ყაზბეგის მუნიციპალიტეტის დაკვეთით დაბა სტეფანწმინდაში ახალი სარეკრეაციო სივრცე „ელიას პარკი“ ეწყობა.
მოსასვენებელი სივრცის პროექტირებას არქიტექტურული კომპანია „სპექტრუმი“ ახორციელებს, რომელიც მიზნად 15 590 კვ.მ. რეკრეაციული ტერიტორიის რეაბილიტაციასა და მრავალფუნქციური სივრცის მოწყობას ისახავს.
საპროექტო პარკის ცენტრს, როგორც იდეოლოგიურს, ასევე ფუნქციურს წარმოადგენს ლითონის კონსტრუქციით შექმნილი, დაახლოებით 25 მეტრის სიმაღლის მქონე გადმოსახედი ეწ. ბელვედერი, რომელიც განთავსებულია საპროექტო ტერიტორიის ყველაზე შემაღლებულ ადგილზე.
კონსტრუქციას, რომლის ფასადიც მოპირკეთებულია ლითონის პანელებით, გარს არტყავს მცირე დახრით მოწყობილი პანდუსი, რომელიც პარკის მნახველებს საშუალებას აძლევს ავიდნენ ბელვედერის ბოლო სართულზე და დატკბნენ ყაზბეგის თვალწარმტაცი, პანორამული ხედებით. ნაგებობის ყველაზე მაღალ წერტილში ასევე განთავსდება 90 სტუმარზე გათვლილი ეთნიკური რესტორანი. ბელვედერი, მასზე განთავსებული რესტორნით, ტერასით და ყაზბეგის დაუვიწყარი პანორამული ხედებით იქნება რეგიონის ერთ-ერთ მთავარი ღირსშესანიშნაობა როგორც ადგილობრივი მაცხოვრებლებისთვის, ისე ტურისტებისთვის.
როგორც კომპანია „სპექტრუმმა“ კომერსანტს განუცხადა, ამ ეტაპზე პროექტის სამშენებლო ბიუჯეტი უცნობია და მისი შემუშავება ხდება პროექტის დასრულებასთან ერთად.
„პროექტის სამშენებლო ბიუჯეტი ჩამოყალიბების პროცესშია და საორიენტაციო თანხის გამოცხადება მოხდება სამშენებლო ტენდერის გამოცხადებასთან ერთად. პროექტირების ფაზის დასრულება იგეგმება აგვისტოს ბოლოს, რასაც შემდგომში მოყვება ყაზბეგის მუნიციპალიტეტის მიერ დაგეგმილი სამშენებლო ტენდერის გამოცხადება“, - განმარტავენ „სპექტრუმში“.
ელიას პარკის პროექტით გათვალისწინებული ფუნქციების გამოყენება ყველა სეზონისთვის არის შესაძლებელი. ნაგებობების ტიპები, სამშენებლო მასალები და დეტალები სპეციალურად არის შერჩეული ყაზბეგის რეგიონის მკაცრი კლიმატური პირობების გათვალისწინებით.
პროექტის მიხედვით, შენარჩუნდება გამწვანებული არეალი და არსებული ხე-ნარგავები, პარკი სრულად იქნება ადაპტირებული შეზღუდული შესაძლებლობების მქონე პირებისთვის და გარემოზე ზემოქმედება მინიმუმამდე იქნება დაყვანილი.
ანი ცარციძე