საფონდო ბირჟაზე ინვესტორები აქციებით ვაჭრობენ მხოლოდ ერთი მიზნით: მოიგონ ფული. მოგების მისაღებად კი საჭიროა, რომ აქციის ფასები იცვლებოდეს – ხან ზემოთ, ხანაც ქვემოთ მოძრაობდეს. რაც უფრო მეტად იცვლება ფასი, მით უფრო იზრდება მოგების შანსი. სწორედ ცვალებადი ფასის გამო ითვლება აქცია ერთ–ერთ ყველაზე არასტაბილურ აქტივად, უფრო არასტაბილურად, ვიდრე ობლიგაცია. თუმცა, აქციებს ობლიგაციებზე მეტი მოგების მოტანა შეუძლიათ.
სწორი ინვესტიცია
აქციის ყიდვა იოლი საქმე არ არის. შეიძლება, ინვესტორმა არჩევანი იმ აქციაზე შეაჩეროს, რომელიც წარსულში მომგებიანი იყო, ანუ მისი ფასი იზრდებოდა. მაგრამ ის კვლავ მომგებიანი იქნება თუ არა მომავალში, ამის გათვლა საკმაოდ რთულია. ინვესტირება წარმატებული რომ იყოს, საჭიროა, კომპანიის კარგი გაანალიზება და ინვესტიციის სწორად მართვა.
კომპანიის ანალიზისას უნდა გადაიხედოს, რამდენია კომპანიის მოგება აქციაზე (EPS) ან რამდენია ფასისა და მოგების თანაფარდობა (P/E). გარდა ამისა, უნდა შეფასდეს კომპანიის მენეჯმენტი, მისი კონკურენტული უპირატესობები, ფინანსური მდგომარეობა. ეს მხოლოდ დასაწყისია და ინვესტორს ბევრი სხვა ფაქტორის გათვალისწინება მოუწევს.
ინდივიდუალური ინვესტორისთვის მომგებიანი გადაწყვეტილების მიღება რთულია, ვიდრე სპეციალისტისთვის, რომელიც კომპანიას უფრო პროფესიონალურად სწავლობს. ბირჟაზე აქციებით უამრავი გამოცდილი ადამიანი ვაჭრობს. ისინი ამას მთელი ცხოვრების განმავლობაში აკეთებენ და, თუ თქვენ ახალბედა ხართ, ალბათობა იმისა, რომ მას აჯობებთ, ძალიან მცირეა.
რისკები და სარგებელი
საფონდო ბაზარი ინდივიდუალურ ინვესტორებს საშუალებას აძლევს, მსოფლიოს საუკეთესო კომპანიებში ფლობდნენ წილებს. კარგ ტრეიდერებს ფულის გამომუშავება შეუძლიათ როგორც აქციების ზრდისას, ასევე ვარდნის დროს; ასევე, აირჩიონ საუკეთესო აქციები, იყიდონ და გაყიდონ ბირჟაზე საჭირო დროს.
უმეტეს შემთხვევაში აქციების შეძენის მიზანი არა დივიდენდების მიღება, არამედ მოგვიანებით მისი მომგებიანად გაყიდვაა. ხშირად აქციებს სწორედ იმიტომ ყიდულობენ, რომ გაყიდონ მაშინ, როცა მისი საბაზრო ღირებულება გაიზრდება. ამ გზით მიღებული სარგებელი ხშირად მრავალჯერ აღემატება დივიდენდებს. დივიდენდის სახით მიღებული სარგებელი ძირითადად 4-10%-ის ფარგლებში მერყეობს. მაგალითად, S&P 500 დაახლოებით 10% წლიურ შემოსავალს იძლევა, მათ შორის, კარგ ფულად დივიდენდსაც.
ზოგჯერ ადამიანებს არარეალური მოლოდინები აქვთ საფონდო ბაზარზე მისაღებ ანაზღაურებაზე. ზოგჯერ არჩევანმა შეიძლება გაამართლოს, მაგრამ ძნელია ვაჭრობა ხანგრძლივად იღბლიანი იყოს. შეიძლება ისეც მოხდეს, რომ მთლიანი ბაზარი გამართულად მუშაობდეს, მაგრამ ზოგიერთი აქცია დაეცეს და ზარალიანი გახდეს. ხოლო ისეთი კომპანიების აქციები, როგორებიცაა Amazon და Apple, წლების განმავლობაში მუდმივად მზარდია, ამიტომ მათი მფლობელებისთვის საწყისი ინვესტიცია გაასმაგებულია.
ინვესტორისთვის მთავარი საფრთხე ზარალია. საფონდო ბაზარზე რყევების გამო ინვესტორებმა შესაძლოა, დროდადრო ზარალი განიცადონ. ვარდნამ შეიძლება მოულოდნელად იჩინოს თავი და აქციის მფლობელმა დაკარგოს ფული. სპეციალისტები აღნიშნავენ, რომ აქციებში ინვესტირება უნდა იყოს გრძელვადიანი საქმიანობა. დამწყები ინვესტორი მოკლევადიან ვაჭრობას უნდა მოერიდოს. სტრატეგია ინვესტორების ხანგრძლივობით უნდა განისაზღვროს – გრძელვადიანი იქნება თუ მოკლევადიანი. მოკლევადიანი ინვესტორების უმეტესობა, რომლებსაც დღეს ტრეიდერებსაც უწოდებენ, კარგავენ ფულს. მათ უწევთ კონკურენცია ძლიერ ინვესტორებთან და კარგად დაპროგრამებულ კომპიუტერებთან, რომლებიც უკეთ იცნობენ ბაზარს.
შექმენით დივერსიფიცირებული პორტფელი
თუ ფლობთ ფართოდ დივერსიფიცირებულ პაკეტს, რომელიც S&P 500-ზეა დაფუძნებული, ეს იმას ნიშნავს, რომ აქციები სხვადასხვა ინდუსტრიის ასობით კომპანიაში გექნებათ. დივერსიფიცირება ამცირებს იმის რისკს, რომ პორტფელში რომელიმე აქციის ზარალმა მთლიანი შემოსავალი გადაფაროს. თუ მხოლოდ ერთი კომპანიის აქციებს ყიდულობთ, ეს იგივეა, ყველა კვერცხი იყოს ერთ კალათაში.
ვაჭრობა/ინვესტირება დაკავშირებულია მაღალ რისკებთან და იმ შემთხვევაშიც კი, თუ რეკომენდაციების შესაბამისად არის განხორციელებული, შესაძლოა გამოიწვიოს არსებითი დანაკარგები, ისევე როგორც მოგება. თქვენს მიერ დეტალურად უნდა იქნეს გაანალიზებული, რამდენად მისაღებია თქვენთვის ვაჭრობა/ინვესტირება თქვენი ფინანსური მდგომარეობის გათვალისწინებით და შეგიძლიათ თუ არა აიღოთ თანხის დაკარგვის მაღალი რისკი. ვაჭრობის/ინვესტირების განხორციელება არანაირი ფორმით არ უზრუნველყოფს მოგებას.
წყარო: businessfeed.ge