როგორ ვიფრინოთ იაფად - ბიუჯეტური ავიაკომპანიების გამოყენების საიდუმლო

როგორ ვიფრინოთ იაფად - ბიუჯეტური ავიაკომპანიების გამოყენების საიდუმლო

access_time2019-09-01 12:00:58

ბიუჯეტური ავიაკომპანია Ryanair-ი თბილისიდან და ქუთაისიდან ავიარეისებს ნოემბრის პირველი რიცხვებიდან იწყებს. იაფი ავიაბილეთებით სახელგანთქმული ავიაკომპანია რიგითი ქართველისთვის ევროპაში მოგზაურობის კარგი საშუალებაა, მაგრამ იმისთვის, რომ ბიუჯეტური ავიაკომპანიით სარგებლობა ძვირ სიამოვნებად არ იქცეს, საჭიროა რამდენიმე თავისებურებისა და რეკომენდაციის გათვალისწინება.

წლების წინ ქართული საზოგადოების არცთუ უმნიშვნელო ნაწილმა ძალიან სკეპტიკურად მიიღო ბიუჯეტური ავიაკომპანია Wizz Air-ის გამოჩენა ქუთაისის საერთაშორისო აეროპორტში.

მგზავრებისთვის უცხო აღმოჩნდა როგორც ბილეთების ონლაინ შეძენის პროცესი, ასევე ონლაინ რეგისტრაცია და ბარგის პოლიტიკის დეტალებში გარკვევა, თუმცა დროთა განმავლობაში ვითარება შეიცვალა და ახლა Wizz Air-ი საქართველოში მთავარი ავიაგადამზიდველია.

Ryanai-ის თვითმფრინავი Boeing 737

Ryanai-ის თვითმფრინავი Boeing 737

Ryanair-ის მომსახურებაც ონლაინ პლატფორმას ეფუძნება და იმისთვის, რომ თავიდან აიცილოთ დამატებითი ხარჯები, საჭიროა მისი ბილეთების შეძენას მიუდგეთ არა ისე, როგორც სხვა ავიაკომპანიების შემთხვევაში, არამედ უნდა გაითვალისწინოთ ბილეთში შემავალი სხვადასხვა კომპონენტი, მაგალითად, კვება, სხვადასხვა ზომის ბარგი, ურიგოდ რეგისტრაცია და ასე შემდეგ.

ბილეთების ძიება

ქუთაისს ამ წლების მანძილზე უამრავი უცხოელი ესტუმრა მხოლოდ იმ მიზეზის გამო, რომ იქ ევროპიდან ჩასვლა ბიუჯეტური ავიაკომპანიის მეშვეობით დასავლეთ ევროპის რომელიმე ცნობილი ქალაქის საზოგადოებრივი ტრანსპორტის დღიური ბილეთის ფასი ჯდება. ასეთი მოგზაურები მხოლოდ იაფი ბილეთის აღმოჩენის შემდეგ იწყებენ კონკრეტული ქალაქისა და მისი ღირსშესანიშნაობების შესწავლას.

 

Ryanair-ის იაფი ბილეთების ძიებისას დაივიწყეთ ტრადიციული მიდგომა, არ დაელოდოთ დაბალ ფასებს თქვენთვის ხელსაყრელი კონკრეტული თარიღის მიხედვით, არამედ მოგზაურობა დაგეგმეთ იმის მიხედვით, თუ როდის არის ყველაზე დაბალფასიანი ბილეთების შეძენის შესაძლებლობა. ხელსაყრელი ფასები შეგიძლიათ იხილოთ ავიკომპანიის შესაბამის ვებგვერდზე.

გაითვალისწინეთ, რომ ბილეთების ფასები ხშირად იცვლება. მაგალითად, 21 აგვისტოს, მაშინ როდესაც საქართველოში Ryanair-ის შემოსვლა გამოცხადდა, თბილისი-მილანის ბილეთის ფასი 20 ევრო იყო, დღის ბოლოს ღირებულება 35 ევრომდე გაიზარდა, რადგან ბევრმა მსურველმა დაუფიქრებლად შეიძინა უჩვეულოდ იაფი ავიაბილეთები. ასევე იაფი, ხელსაყრელი ვარიანტების მოსაძებნად ეწვიეთ სპეციალიზებულ ფეისბუკჯგუფებს, სადაც ხშირად ქვეყნდება ინფორმაცია იაფი ავიაბილეთების შესახებ.

