პარკირების პრობლემა დედაქალაქისთვის დღემდე ერთ-ერთ მთავარ გამოწვევად არის ქცეული. მიუხედავად იმისა, რომ თბილისის მერიამ ეს უფლება ”სითი პარკს” ჩამოართვა და ხელშეკრულებაც შეუწყვიტა, ამ მიმართულებით სიტუაცია ფაქტობრივად არ შეცვლილა. რეალურად, ორი წლის განმავლობაში თბილისის მერიის შესაბამისი უწყება იგივე საქმიანობას აგრძელებდა, რასაც მანამდე ახორციელებდა ”სითი პარკი”. ფაქტობრივად არ მოწყობილა ახალი საპარკინგე ადგილები და არც იმის შესახებ არის ცნობილი თუ რისი გაკეთება იგეგმება არსებული პრობლემის მოსაგვარებლად.

არადა, ამასობაში, გავრცელდა ინფორმაცია, რომ კომპანია “სითი პარკმა” დავა შეწყვიტა. ერთი მხრივ, მერიასა და დაქირავებულ იურიდიულ კომპანიას, მეორე მხრივ კი, მერიასა და “სითი პარკს” შორის წარმოებული მოლაპარაკებების შედეგად, კომპანია “სითი პარკმა” უკან გაიხმო სასამართლოში წარდგენილი საჩივარი და უარი განაცხადა საარბიტრაჟო დავაზე.

შეთანხმების თანახმად, თბილისის სატრანსპორტო კომპანიამ, პარკირების სისტემის მართვიდან მიღებული შემოსავლებიდან, კომპანია “სითი პარკს” გადაუხადა 4 300 000 აშშ დოლარი, რის სანაცვლოდაც მიიღო კომპანია “სითი პარკის” კუთვნილი მატერიალური აქტივები.

როგორც თბილისის მერი კახა კალაძე აცხადებს, ორი წლის განმავლობაში, რაც ოპერირება “თბილისი პარკინგმა” დაიწყო, დედაქალაქის მერიამ შემოსავლის სახით, დაახლოებით, 22 მილიონი ლარი მიიღო და სწორედ ამ ფინანსებით მოხდება ”სითი პარკისთვის” თანხის გადახდა.

ოპოზიცია კი ამტკიცებს, რომ “სითი პარკთან” კონტრაქტის გაწყვეტის შემდეგ თბილისელებისთვის არაფერი გაუმჯობესებულა. ერთადერთი ის შეიცვალა, რომ ამ ბიზნესით უკვე “სითი პარკის” ნაცვლად კალაძე და მისი გარემოცვა სარგებლობდა.

“კახა კალაძე აცხადებდა, რომ ბიუჯეტს არც ერთი თეთრი არ დაუჯდებოდა ამ კონტრაქტის გაწყვეტა და წინასაარჩევნოდ იძლეოდა ამ დაპირებებს. ახლა აღმოჩნდა, რომ სწორედ ბიუჯეტიდან 12 მილიონ ლარზე მეტი გადაიხადეს “სითი პარკისთვის”. ასევე, თბილისელებისთვის არაფერი გაუმჯობესებულა, როგორც “სითი პარკი” აჯარიმებდა და გადაჰყავდა საჯარიმოზე, ასე ხდება ახლაც. არ შესრულდა დაპირება, რომ ავტოგასამართი სადგურები მოეწყობოდა, ინფრასტრუქტურაში საერთოდ არანაირი ცვლილება არ ყოფილა”, – განაცხადა “ევროპული საქართველოს” ერთ-ერთმა ლიდერმა ირმა ნადირაშვილმა.

თუმცა, მიუხედავად ოპოზიციის კრიტიკისა, კალაძე აცხადებს, რომ ბიუჯეტიდან არცერთი თეთრის გადახდა არ მოხდება და ამავდროულად უახლოეს პერიოდში, მერია პარკირების ოპერირების უფლების გაყიდვასაც არ გეგმავს.

“ჩვენ მოვისმინეთ ცრუ განცხადებები, თითქოს, ეს თანხები ბიუჯეტიდან წავიდა. ბიუჯეტიდან ერთი თეთრიც არ დახარჯულა. ეს ზუსტად ის თანხები იყო, რომელიც კონკრეტულად იმ კომპანიის ჯიბეში უნდა წასულიყო.

დღეს რომ გავყიდოთ “თბილისის პარკინგი”, შესაძლებელია, 15-20 მლნ მივიღოთ ამ აქტივებიდან, თუმცა ამ ეტაპზე არ ვგეგმავთ გაყიდვას და ვაგრძელებთ მუშაობას. შემოსული თანხები მოხმარდება გამწვანებას, ეკოლოგიის მდგომარეობის გაუმჯობესებას”, – განაცხადა კალაძემ.

თუმცა, კალაძეს არ უსაუბრია სამომავლო გეგმებზე და იმაზე თუ როგორ მოხდება პარკიგნის პრობლემის მოგვარება თბილისში. სატრანსპორტო კომპანიის საზოგადოებასთან ურთიერთობის სამსახურის ხელმძღვანელის თენგიზ რობაქიძის განცხადებით კი პირველ ეტაპზე რაიმე ტიპის ცვლილებები არ იგეგმებოდა და მათ იმ საქმიანობის გაგრძელება დაევალათ რასაც მანამდე ”სითი პარკი” ახორციელებდა.

“2018 წლის 10 აპრილიდან, თბილისის მერიის გადაწყვეტილებით, თბილისი პარკინგის სისტემის ადმინისტრირება ჩვენს კომპანიას დაევალა. იმ პერიოდისთვის არ იგეგმებოდა რამე ცვლილებები თბილისი პარკინგის ადმინისტრირების სისტემაში; საშვის ღირებულება, ჯარიმის ოდენობა, ეს ყველაფერი რჩებოდა იგივე, ჩვენ უბრალოდ დაგვევალა, რომ მოგვეწყო და განგვევითარებინა ინფრასტრუქტურა. კერძოდ, მას შემდეგ, რაც გადმოვიბარეთ პარკირების უფლება, 26 000 კვ მეტრამდე პარკინგის ადგილი თავიდან დავხაზეთ, გამოცვლილია 12 000-მდე საგზაო ნიშნები და დგარები; ასევე, სერვისის გაუმჯობესების მიზნით, შევქმენით ვებპორტალი და მობილური აპლიკაცია, სადაც მძღოლებს შეუძლიათ საშვის მარტივად შეძენა, ასევე გადაიხადონ და შეამოწმონ ჯარიმა.

თავიდანვე, როდესაც გადმოვიბარეთ “თბილისი პარკინგის” სისტემა, მაშინვე განვაცხადეთ, რომ მიდგომა გვექნებოდა სხვა. ჩვენი სურვილი არ არის მეტი მძღოლის დაჯარიმება, ჩვენთვის, მთავარია, საპარკინგე სისტემის მოწყობა და სწორედ ამ მიმართულებით ვმუშაობთ”, – აცხადებს თბილისის სატრანსპორტო კომპანიის საზოგადოებასთან ურთიერთობის სამსახურის ხელმძღვანელი თენგიზ რობაქიძე.

გაზეთი „ბანკები და ფინანსები“