ეკონომიკური რყევების ან საერთაშორისო კონფლიქტების დროს, რაც ახლა უკრაინასა და რუსეთს შორის ხდება, საფონდო ბაზრებზე არასტაბილური ვითარება იქმნება. ასეთ სიტუაციაში ინვესტორები ფულის უსაფრთხოდ დასაბანდებლად ხშირად ყიდულობენ ოქროს. რატომ მოსწონთ ინვესტორებს ოქრო? ის ინფლაციისგან თავის დაცვის კარგი საშუალებაც არის და ხშირად აქციებსა და ობლიგაციებზე მეტი შემოსავალი მოაქვს. მაღალი ლიკვიდურობით გამოირჩევა გარკვეული სახის ოქროზე დაფუძნებული
აქტივები, ანუ მარტივად შეიძლება მისი ნაღდ ფულად ქცევა. ინვესტორს, ოქროს შეძენით, საკუთარი პორტფელის დივერსიფიცირება შეუძლია, რაც იმას ნიშნავს, რომ ის ნაკლებად
არასტაბილური გახდება.
პრობლემა მხოლოდ ისაა, რომ ყოველთვის არ არის ნათელი, როდის უნდა შეიძინოთ ოქრო. აქციების შემთხვევაში ყიდვის გადაწყვეტილებას ინვესტორი კომპანიის შემოსავლების მიხედვით მიიღებს. ოქროს შემთხვევაში ამის განსაზღვრა უფრო რთულია.
ოქროში ინვესტირების რამდენიმე გზა არსებობს:
1. ოქროს ზოდებს ან მონეტებს ძვირფას ლითონში ინვესტირების ერთ-ერთ
ყველაზე სწორი ფორმად მიიჩნევენ. ყიდვა შესაძლებელია ონლაინდილერის ან კოლექციონერის მეშვეობით. ამ შემთხვევაში ინვესტორის მოგება მთლიანად საქონლის ფასის ზრდაზეა დამოკიდებული. ყველაზე დიდ რისკს ამ დროს ოქროს ფიზიკური დაცვა ქმნის. რისკი ჩნდება მისი გაყიდვისას. თუ სასწრაფოდ გჭირდებათ ფული, შეიძლება, მისი გაყიდვა საბაზროზე გაცილებით ნაკლებ ფასად მოგიწიოთ (განსაკუთრებით
მონეტების).
2. ოქროს ფიუჩერსები მომგებიანი გზაა ოქროს ფასის მატებაზე (ან კლებაზე)
ვაჭრობისთვის. თუ ოქროს ფიუჩერსები სასურველი მიმართულებით მოძრაობს, ძალიან სწრაფად შეძლებთ კარგად გამომუშავებას.
3. ETF – თუ ოქროს ფიზიკურად ფლობა ან ფიუჩერსების შეძენა არ გხიბლავთ,
მაშინ კარგი ალტერნატივაა საბირჟო ვაჭრობის ფონდები (ETF). მათ შორის სამი უმსხვილესია – SPDR Gold Shares (GLD), iShares Gold Trust (IAU) და
Aberdeen Standard Physical Gold Shares ETF (SGOL), სადაც აქციების ყიდვა ნებისმიერ მომხმარებელს მარტივად, მობილბანკის მეშვეობით შეუძლია. ETF-ის უპირატესობა ისაა, რომ ოქრო ფიზიკურად დაცულია, ხოლო გაყიდვა მარტივია.
4. ოქროს მომპოვებელი კომპანიის აქციებით ინვესტორს შეუძლია მოგების მიღება ორი გზით: პირველი – თუ ოქროს ფასი იზრდება, მაინერის მოგებაც შესაბამისად მატულობს. მეორე – მაინერი ამ დროს წარმოებასაც ზრდის, რაც ორმაგ სარგებელს იძლევა.
რისკები: ამ ინდუსტრიაში უამრავი სარისკო კომპანია მუშაობს. უმჯობესია,
მოერიდოთ მცირე მაინერებს.
5. ETF-ები, რომლებიც ფლობენ ოქროს მომპოვებელი კომპანიების აქციებს.
Gold Miner ETF-ები უმსხვილესი მაინერების აქციების ფლობის საშუალებას იძლევა, თანხები დივერსიფიცირებულია და, შესაბამისად, რომელიმე
კომპანიის აქციების გაუფასურების შემთხვევაში დიდად არ დაზარალდებით.
წყარო: businessfeed.ge