ბილეთის შეძენა


მას შემდეგ, რაც თქვენთვის მისაღებ ვარიანტს შეარჩევთ, უნდა გაითვალისწინოთ რამდენიმე დეტალი, რომელიც აუცილებელია იმისთვის, რომ ბილეთი შეძენის პროცესში არ გაძვირდეს. მაგალითად, ავირჩიეთ წლის ბოლომდე არსებული თბილისი-მილანის ყველაზე იაფი ვარიანტი. 11 დეკემბერს ბილეთის ფასი ერთი მიმართულებით 26.55 ევროს შეადგენს. უკან დასაბრუნებლად ავირჩიოთ 15 დეკემბერი - 43.53 ევრო და, შესაბამისად, ორმხრივი ავიაბილეთის ღირებულება გამოვიდა 70.08 ევრო, ანუ, შესაბამისი კურსით, 228 ლარი.

მე პირადად მაქსიმალური სიიაფის მისაღწევად ჯერ შევიძენ ხოლმე ერთი მიმართულების იმ ბილეთს, რომლის ფასიც მისაღებია, შემდეგ კი ველოდები მეორე მიმართულების გაიაფებას. თუ თადარიგს 3 თვით ადრე მაინც დაიჭერთ, სრულიად შესაძლებელია ოპტიმალური ვარიანტის შერჩევა. რაც უფრო ახლოვდება თქვენი გაფრენის თარიღები, ბილეთები მით უფრო ძვირდება, თუმცა არის ხოლმე გამონაკლისებიც, სხვადახვა თარიღებთან დაკავშირებული ფასდაკლებები და ასე შემდეგ.

გაითვალისწინეთ, რომ ბილეთის შეძენისას სისტემა შემოგთავაზებთ უამრავ სერვისს. უნდა აირჩიოთ მხოლოდ ის, რომელიც აუცილებლად გესაჭიროებათ. მაგალითად, უნდა შეარჩიოთ ის ბარგი, რომელშიც თქვენი ნივთები მოთავსდება - ვთქვათ, უფასო ხელბარგი ან 10-კილოგრამიანი ჩანთა, რომელიც 6-10 ევრო ღირს. უფრო დიდი მოცულობის ბარგი ბილეთს აძვირებს, ისევე როგორც თვითმფრინავში სავარძლის არჩევა. მე პირადად სავარძლს ავტომატურად, შემთხვევით (რანდომ) არჩევის ფუნქცით ვჯავშნი.

ბილეთის შეძენისას ნუ იჩქარებთ ფასიანი „ჩეკინის“ - რეგისტრაციის - გაკეთებას. სისტემა უფასო რეგისტრაციის საშუალებას გაფრენის თარიღამდე ორი დღის მანძილზე მოგცემთ. უფასო რეგისტრაცია გაფრენამდე 2 საათით ადრე წყდება და, თუ ვერ მოასწარით, ადგილზე დამატებითი თანხის გადახდა მოგიწევთ. რეგისტრაცია საჭიროა იმისთვის, რომ სისტემამ ჩასხდომის ბარათი მოგანიჭოთ, რომელიც წარმოადგენს ავიაბილეთის საბოლოო სახეს და მასზე ასახულია თქვენი პირადი მონაცემები, თვითმფრინავში სავარძლის ნომერი და სხვა დეტალები. შეგიძლიათ ჩასხდომის ბარათი ამობეჭდოთ ან ელექტრონული ფორმით - მობილურით - წარადგინოთ აეროპორტში. (ბილეთის შეძენის დეტალური ინსტრუქცია იხ. აქ.)

მილანის საკათედრო ტაძარი.

მილანის საკათედრო ტაძარი.

Ryanair და Wizz Air - ჯანსაღი კონკურენცია?

რა შეიძლება მოჰყვეს საქრთველოს ავიაბაზარზე მეორე ბიუჯეტური ავიაკომპანიის გამოჩენას, რომელიც მასშტაბებით პირველს გაცილებით აღემატება? Ryanair-ის მიერ თბილისიდან და ქუთაისიდან ორ-ორი მიმართულებით ფრენების დაწყების ანონსირებიდან ორი დღის შემდეგ Wizz Air-მა არსებულ მიმართულებებს კიდევ ორი ახალი დაუმატა - ზუსტად ის ქალქები, სადაც ქუთაისიდან Ryanair-ი იფრენს. ასევე გააორმაგა ფრენა მილანის მიმართულებით, სადაც Ryanair-ი რეისებს თბილისიდან შეასრულებს.

