„როგორი შეიძლება იყოს სავარაუდოდ საქართველოს ეკონომიკის სტრუქტურა დარგების მიხედვით და რა ეკონომიკური ხედვებით უნდა უპასუხოს ქვეყანამ ამ გამოწვევას?“ - ამ კითხვით მიმართა დარგობრივი ეკონომიკისა და ეკონომიკური პოლიტიკის კომიტეტის სხდომაზე ფრაქცია „დამოუკიდებელი დეპუტატების“ ერთ-ერთმა ლიდერმა, ლევან კობერიძემ ფინანსთა მინისტრის მოადგილე გიორგი კაკაურიძეს, რომელმაც კომიტეტის სხდომაზე მთავრობის ანტიკრიზისული ბიუჯეტი წარადგინა.

„ასევე კითხვა მაქვს საგარეო ვალთან დაკავშირებით. ლარის კურსის მერყეობის შემთხვევაში, ეკონომიკის მინისტრმა თუ დაინახა რომ ლარი ოდნავ მყარდება, სიამაყით აცხადებს რომ  ეს სწორი ეკონომიკური პოლიტიკის შედეგია. გაუფასურების შემთხვევაში კი არავინ  კომენტარს არ აკეთებს. ასევე მნიშნელოვანია, თუკი კურსის გამო ვალის ზღვრის გადაჭარბება მოხდება რა დაზღვევის მექანიზმი გვაქვს? კაკაურიძემ უბრალოდ მიპასუხა რომ  ეს რისკი არსებობს“, - განაცხადა ლევან კობერიძემ.

ლევან კობერიძეს მთავარი შენიშვნა ამ ბიუჯეტთან დაკავშირებით აქვს ის, რომ  ეს არ არის ანტიკრიზისული, ეს არის კრიზისთან შეგუების გეგმა. შესაბამისად, არ ასახავს არანაირ გეგმას თუ როგორ უნდა გამოვიდეს ქვეყანა კრიზისიდან. დეპუტატი აღნიშნავს, რომ ბიუჯეტის ფული ის თანხებია, რომელიც უნდა იხარჯებოდეს მხოლოდ საჯარო სიკეთეებისთვის და უნდა იყოს ყველასათვის გარკვეული ბენეფიტის მომტანი და არა ისე რომ ერთ კომპანიას მისცენ თანხა და მეორეს არა.

„ვთვლი, რომ ბიუჯეტში სადღაც რაღაც შეამცირეს, მაგრამ ეს არ არის არსებულ გამოწვევებთან, კრიზისთან და იმ ეკონომიკურ პრობლემებთან საპასუხოდ საკმარისი. გარდა ამისა, უძრავი ქონების ბაზარზე ასე უხეშად ჩარევას რომ ახორციელებს მთავრობა, ამ შემთხვევაში პირიქით გაყიდვებმა მოიკლო. ეს კრიზისები გარკვეულწილად კომპანიებმა თავისით უნდა გადაიტანონ და ადაპტირდნენ, მაგრამ სახელმწიფო ბიუჯეტს თუ აქვს იმის ფუფუნება რომ ჩაერიოს, მხოლოდ საბაზრო ეკონომიკის პრინციპებით უნდა ჩაერიოს. თუმცა, ეს ხდება შერჩევით, პროტექციონისტულად. როგორც აღმოჩნდა მთავრობას ყველაზე მეტი ახლობელი სამშენებლო სექტორში ჰყავს და პირველ რიგში მათ სუბსიდირებას ამიტომ გეგმავს. უმჯობესია, მოსახლეობას უფრო მეტად დავეხმაროთ, მაგრამ მეორეს მხრივ, ბიზნესს შევუწყოთ ხელი, თუმცა ეს არ უნდა იყოს დათვური სამსახური, ეს უნდა იყო სწორი მექანიზმებით ჩარევა.

მთავარი მიზანია დასაქმებულების და ხელფასების შენარჩუნება, როგორც მაგალითად ამერიკამ გააკეთა. საბაზრო მექანიზმებით უნდა მოხდეს სახელმწიფოს ჩარევა და არა ისე, როგორც ახლა ხდება, რომ ფაქტობრივად  პირდაპირ ურიგებენ სესხის პროცენტის სუბსიდირებით და ამართლებენ იმით, რომ სამშენებლო და ტურიზმი პრიორიტეტია და ცუდ მდგომარეობაში აღმოჩნდა. ამ დროს კი მთავრობის პარტნიორ კომპანიებში ახდენენ ინვესტირებას. ბიუჯეტის ფული ის თანხებია, რომელიც უნდა იხარჯებოდეს მხოლოდ საჯარო სიკეთეებისთვის და უნდა იყოს ყველასათვის გარკვეული ბენეფიტის მომტანი და არა ისე, რომ ერთ კომპანიას მისცენ თანხა და მეორეს არა.  მაშინ რა დააშავა სხვა სექტორებმა, ამაზე პასუხობენ რომ ამდენი ფული ბიუჯეტში არ არის ანუ შერჩევითი სამართალია. ეს მექანიზმები უფრო გავს საარჩევნოდ ამომრჩევლების მოსყიდვის განზრახვას“, - აცხადებს ლევან კობერიძე.