რა უნდა გაითვალისწინონ ონკოლოგიური დაავადებების მქონე ადამიანებმა კორონავირუსის ეპიდემიის დროს. ამ თემაზე ტელეკომპანია „იმედის“ გადაცემაში „ანატომია“ თბილისის სახელმწიფო სამედიცინო უნივერსიტეტის ვიცე-რექტორმა, ონკოლოგიის მიმართულების ხელმძღვანელმა, პროფესორმა ირაკლი კოხრეიძემ ისაუბრა. 

მისი თქმით, ონკოლოგიური დაავადებები, ისევე როგორც სხვა ქრონიკული დაავადებები გართულებათა ჯგუფს მიეკუთვნება და სერიოზულ პრობლემას წარმოადგენს. კოხრეიძე აღნიშნავს, რომ Covid 19-ით ინფიცირებული ონკოლოგიურად დაავადებული პაციენტის და ვირუსისგან თავისუფალი ასეთი ადამიანის მკურნალობა განსხვავებული მეთოდებით უნდა მიმდინარეობდეს. 

„არსებობს მთელი რიგი გეგმიური ოპერაციები, რომლებიც შეიძლება გადაიდოს, რომ გამოთავისუფლდეს სამედიცინო პერსონალში არსებული ხელები და პოტენციურად სასუნთქი აპარატები, რომლებიც შეიძლება გახდეს საჭირო ეპიდფაეთქების დროს. ონკოლოგიური დაავადებები მიეკუთვნება სიცოცხლისთვის საშიშ დაავადებათა ჯგუფს, ამიტომ, ონკოლოგიური ოპერაციების გადადება უნდა მოხდეს ძალიან ელექტიურად. ასეთი რეკომენდაცია გვაქვს ავტორიტეტული საერთაშორისო ორგანიზაციებისგან. თუ ჩვენ ვსაუბრობთ იმუნოსუპრესიულ მკურნალობაზე, რომელიც როგორც გვერდითი ეფექტი ახასიათებს ქიმიოთერაპიას და სხვა მკურნალობის მეთოდებს, ამ შემთხვევაში სტრატეგია არის განსხვავებული. თუ არის შესაძლებელი ორი კვირით გადავადდეს ქიმიოთერაპია, ეს იქნება კარგი. თუ პაციენტი არის Covid019-ით ინფიცირებული და საჭიროებს ონკოლოგიური დაავადების გამო მკურნალობას, ქიმიოთერაპია ცალსახად 2 კვირით უნდა გადაიდოს. სხივური თერაპია მას შეიძლება ჩაუტარდეს, ოღონდ განსხვავებულ აპარატურაზე. ცალკე ერთი აპარატი შეიძლება გამოიყენოს ასეთი პაციენტისთვის და ასეთი პაციენტები უნდა მოდიოდნენ დღის ბოლოს, გვიან, ამ მანიპულაციის ჩატარების შემდეგ კი უნდა ხდებოდეს ამ სივრცის დეზინფექცია შესაბამისად.რაც შეიძლება ქირურგიას, პოტენციური სარგებელის და პოტენციური რისკების შეფასება უნდა მოხდეს ძალიან დეტალურად“, - განმარტა კოხრეიძემ. 

მისი თქმით, გაციების სიმპტომების წარმოშობის დროს, ონკოლოგიური დაავადების მქონე პაციენტმა პირველ რიგში მკურნალ ექიმს უნდა მიმართოს, პირდაპირ კლიკინაში წასვლა კი მისი დაინფიცირების რისკს გაზრდის.

Imedinews