ეს ორი ავიაკომპანია ევროპის ბაზარზეც მსგავსი სქემით მოქმედებს და მათი ჯანსაღი კონკურენციით მოგებული მხოლოდ მგზავრები რჩებიან. თუ ამ კომპანიების მომსახურების პირობები ერთმანეთისგან თითქმის არაფრით განსხვავდება, მათ შორის სხვაობა მაინც არის. მაგალითად, თუ Wizz Air ქუთაისიდან მილანში მალპენსას აეროპორტში დაფრინავს, Ryanair-ი რეისებს შეასრულებს მილანიდან თითქმის იმავე მანძილით დაშორებულ ბერგამოს აეროპორტში. ანუ, მიუხედავად ერთნაირი მიმართულებებისა, ორივე ავიაკომპანია, თუ ამის საშუალება არის, ერიდება ზუსტ დუბლირებას, რაც მომხმარებელს მეტი არჩევანის საშუალებას აძლევს.

 

ამ და მსგავსი ტიპის ავიაკომპანიებს საქართველოში ოპონენტები „მფრინავ მარშრუტკებს“ უწოდებენ. ისინი მომსახურების სიმარტივით მართლაც წააგავს საქართველოში საქალაქთაშორისო „მარშრუტკების“ სისტემას, თუმცა უსაფრთხოების დონე და ავიახომალდების ტექნიკური მდგომარეობა არაფრით ჩამოუვარდება ტრადიციული ავიაკომპანიებისას, თუ არ აღემატება კიდეც.

ბიუჯეტურ ავიაკომპანიებს, რაოდენ საოცარიც უნდა იყოს, ყველაზე ახალი ავიახომალდები აქვთ. ძველი თვითმფრინავები მეტ საწვავს მოიხმარენ, ტექნიკურ მომსახურებაზე უფრო მეტი დანახარჯები აქვთ და მათი ექსპლუატაციაც ნაკლებად ეფექტიანია.

ჩასხდომა Ryanair-ის ხომალდში, აეროპორტი პარიზი-ბოვე, 19 ოქტომბერი, 2017 წ.

ჩასხდომა Ryanair-ის ხომალდში, აეროპორტი პარიზი-ბოვე, 19 ოქტომბერი, 2017 წ.

ტრანზიტული მგზავრობა

კიდევ ერთი თავისებურება, რაც ბიუჯეტურ ავიაკომპანიებს განასხვავებს ტრადიციულისაგან, არის ის, რომ მათ არ აქვთ ტრანზიტული ავიაბილეთები - ისეთი რეისები, რომელიც ერთ და მეტ გადაჯდომას ითვალისწინებს. მაგალითად, Ryanair-ი მილანი-ბერგამოდან ბევრი მიმართულებით დაფრინავს - მათ შორის არის ბერლინი. ბილეთის ფასი 18 ევროდან იწყება. თუმცა, თუ გაქვთ სურვილი 11 დეკემბერს თბილისიდან მილანის გავლით ბერლინში ჩახვიდეთ, ამას Ryanair-ის ერთიანი ბილეთით ვერ მოახერხებთ. ამ მარშრუტით მგზავრობისთვის ცალ-ცალკე ბილეთები უნდა შეიძინოთ და თუ, მაგალითად, თბილისი-მილანის ხომალდმა დააგვიანა, მილანი-ბერლინის ფრენა გაუქმდება. ანუ ავიაკომპანია რეისების კავშირზე პასუხისმგებლობას არ იღებს. თუმცა გამოსავალი აქაც არის სხვადასხვა ტიპის ვებსაიტების სახით, რომლებიც ტრანზიტულ ბილეთებს გასცემენ და გარკვეულ გარანტიასაც იძლევიან.

ასეთი მარშრუტების შედგენა დანიშნულების ადგილზე ჩასვლის ყველაზე იაფი გზაა და ყველაზე დაბალანაზღაურებადი მოქალქისთვისაც კი ხელმისაწვდომს ხდის ევროპაში მოგზაურობას.

