საერთაშორისო სავალუტო ფონდმა (IMF) 2023 წლისთვის საქართველოს ეკონომიკური ზრდის პროგნოზი 4%-მდე შეამცირა. გაზაფხულზე გამოქვეყნებული ანგარიშით 2023 წელს ქვეყნის ეკონომიკის 5.8%-იანი ზრდა იყო პროგნოზირებული, თუმცა ახალ ანგარიშში 1.8 პროცენტულ–პუნქტიანი კლებაა.

„საკონსულტაციო კომპანია PMCG-ის“ ხელმძღვანელმა ლექსო ალექსიშვილმა გადაცემა „ანალიტიკაში“ განაცხადა, რომ იმისათვის რათა 2023 წელს უფრო მომზადებული დავხვდეთ საქართველომ, როგორც სატრანზიტო კორიდორში არსებულმა ერთ-ერთმა ჯაჭვმა, უნდა უპასუხოს ამას რამდენიმე მთავარი გამოწვევით, მათ შორის შექმნას შესაბამისი ინფრასტრუქტურა, კანონმდებლობა, ბიუროკრატიამ და ყველა იმ ინსტიტუტმა რომელიც ამას უზრუნველყოფს იმუშაოს ეფექტურად და რაც შეიძლება მეტი უცხოელი პარტნიორი მოიყვანოს.

„IMF-ის დასკვნა გვეუბნება, რომ მსოფლიოში ეკონომიკური ზრდა 2023 წელს შემცირდება და ეს იქნება სარეკორდო, პრაქტიკულად ფინანსური კრიზისის დროს მოხდა ასეთი შემცირება, თუ არ ჩავთვლით პანდემიას, რაც ნიშნავს იმას რომ საკმაოდ რთულ სიტუაციაში იქნება ზოგადად გლობალური ეკონომიკა. თუმცა ამის ასე პირდაპირ საქართველოზე გადმოტანა არ შეიძლება. ეს ყველაფერზე მოახდენს გავლენას, მათ შორის საქართველოს დონის ქვეყანაზე, მაგრამ რაც შეეხება უშუალოდ საქართველოს, მასზე რამდენიმე ფაქტორი შეიძლება უფრო პოზიტიურად დავინახოთ, მათ შორის ერთი არის ის, რომ საგარეო ვალი არ არის მაღალი და ეს არის მნიშვნელოვანი პოზიტიური ფაქტორი და მეორე ჩემი აზრით არის, ფისკალური მდგრადობის და მაკროეკონომიკური სტაბილურობის თემა, რომელიც სახეზე გვაქვს.

რა უნდა გაკეთდეს იმისთვის, რომ მომზადებული დავხვდეთ 2023 წელს, არის მოკლევადიანი პოლიტიკის ერთ-ერთი მთავარი საზრუნავი უნდა იყოს ის, რომ საქართველო კიდევ უფრო საინტერესო გახდა, როგორც სატრანზიტო კორიდორში არსებული ერთ-ერთი ჯაჭვი. ტვირთბრუნვა გაზრდილია და ჩვენ ვხედავთ, რომ მიუხედავად იმისა თუ როგორ განვითარდება რუსეთ-უკრაინის მოვლენები, სანქციები მაინც შენარჩუნდება და ეს მაჩვენებელი დარჩება. შესაბამისად ჩვენ ვხედავთ, რომ საქართველოს და ამ კავკასიის კორიდორს საერთაშორისო ტვირთბრუნვისთვის კიდევ უფრო საინტერესოს გახდის. ამ კუთხით საქართველომ უნდა უპასუხოს ამას რამდენიმე მთავარი გამოწვევით, მათ შორის შექმნას შესაბამისი ინფრასტრუქტურა, კანონმდებლობა, ბიუროკრატიამ და ყველა იმ ინსტიტუტმა რომელიც ამას უზრუნველყოფს იმუშაოს ეფექტურად და რაც შეიძლება მეტი უცხოელი პარტნიორი მოიყვანოს.

ყველაზე უფრო სწორი მიდგომა არის, რომ კონსერვატიული იყოს დაგეგმვა და არ იყოს ზედმეტად ეიფორული, ოპტიმისტური და ა.შ. იმის გამო რომ მიმდინარე წელს 8% გვექნება ზრდა, რაც პოზიტიური სიგნალის მატარებელია, მაგრამ ეს არ არის იმის საფუძველი, ჩვენ ვთქვათ რომ ვცხოვრობთ ძალიან მშვიდ, ნორმალურ, კარგ გარემოში და შესაბამისად მაღალი ზრდა გვექნება მომავალ წელსაც. ეკონომიკური ზრდის მაჩვენებელი არის ყველაზე მთავარი საყრდენი სხვა დანარჩენი გათვლების, მათ შორის საგადასახადო შემოსავლების, ხარჯების ნაწილის და სხვა. შესაბამისად ამ მაჩვენებელს მთავარი ფუნდამენტური ხასიათი აქვს, როცა ეკონომიკურ საკითხებზე ანალიზს ვაკეთებთ, ამიტომ კონსერვატორული გარემო ყოველთვის უფრო ამართლებს ვიდრე სხვა“, — აღნიშნავს ლექსო ალექსიშვილი.