საქართველოს როგორც შუა დერეფნის სტატუსზე და ტვირთნაკადების მზარდ დინამიკაზე, მთავრობის გარდა სპეციალისტებიც აქტიურად საუბრობენ, თუმცა მათი მოლოდინი განსხვავებულია. სპეციალისტების ნაწილი „კომერსანტთან“ საუბარში ამბობს, რომ ეს ვითარება მხოლოდ დროებითია და რეგიონში სიტუაციის გამოსწორების შემთხვევაში, საერთაშორისო კომპანიები ისევ ძველ მარშრუტს დაუბრუნდებიან, რადგან საქართველო მათ მაღალ ტარიფებს და ბიუროკრატიულ პროცედურებს ახვედრებს.
ეკონომიკის დოქტორი, თსუ–ს ანალიზისა და პროგნოზირების ცენტრის დირექტორი ვახტანგ ჭარაია რამდენიმე დღის წინ „კომერსანტთან“ აცხადებდა, რომ გაზრდილი ტვირთბრუნვა, რომლითაც დღეს საქართველო ასე ამაყობს, რუსეთ-უკრაინის ომი დასრულების ან სანქციების შესუსტების შემდეგ, საქართველოდან გაქრება და გადავა ისევ რუსეთში.
„შუა დერეფნის საკითხი ახლა ძალიან მნიშვნელოვანია და ყველაზე აქტუალურია. თუმცა უნდა გავითვალისწინოთ, რომ მარტო საქართველოზე არ არის ეს დამოკიდებული, ჩვენ უნდა დავალაგოთ ეკონომიკურ ურთიერთობები მეზობელ ქვეყნებთან და ქვეყნის შიგნითაც ბევრია სამუშაო, მათ შორის თუნდაც ტარიფების გადახედვა, ტრანზიტის პროცედურების გამარტივება, რომ ინვესტორს გასვლა არ მოუნდეს ქვეყნიდან, ამაზე არის დღესვე სამუშაო.
თუმცა ბოლო პერიოდის ჩემი დაკვირვებები მაძლევს იმის თქმის საფუძველს, რომ ნაცვლად იმისა, ვიზრუნოთ ტარიფების შემცირებაზე, სატრანზიტო კომპანიებისთვის უფრო მოქნილი პაკეტების შეთავაზებაზე, პირიქით, გვგონია რომ როცა მათი რაოდენობა იზრდება, რატომ უნდა გავამარტივოთ რამე? რატომ უნდა დავთმოთ როცა ბუნებრივი ზრდა გვაქვს? თუმცა ეს მიდგომა ჩვენ მოგვცემს იმას, რომ როგორც კი რუსეთ-უკრაინის ომი დამთავრდება ან სანქციები შესუსტდება, ეს ტრანზიტული ტვირთი საქართველოდან გაქრება და გადავა ისევ რუსეთში, სწორედ ეს არ უნდა დავუშვათ“, — ამბობს ვახტანგ ჭარაია.
PACE ჯგუფში შემავალი კომპანია „ტრანსფორდის“ აღმასრულებელმა დირექტორმა ვასილ მაზიაშვილმა „კომერსანტთან“ განმარტა, რომ ბიზნესში მარჟების ზრდა არ აღინიშნება, თუმცა რეგიონში წამოსულ კომპანიებს უნდა შევთავაზოთ კონკურენტული და კომფორტული გარემო, რათა მათ აქედან წასვლის სურვილი არ გაუჩნდეთ.
„პირველ რიგში უნდა აღინიშნოს, რომ რეგიონში მდგომარეობის გამოსწორება უახლოეს პერიოდში მოსალოდნელი არ არის, მოცემულ დროში კი ბიზნესმა და მთავრობამ ყველაფერი უნდა გავაკეთოთ პროცესების სისტემატიზაციისა და დახვეწისათვის, რომ რეგიონში წამოსულ კომპანიებს შევთავაზოთ კონკურენტული და კომფორტული გარემო, რომ ნებისმიერი გამოსწორების შემთხვევაში მოზიდულ კომპანიებს არ გაუჩნდებათ სურვილი დაუბრუნდნენ გადაზიდვის ძველ გზებს. რაც შეეხება მაღალ ტარიფებს, ბიზნესში მარჟების ზრდა არ აღინიშნება, იმის გათვალისწინებით, რომ გაძვირებულია დიზელი და სხვა საოპერაციო ხარჯი, ტარიფები ვფიქრობთ ადექვატურია. საბოლოოდ კი სპეციალისტებისა და ნებისმიერი ჩართული მხარის სულისკვეთება უნდა იყოს გამოვლენილ პრობლემებზე ღიად საუბარი და პრობლემების აღმოფხვრის გზების შემუშავება ვიდრე პესიმისტური დამოკიდებულებებისა და განწყობის გაღვივება“, — აღნიშნა მაზიაშვილმა.
აღსანიშნავია, რომ წლის პირველ 5 თვეში სატრანსპორტო დარგებმა 16.6 მლნ ტონა ტვირთი გადაამუშავეს, 600 ათასი ტონით მეტი შარშან 5 თვესთან შედარებით. 18%-იანი ზრდაა ქართულ პორტებში, სადაც 5.2 მლნ ტონა ტვირთი გადამუშავდა. 9.9%-იანი ზრდაა გადაზიდულ კონტეინერებში. ბათუმისა და ფოთის პორტებმა 180 573 ერთეული კონტეინერი გადაამუშავეს.