„როგორ უნდა ვისაუბროთ ლარის კურსის სტაბილურობაზე, როცა 100 მილიონი ყალბი ფული არსებობს“- პარლამენტის წევრი, ლევან კობერიძე ტვ პირველის გადაცემაში „რეაქცია“ პოლიტიკურ და ელიტურ კორუფციაზე საუბრობს. ის აღნიშნავს,რომ არსებობენ „მსხვილი ჯგუფები“, რომლებიც ქვეყანაში არსებულ პროცესებს მართავენ.
„ეს ის ჯგუფებია,რომლებმაც თავის დროზე არაერთი ფინანსთა მინისტრი და პრემიერ მინისტრიც კი შეეწირა,“- ამბობს ლევან კობერიძე. მან გადაცემაში, ტელევიზიების მხრიდან დღგ-ს გადასახადის დამალვის ფაქტები პოლიტიკურ და ელიტურ კორუფციად შეაფასა.
„ეს არის ბიუჯეტის ფული, და სახეზეა, პოლიტიკური და ელიტარული კორუფცია. პირდაპირ ხალხის ჯიბიდან ამოიღეს ფული და მოვითხოვთ ფინანსთა მინისტრის ახსნა-განმარტებას. ჯერ კიდევ, ნაციონალური მოძრაობის დროს დაიწყო ეს სქემა. ტელევიზიები დღგ-ს გადასახადს არ იხდიდნენ, მათ ხალხის ბიუჯეტში არ შეჰქონდათ თანხა. ნებისმიერმა პატარა კომპანიამ 15 რიცხვამდე უნდა გადაიხადოს დღგ-ს გადასახადი,თორემ ყადაღა დაედებათ. არსებობს სამთავრებო დადგენილება,რომლის მიხედვითაც შემოსავლების სამსახურს ან ფინანსთა მინისტრს აქვს შესაძლებლობა გამოსცეს სპეციალური განკარგულება, რომლის მიხედვითაც სასჯელი შეიძლება იყოს ალტერნატიული, მათ დაუყადაღდებათ ქონება,რაც ბიზნესის ოპერირების თვალსაზრისით ერთგვარი ხრიკია,“- ამბობს ლევან კობერიძე.
ის ფინანსთა მინისტრს მკაფიო განცხადების გაკეთებისკენ და პასუხისმგებელი პირების დასჯისკენ მოუწოდებს.
„პასუხისმგებელი პირი არის ფინანსთა მინისტრი და მან უნდა გააკეთოს მკაფიო განცხადება, რომ ან ის იღებს ამ პასუხისმგებლობას, ან უნდა დაასახელოს თავის სტრუქტურაში, ვის მიერ იყო გაცემული მსგავსი ტიპის ბრძანება.კიდევ ერთხელ ვიმეორებ, აქ საუბარია ხალხის ფულზე. კომიტეტში ვაყენებ ხოლმე საკითხებს ჯანდაცვის სისტემის, პენსიონერების, ახალგაზრდების, მცირე და საშუალო ბიზნესის პროგრამებთან დაკავშირებით, თუმცა ისინი მეუბნებიან,რომ ბიუჯეტში თანხა არ არის. რეალურად, არის და ეს 55 მილიონი ამ წუთას არ არის ბიუჯეტში. ეს არის ბიუჯეტის ძარცვა,“- აღნიშნავს კობერიძე.
მისი თქმით, ტელევიზიები, სახელისუფლებო კამპანიებისთვისა და პროპაგანდისთვის გამოიყენება.
„ხალხის ფულებით, იცით, რას აკეთებენ? სახელისუფლებო კამპანიებსა და პროპაგანდაში ხარჯავენ. ტელევიზიებში გაფორმებული უამრავი ადამიანი (არ ვსაუბრობ ჟურნალისტებზე) ექსპერტები ხალხის ჯიბიდან მოპარული ფულით იღებენ ხელფასებს“-აცხადებს კობერიძე.
ნათია კეკენაძე