 

ავტორი: კახა მჭედლიძე

„რადიო თავისუფლება“




Bloomberg: რუსულ ობლიგაციებს შესაძლოა სანქციები დაუწესდეს

Bloomberg: რუსულ ობლიგაციებს შესაძლოა სანქციები დაუწესდეს
access_time2021-04-15 19:00:44
ბოლო თვეებში რუსული სახელმწიფო ფასიანი ქაღალდების შემოსავლიანობა მკვეთრად გაზრდილია, რამაც მათ მიმართ ინვესტორთა ინტერესი გააღვივა. თუმცა, სწორედ დღეს, როდესაც ეს მაჩვენებელი წლიურ მაქსიმუმს მიუახლოვდა, რუსული სახელმწიფო ობლიგაციების წინაამღდეგ სანქციები სრულიად რეალური პერსპექტივა გახდა.   რუსეთის მხრიდან უკრაინის საზღვართან სამხედრო ძალების უპრეცედენტო კონცენტრაციამ ეს იდეა, რომელიც აქამდე დაუჯერებელი ჩანდა, ინვესტორებისთვის რეალური თავის ტკივილად...

Frankfurter Allgemeine: რუსეთი თურქეთს სჯის

Frankfurter Allgemeine: რუსეთი თურქეთს სჯის
access_time2021-04-15 20:00:23
მოსკოვმა თურქეთთან ავიამიმოსვლა 1 ივნისამდე აკრძალა. ამის მიზეზად თურქეთში კორონავირუსით დაავადებულთა რაოდენობის მკვეთრი ზრდა დასახელდა.   შესაძლოა, ეს მართლაც ასე იყოს - ბოლო კვირების მანძილზე ინფიცირების რიცხვი თურქეთში რეკოდრებს ხსნის, თუმცა არის მოსაზრებაც, რომ ეს მხოლოდ საბაბია, რეალურად კი საქმე სულ სხვა რამეშია.   არადა თურქეთის საკურორტო ქალაქ ბოდრუმში  რამდენიმე დღის წინ შვებით ამოისუნთქეს.  აქ ჩამომსვლელ ტურისტთა შორის დიდი წილი...

დღის Top 10 საინტერესო ამბავი:

დღის Top 10 საინტერესო ამბავი:
access_time2021-04-15 21:00:15
დღის Top 10 საინტერესო ამბავი:     1. დაბლოკილი პარალელური იმპორტი და მოსყიდული ექიმები - რატომ ღირს ძვირი წამლები   მედიკამენტების ფასები საქართველოს მოსახლობის ყველაზე დიდი, მოუგვარებელი პრობლემა რომ არის იცის ყველამ. საკითხზე წლებია საუბრობს როგორც მმართველი გუნდი, ისე ოპოზიციური პარტიებიც და თვითონ...

15 აპრილი - რეგიონში ქართული ლარი და თურქული ლირა გამყარდა

15 აპრილი - რეგიონში ქართული ლარი და თურქული ლირა გამყარდა
access_time2021-04-15 18:00:17
კორონავირუსის უარყოფითი ეფექტი ქართული ლარის კურსზე მკვეთრად აისახა. 2021 წლის 15 აპრილის ოფიციალური კურსების მიხედვით, წლის დასაწყისიდან ქართული ლარი აშშ დოლართან მიმართებაში დაახლოებით 16 პუნქტით გაუფასურდა. შედარებისთვის, დაახლოებით 62 პუნქტით არის გაუფასურებული თურქული ლირა, სომხური დრამი მცირედით გამყარდა და აზერბაიჯანული მანათი კი პრაქტიკულად უცვლელია. ეროვნული ბანკის მიერ 15 აპრილის ვაჭრობის შედეგად (რომლის ოფიციალური კურსი 16 აპრილისთვისაა) ეროვნული...

ნიკოლოზ ბასილაშვილს ინვესტორი, ირაკლი კაჭარავა უჩივის

ნიკოლოზ ბასილაშვილს ინვესტორი, ირაკლი კაჭარავა უჩივის
access_time2021-04-15 15:10:27
მსოფლიოს 36-ე ჩოგანს ნიკოლოზ ბასილაშვილს ახალი გრძელვადიანი სასამართლო განხილვა ელოდება. როგორც კომერსანტმა გაარკვია ყოფილი ინვესტორი, ირაკლი კაჭარავა ჩოგბურთელისგან კონტრაქტით გათვალისწინებული საკომისიოს ანაზღაურებას  მოითხოვს. ინფორმაციის გადასამოწმებლად დავუკავშირდით ინვესტორის ადვოკატს, მარიკა არავეძეს, თუმცა მან ჩვენთან საუბრისას განაცხადა, რომ ამ ეტაპზე დავის დეტალებზე საუბრისგან თავს იკავებს და აღნიშნავს, რომ ეს მხარეებს შორის მოლაპარაკების კონფიდენციალურ...


მსგავსი სიახლეები

up