინანსური ანგარიშგება ჯერჯერობით გამოქვეყნებული არ არის).
ანგარიშგების თანახმად, შემოსავალი - 142 936 306 ლარი; თვითღირებულება - 112 470 846 ლარი; სულ შემოსავალი (ავტ. სხვაობა შემოსავალსა და თვითღირებულებას შორის) - 30 465 460 ლარი იყო. ამასთან, 2018 წლის მონაცემებით, კომპანიის საოპერაციო მოგება - 8 006 886 ლარი; პერიოდის შედეგი (ავტ. წლის მოგება) – 1 170 483 ლარი იყო.
გარდა ამისა, რაც შეეხება საოპერაციო საქმიანობიდან ფულად ნაკადებს, 2018 წლის მონაცემებით, მათ შორის - კლიენტებისგან მიღებული ფული - 176 684 426 ლარი; მომწოდებლებზე გადახდილი ფული - 125 664 771 ლარი; გადახდილი საოპერაციო იჯარის ხარჯები - 11 169 273 ლარი; გადახდილი თანამშრომელთა ხარჯი - 9 342 570 ლარი იყო.
რაც შეეხება მფლობელებს, 2018 ფინანსური ანგარიშგების თანახმად, GEORGIA REGIONAL DEVELOPMENT FUND LLC (GRDF) ფლობს - 2.35%-იან წილს; SEAF CAUCASUS GROWTH FUND L.P. (SEAF) - 44.56%-იან წილს; NEDERLANDSE FINANCIERINGS-MAATSCHAPPIJ VOOR ONTWIKKELINGSLANDEN N.V. (FMO) - 33%-იან წილს; ხოლო შპს ფუდსერვისი - 20.10%-იან წილს ფლობენ.
რეესტრის 2019 წლის სექტემბრის ამონაწერით კი, სს „ფუდმარტის“ სამეთვალყურეო საბჭოს წევრები არიან - არმანდ ფომიჩევი, იოჰანნეს დე ვრიეს, უჩა უგულავა, ნინო გეგუჩაძე. თავმჯდომარე კი - გიორგი ჩუბინიშვილია. კომპანიის გენერალური დირექტორი არის არჩილ გეგენავა (პარლამენტის ყოფილი დეპუტატი) და გენერალური დირექტორის მოადგილის პოსტს უჩა უგულავა იკავებს.
bpn.ge
სპარი
