საათობრივი ვაჭრობის ამოქმედების შემდეგ, მივიღებთ აქტიურ მომხმარებელს, რომელსაც მის მიერ მოხმარებული ელექტროენერგიის ღირებულების შემცირება შეეძლება – ამის შესახებ საქართველოს ენერგეტიკული ბირჟის ხელმძღვანელმა ირინა მილორავამ გადაცემა “ბიზნესპარტნიორის ოთხეულში” განახადა.

როგორც მილორავამ განმარატა, ახალი ბაზრის წესებით, საათობრივი ვაჭრობა ინერგება საბითუმო დონეზე და შემდეგ გავრცელდება საცალო დონეზეც.

მისივე თქმით, დროის სხვადასხვა მონაკვეთში მოხმარებულ ელეტროენერგიაზე განსხვავებული ტარიფები იმოქმედებს – პიკის ტარიფი, ბაზისის ტარიფი და შესაძლებელია იყოს უქმე დღეების ტარიფი, რომელიც მომხმარებელს დაზოგვის შესაძლებლობას მისცემს.

“დღეს გვაქვს საფეხურებრივი ტარიფი და ერთადერთი დაზოგვა 3 ნათურის ნაცვლად 2-ის ანთებით შემიძლია, მაგრამ მომავალში შემეძლება რომ მაგალითად, სარეცხი მანქანა პიკის საათში – სადაც ყველაზე მაღალი ტარიფია, არ ვამუშაო. არამედ, ღამის საათებში, რითაც მოხმარებელი ელექტროენერგიის ღირებულებას შევამცირებ. მომხმარებელი ხდება აქტიური მომხმარებელი,” – განმარტა მილორავამ.

ამასთან, მისივე თქმით, ეს პრინციპი შეეხება მწარმოებლებსაც.

“იგივე, მსხვილ მომხმარებლებსაც, თუ ტექნოლოგიური ციკლი აძლევთ შესაძლებლობას გადააწყონ თავიანთი წარმოება ღამის საათებზე ან პიკში მოხსნან დატვირთვა, ან ზაფხულში უფრო მეტი აწარმოონ, უკვე აქტიურ მომხმარებელს ვიღებთ. ჩვენ დღეს ვართ პასიური მომხმარებლები, იმიტომ რომ ჩვენზე არაფერი არის დამოკიდებული. რამდენიც არ უნდა მოვიხმაროთ თვის განმავლობაში, ტარიფი გვაქვს ერთნაირი” – აღნიშნა ირინა მილორავამ.

„ბიზნესპარტნიორი“