ცნობილი გახდა, თუ რატომ არ ხსნის აზერბაიჯანი სახმელეთო საზღვრებს. ABC.AZ- ის ცნობით, ამის შესახებ მილი მეჯლისის დეპუტატმა სულთან მამედოვმა ისაუბრა. მისი თქმით, არსებობს მრავალი მიზეზი, რის გამოც სახმელეთო საზღვრები დახურულია მაშინაც კი, როდესაც პანდემია ჩაწყნარდა. ამასთან, დეპუტატმა სახმელეთო საზღვრების გახსნა დააანონსა, თუმცა ვადები არ დაუკონკრეტებია.

„იმ დროს აზერბაიჯანის სახმელეთო საზღვრების ჩაკეტვა პანდემიასთან დაკავშირებით გადადგმული ნაბიჯი იყო. დღეს სახელმწიფო უფრო დაინტერესებულია საზღვრების გახსნით, ვიდრე მოსახლეობა. რადგან ნებისმიერ შემთხვევაში, საზღვრების ჩაკეტვა საზიანოა ეკონომიკისთვის. ის, რომ საზღვრები არ იხსნება, ნიშნავს იმას, რომ ამას აქვს მიზეზები. ეს მნიშვნელოვანია, პირველ რიგში, რათა თავიდან იქნას აცილებული სიტუაციები, რომლებმაც შეიძლება ზიანი მიაყენოს ჩვენს ეროვნულ ინტერესებს მსოფლიოში მიმდინარე რთული პროცესების ფონზე. დღევანდელ რეალობაში ყველა რისკის შეფასების შედეგად საზღვრების ჩაკეტვა აუცილებლობით ნაკარნახევი ნაბიჯია.

კიდევ ერთხელ აღვნიშნავ, რომ აზერბაიჯანი თავად არის დაინტერესებული საზღვრების გახსნით. საზღვრები გაიხსნება, ამაში ეჭვი არავის ეპარება. დღეს ჩვენ ვხედავთ, რომ ინციდენტობა ჩინეთშიც გაზრდილია. ნებისმიერი შეზღუდვის განმეორებითი შემოღება იწვევს ადამიანებში გაღიზიანებას. ამიტომ შეზღუდვების გაუქმება და შემდგომ მისი აღდგენა, არასწორი იქნებოდა. საზღვრების არგახსნის მიზეზი მსოფლიოში და რეგიონში არსებული გეოპოლიტიკური ვითარება და პანდემიაა. ვიმედოვნებთ, რომ ეს მდგომარეობა მალე შეიცვლება და ჩვენი საზღვრები გაიხსნება“, - აღნიშნა დეპუტატმა.

 შეგახსენებთ, რომ ბოლო 2 წლის განმავლობაში აზერბაიჯანის მაცხოვრებლები იძულებულნი არიან ქვეყანა მხოლოდ საჰაერო გზით დატოვონ, რაც საკმაოდ ძვირია. ასევე უცხო ქვეყნების მოქალაქეებს ქვეყანაში  შესვლა მხოლოდ საჰაერო გზით შეუძლიათ.

 ექსპერტების შეფასებით, სახმელეთო საზღვრების დაკეტვის ფაქტი უარყოფითად აისახება ტურიზმსა და ეკონომიკაზე.

დღეისათვის საქართველოდან აზერბაიჯანში მოხვედრა ტრანზიტული ფრენების გარდა,  პირდაპირი რეისებითაცაა შესაძლებელი, თუმცა ქვეყნებს შორის გადაადგილებაზე მოთხოვნა იმდენად მაღალია, რომ ავიაბილეთები დიდი ხნით ადრე იყიდება.