ზაფხულია და კონდიციონერების გამოყენების საკითხი ძალიან აქტუალური გახდა - პანდემიის პერიოდში ეს არც თუ ისე უსაფრთხო სიამოვნებაა, განსაკუთრებით, დახურულ სივრცეში - მაგალითად, საზოგადოებრივ ტრანსპორტში და ოფისებში.
როგორც ჩანს, დახურული სივრცე კორონავირუსის გავრცელებას ხელს განსაკუთრებით უწყობს. ჩინეთში ჩატარებულმა კვლევამ ცხადყო, რომ 120 ქალაქში დაფიქსირებული 318 კლასტერიდან ღია სივრცეში მხოლოდ 1 დაფიქსირდა, შესაბამისად, ცხადი ხდება, რომ დაინფიცირების განსაკუთრებულ რისკს სწორედ დახურული სივრცის ერთობლივი გამოყენება წარმოადგენს.
მრავალი შემთხვევა იმასაც ადასტურებს, რომ შეზღუდულ სივრცეში ვირუსის გავრცელებას დამატებით ხელს ჰაერის ნაკადები, ანუ ჩართული კონდიციონერები უწყობს.
კორონავირუსი გადადის მხოლოდ შედარებით დიდი წვეთებით, რომლებიც ჰაერში მცირე ნაწილაკებთან შედარებით უფრო სწრაფად გადაადგილდება.
დღეს დისკუსიის თემაა კორონავირუსის გავრცელება ჰაერით - 239 მეცნიერმა ჯანდაცვის საერთაშორისო ორგანიზაციას მოუწოდა, რომ მან ჰაერით ვირუსის გადადების შესაძლებლობა აღიაროს - დღესაც ორგანიზაცია ამისგან თავს იკავებს, რადგანაც ამ საკითხზე დღეისთვის არსებულ მეცნიერულ მტკიცებულებებს არასაკმარისად მიიჩნევს.
ევროპის დაავადებათა კონტროლის და პროფილაქტიკის ცენტრის ინფორმაციით, კონდიციონერებით დაავადების გავრცელების რისკი შედარებით მცირეა, თუმცა, ის მაინც არსებობს - განსაკუთრებით, დახურულ სივრცეში, სადაც სავენტილაციო სისტემების მიერ წარმოქმნილი ჰაერის ნაკადები ინფიცირებულ ნაწილაკებს შედარებით დიდ მანძილებზე ავრცელებენ.
თუმცა, ოთახების პერიოდული განიავება ამ საფრთხეს მნიშვნელოვნად ამცირებს.
შესაბამისად, სავენტილაციო სისტემების გამოყენების წესებიც დამუშავდა - დახურულ სივრცეში, სადაც კონდიციონერი მუშაობს, მინიმუმ დღეში 2-ჯერ, 15-20 წუთით აუცილებელია ჰაერის განიავება. ეს ასევე იმ დროსაც უნდა გაკეთდეს, როდესაც ოთახებში არავინაა.
„კონდიცირების ინდივიდუალურ სისტემებს, როგორც წესი, ძალიან მარტივი და უხეში ფილტრები აქვთ, რომლებიც ვირუსებს და ბაქტერიებს ვერ უმკლავდებიან. ამიტომაც ასეთი სისტემების გამოყენებისას განიავება არ უნდა დაგავიწყდეთ“- ამბობს გაგრილების და გათბობის მრეწველობის ასოციაციის თავჯდომარე კრისტელ მოლე.
ჰაერის კოლექტიური კონდიცირების სისტემებში რამდენიმე ვარიანტია.
„30 მეტრზე მაღალ შენობებში ფილტრები ჭერზეა განთავსებული, და ისინი ჰაერს ასუფთავებენ. რეკომენდაცია იმაში მდგომარეობს, რომ ეს ამ მოწყობილობის გაფილტრვის საშუალებები მაქსიმალურად უნდა დაიტვირთოს. მართალია, ეს მეტ ხარჯებთანაა დაკავშირებული, თუმცა თანამშრომლების და მათი ოჯახების წევრების ჯანმრთელობა ამად ღირს“ - თვლის მოლე.
თვითმფრინავებს უპირატესობა აქვთ- რადგანაც იქ ფრენის დროს გასაგები მიზეზების გამო განიავების შესაძლებლობა არ არსებობს, შესაბამისად, უფრო ძვირადღირებული ფილტრები გამოიყენება - ზუსტად ისეთივე, როგორც საავადმყოფოებში, ეს სისტემები საკმაოდ ეფექტურია ვირუსების წინაამღდეგ.
მთლიანობაში ჰაერის ცირკულირება და ფილტრაცია ავიალაინერებში ოპტიმალურ დონეზეა“ - ამბობს ის.
მატარებლებში ყველფერი კონკრეტულ მოდელზეა დამოკიდებული, თუმცა, ჩქაროსნულ შემადგენლობებს სუფთა ჰაერის მიწოდების სისტემები გააჩნია. მეტროში ფილტრაციის სისტემები ვაგონის ჭერზეა განთავსებული, და ამიტომ სუფთა ჰაერის მიღების თვალსაზრისით უკეთესია შუაში დგომა.
და რა თქმა უნდა, ჯანდაცვის ორგანოები ყველას აფრთხილებენ - დახურულ სივრცეში პირბადის ტარება დაინფიცირებული წვეთების გავრცელებას მნიშვნელოვნად ამცირებს.