2020 წლის 21-23 აგვისტოს ბათუმი შავი ზღვის ჯაზ ფესტივალს უმასპინძლებს. პანდემიისა და გადადებული ფესტივალების მიუხედავად, შავი ზღვის ჯაზ ფესტივალი ტრადიციას არ არღვევს და მუსიკის მოყვარულებისთვის ქართული შოუ-პროგრამით წარსდგება.
„კომერსანტთან“ საუბრისას Eastern promotions - ის დირექტორმა გიორგი კერესელიძემ აღნიშნა, რომ ფესტივალის ჩატარების გადაწყვეტილება ქართული შოუ-ბიზნესის დაზარალებული არტისტების მდგომარეობამაც განაპირობა.
„ ყველამ იცის, პანდემიის გამო მსოფლიოში რა მდგომარეობაცაა და შოუ-ბიზნესი ყველაზე დაზარალებულია, ამიტომ ყველაფერი გადაიდო ან გაუქმდა ან გაურკვევლობაში არიან. ბევრ არტისტს შეექმნა პრობლემა. მსოფლიოში მუსიკოსების 90% ყოველდღიურ რეჟიმში მუშაობს და ამით ირჩენენ თავს. მათი ფირმებიც ფაქტობრივად გაჩერდა. ჩვენს სპონსორებთან ერთად შევიკრიბეთ და დაგვებადა იდეა, რომ თუ რეგულაციებმა მოგვცა ამის საშუალება, მოდი ფესტივალი არ გადავდოთ, გავაკეთოთ მხოლოდ ქართული და დავტვირთოთ ქართველი არტისტები, რომლებიც ასეთ ცუდ დღეში აღმოჩნდნენ.“ - განმარტავს გიორგი კერესელიძე.
აღსანიშნავია, რომ წლევანდელი ფესტივალი სრულად ქართველი შემსრულებლებით არის დაკომპლექტებული. მიუხედავად ამისა, ფესტივალზე მოთხოვნა არ შემცირებულა და დაინტერესება კვლავ მაღალია. გიორგი კერესელიძის აზრით, ქართული ფესტივალების ინტერესი ისევ ქართველებისგან წამოვა და ეს მათი მხრიდან ერთგვარი სოლიდარულობის ჟესტიც იქნება.
„ამდენი თვის განმავლობაში დიდი კონცერტი და ივენთი არ ყოფილა. იმის შანსი, რომ სხვა არტისტი სადმე ვინმემ მოისმინოს- ეგეც არ არის, რადგან ყველა ქვეყანა ჩაკეტილია. ასე რომ, ქართველი არტისტების და ქართული ფესტივალების ინტერესი ისევ ქართველებისგან წამოვა და ეს ერთგვარი სოლიდარობაც იქნება მათი მხრიდან. პრაქტიკულად სიამოვნებასაც იღებს მსმენელი და ქართველ არტისტებსაც ეხმარება. ამ თემამ ძალიან დიდი აჟიოტაჟი გამოიწვია და სპეციალურ პროგრამას აკეთებს ყველა ის არტისტი, ვინც კი გამოდის. ნინო ქათამაძემ თავის პროექტს „Black sea jazz project”-ი დაარქვა თავის კონცერტს და ბენდში 15 კაციანი შემადგენლობა ჰყავს. სტეფანემაც უზარმაზარი ბენდი მომართა და სპეციალურად ცალკე კომპოზიციებს ამატებს ამ კონცერტისთვის.“ - აცხადებს გიორგი კერესელიძე.
ფესტივალი ტრადიციულად ბათუმის კორტებზე ჩატარდება, რომელიც დაახლოებით 1200-1300 ადამიანს იტევს.
რაც შეეხება უსაფრთხოების ზომებსა და რეგულაციებს, გიორგი კერესელიძის თქმით, ფესტივალზე მისულ სტუმრებს გაუკონტროლდებათ სიცხე და ჩაუტარდებათ დეზინფექცია.
„სივრცე ძალიან დიდია, მისი ფართობი დაახლოებით 1000 კვადრატზე მეტია , მდებარეობს ღია ცის ქვეშ და შეგვიძლია მაქსიმალური დაშორებით განვათავსოთ ადამიანები. შეგვიძლია 1400 კვადრატის ფართობზე მოვაწყოთ ეს სივრცე და დაახლოებით 1200-1300 ადამიანი დავუშვათ. შემდეგ უნდა დავასტიკეროთ ადგილები და მაქსიმალურად გავაკონტროლოთ, რომ არ მოხდეს რეგულაციების დარღვევა. ეს ტექნიკური საკითხია და ამას თანამშრომლების ნაწილი გააკონტროლებს. სტანდარტულად მოხდება სიცხის გაზომვა, დეზობარიერის გავლა, ხელების დეზინფექცია - ანუ ის, რასაც უკვე ისედაც მივეჩვიეთ,“- აღნიშნავს Eastern promotions-ის დირექტორი.
ფესტივალზე დასასწრები ბილეთის ღირებულება გიორგი კერესელიძის განმარტებით, დამოკიდებული იქნება რაოდენობაზე და 100 ლარს არ აღემატება.
„ბილეთის ფასის განსაზღვრაზე ახლა ვმუშაობთ. ველოდებოდით რეგულაციებს და იმის მიხედვით, თუ რა რაოდენობის ბილეთის გაყიდვას შევძლებთ, დავადგენთ ფასს. მაქსიმალურად ვცდილობთ, რომ იაფი იყოს. თითო დღის ფასი დაახლოებით 60-80 ლარის ფარგლებში იქნება.
საფესტივალო ტერიტორიის მფლობელებსაც არ ულხინთ, თუმცა ძალიან გაუხარდათ, რომ ჩვენ მაინც ვატარებთ ფესტივალს და იჯარის ფასი არ შეცვლილა. ვეცდებით, რომ ისეთ დონეზე ჩავატაროთ ყველაფერი, რომ სამაგალითო იყოს. გვინდა ამ კუთხითაც თავი გამოვიჩინოთ მსოფლიოში,“- განმარტავს გიორგი.
Black Sea Jazz Festival-ი ბათუმში უკვე 13 წელია აქტიურად ტარდება და მის მიმართ ინტერესი ყოველ წელს მატულობს. ამ წლების განმავლობაში პროექტის ფარგლებში ფესტივალმა ისეთ მსოფლიო დონის შემსრულებლებს უმასპინძლა როგორებიც არიან - Snoop Dogg, Robert Plant, Al Jarreau, Jamiroquai და სხვ.
ანი ცარციძე