იაფი ავეჯის შვედურმა ბრენდმა IKEA-მ ამერიკაში პირველი მაღაზია 1985 წელს გახსნა. ამ დროისთვის 17 წლის ინგვარ კამპრადის მიერ 1943 წელს დაარსებული კომპანია ევროპაში უკვე საკმაოდ წარმატებული იყო. სტილიზებულ დიზაინსა და გამორჩეულად იაფ ავეჯთან ერთად IKEA მომხმარებლებს კონკურენტებისგან განსხვავებულ მომსახურებასაც სთავაზობდა: უზარმაზარი მაღაზიები, 10 000-მდე დასახელების პროდუქტი, შვედური კაფეები და ბავშვთა სივრცეები მაღაზიაში, თვითმომსახურება და ა.შ. ევროპაში IKEA-ს კონცეფციის პოპულარობის მიუხედავად, ამერიკის ბაზარზე კომპანიის შესვლას თავდაპირველად სასურველი ტრიუმფი არ მოჰყოლია, რასაც რამდენიმე მიზეზი ჰქონდა.
ამერიკის ბაზარზე შესვლამდე IKEA-ს პრიორიტეტი სტანდარტიზებული პროდუქტის შექმნა იყო, თუმცა, ამერიკელი მომხმარებლის მოთხოვნებს ევროპული სტანდარტებით შექმნილი ავეჯი, ჭურჭელი და ინტერიერის აქსესუარები ვერ ერგებოდა. ამერიკელებისთვის შვედური საწოლები ზედმეტად მაგარი, დივნები – პატარა, ფარდები კი მოკლე იყო. ბრენდის სტანდარტული სამზარეულოს ავეჯი ამერიკულ ტექნიკასა და ზომებს ვერ ერგებოდა. ამერიკელი მომხმარებლისთვის უჩვეულო იყო შეძენილი ავეჯის დამოუკიდებლად აწყობაც, თუმცა, ყველაზე დიდი გამოწვევა ავეჯის მოხმარების ამერიკული კულტურა იყო. ამერიკელები ავეჯს იშვიათად ცვლიდნენ, შეძენისას ყურადღებას ავეჯის გამძლეობას აქცევდნენ. IKEA-ს ავეჯის ხარისხზე კი გადაადგილება, რამდენჯერმე დაშლა და აწყობა მკვეთრ გავლენას ახდენდა მაშინ, როცა მისი ამერიკელი კონკურენტების მარკეტინგი გამძლეობასა და ხანგრძლივ მოხმარებაზე იყო აგებული.
1990-იან წლებში ბრენდმა ამერიკელების მოთხოვნებთან პროდუქტის ადაპტირების გარდა მომხმარებლების პრეფერენციების მასშტაბური კვლევა დაიყო. აღმოჩნდა, რომ IKEA-ს პოტენციური მომხმარებლები მოგზაურობის, რისკების, ახალი ტექნოლოგიებისა და მოდერნიზების მოყვარული ადამიანები იქნებოდნენ, თუმცა, ასეთი ამერიკელები ავეჯს IKEA-ში არ ყიდულობდნენ. ამიტომ ბრენდის მიზანი ავეჯის ყიდვის შესახებ დაბალი და საშუალოშემოსავლიანი ამერიკელების აღქმების ცვლილება გახდა. IKEA-ს ახალი მასშტაბური სარეკლამო კამპანიაც ამ გათვლებით შეიქმნა.
„ეს უბრალოდ ავეჯია. შეცვალე ის!“ – IKEA-ს მარკეტინგული კამპანიის დევიზად იქცა. ბრენდის რეკლამების კონცეფციაც ძველ ავეჯთან ამერიკელების მიჯაჭვულობის გაშარჟებაზე იყო აგებული. IKEA-ს სარეკლამო კამპანიაში გამორჩეული ადგილი 2002 წელს გადაღებულ რეკლამას – Unboring-ს უჭირავს. ვიდეოს მთავარი პერსონაჟი მაგიდის ძველი სანათია, რომელსაც პატრონი ქუჩაში წვიმაში მიატოვებს. რეკლამის დასასრულს მსახიობი მაყურებელს მიმართავს:
„ბევრი თქვენგანი ამ სანათის გამო დასევდიანდება. ეს იმიტომ, რომ შეიშალეთ! სანათს გრძნობები არ აქვს და ახალი ბევრად უკეთესია!“
IKEA-ს ამერიკულ წარმატებას კიდევ ერთი მიზეზი ჰქონდა. ბრენდის დიზაინზე ორიენტირებული პოლიტიკა 2000-იანი წლების ამერიკელების მოთხოვნების ცვლილებებსაც პასუხობდა. ყოველდღიური მოხმარების ნივთების დიზაინის მუდმივი ცვლილება და დახვეწა ბაზრის ახალ ტენდენციად იქცა. თუ დაბალ და საშუალოშემოსავლიან ამერიკელებს სულ უფრო ნაკლებად მიუწვდებოდათ ხელი გამძლეობისა და ხარისხის სიმბოლოზე – ძვირად ღირებულ, ანტიკვარულ ავეჯზე, IKEA მათ სწრაფად ცვალებად აწმყოსთან თანმხვედრ პროდუქტს სთავაზობდა.
IKEA-ს კონცეფცია მომხმარებლისთვის დემოკრატიული, თანაბრად ხელმისაწვდომი, მაგრამ ამავდროულად უნიკალური დიზაინის მქონე პროდუქტის მიწოდებაზე გადის.
2000-იანი წლებიდან კომპანიის ამერიკული შემოსავლები სტაბილურად იზრდება. ამჟამად IKEA ამერიკაში 52 მაღაზიას ფლობს და ამერიკას ბრენდის გაყიდვებში გერმანიის შემდეგ მეორე ადგილი უჭირავს. IKEA-ს გაყიდვების 14% სწორედ ამერიკის ბაზარზე მოდის. სწრაფად იზრდება IKEA-ს ონლაინგაყიდვებიც ამერიკაში. 2019 წელს კომპანიაზე ავეჯის გაყიდვების 33% მოდიოდა, რითაც ბაზარზე წამყვანი ადგილი ეჭირა. ბრენდის სამიზნე მომხმარებლები საშუალო ფენის 20-იდან 34 წლამდე ასაკის ამერიკელები არიან, რომლებიც ავეჯს „გრძელვადიან ინვესტიციად“ არ მიიჩნევენ და თანამედროვე, მოდური ავეჯის ხელმისაწვდომ ფასად შეძენა სურთ.
წყარო: businessfeed.ge