საკვების გლობალური გაძვირების შემდეგ, უკვე მე-4 თვეა მსოფლიოში სასურსათო საქონლის ფასები ეცემა. გაერთიანებული ერების ორგანიზაციის სურსათისა და სოფლის მეურნეობის ორგანიზაციის (FAO) სურსათის ფასების ინდექსმა ივლისში 8,6%-ზე მეტით დაიკლო და იანვრის შემდეგ ყველაზე დაბალ დონეზე ჩამოვიდა. ერთი თვის განმავლობაში ფასები ხორბალზე 11.5%-ით, ზეთზე 19,2%-ით, შაქარზე 3.8%-ით, რძის ნაწარმზე 2.5%-ით, ხორცზე კი 0.5%-ით შემცირდა.
როგორ და როდის აისახება მსოფლიოში სასურსათო საქონლის ფასების შემცირება საქართველოზე, ამ თემაზე „კომერსანტი“ საქართველოს დისტრიბუტორთა ასოციაციის ხელმძღვანელ ივა ჭყონიას ესაუბრა.
„საქართველოს ბაზარი არის ძალიან კონკურენტუნარიანი, ანუ ერთგვაროვანი პროდუქციით ვაჭრობს ძალიან ბევრი კომპანია, რიგ შემთხვევაში ასეულობით ორგანიზაცია, შესაბამისად იმის საფრთხე რომ მონოპოლია იყოს და შესაძლებლობის შემთხვევაში ფასები არ დაწიონ — არ არსებობს. როგორც კი მსოფლიოში ფასები რომელიმე სასურსათო პროდუქტზე დაიწევს, ეს მომენტალურად ჩვენთანაც აისახება. მაგალითად მოვიყვან ზეთს, მიუხედავად იმისა, რომ 1-ელი აგვისტოდან რუსეთმა ზეთის საექსპორტო გადასახადი $127-ით გაზარდა, იმპორტიორი კომპანიები ფასის დაწევას ახერხებენ, რადგან ნედლეულის ღირებულება შემცირდა, ვვარაუდობთ, რომ სექტემბერში დახლებზე ფასი კიდევ 7%-ით შემცირდება. იგივეა შაქრის ფასის შემთხვევაშიც, ფქვილზეც დადებითი დინამიკა ჩანს. ზოგადად, კარგია რომ უკრაინის ბაზარი გაიხსნა. როდესაც მთავარი იმპორტიორი ქვეყნები, რომლებიც ხორბლის, ზეთის და რძის ფხვნილის მთავარი მომწოდებლებია, ომში არიან ჩართულები, რა თქმა უნდა პრობლემას ქმნის. ყველაზე დიდ პრობლემად მაინც რჩება ლოგისტიკა, რომელიც სამწუხაროდ გართულებულია და მეორეს მხრივ საწვავზე გაზრდილი ფასები, რომელმაც ტრანსპორტირება გააძვირა, თუმცა უკვე შეინიშნება ბარელზე ფასების კლება და ეს რა თქმა უნდა დადებითად აისახება.
გარდა ამისა, ლარის სტაბილურობამ ბევრი კარგი რამ გამოიწვია, რადგან ბოლო თვეების განმავლობაში ინფლაციის მაჩვენებელი არის თითქმის ნულის ტოლფასი, რიგ შემთხვევაში კლებაც არის. ასევე მნიშვნელოვანია, რომ ტურისტული სეზონია და ლარი სტაბილურობას ინარჩუნებს, თუმცა ველოდებით სექტემბრის მეორე ნახევარს და ვნახავთ როგორ მოიქცევა ჩვენი ვალუტა. ეროვნული ვალუტის მიმართ ნდობა დაბალია და ვნახოთ რა იქნება სამომავლოდ, როდესაც ტურისტების ასეთი მაღალი ნაკადი აღარ იქნება. თუმცა ერთი რამ ფაქტია, რომ პირველადი მოხმარების პროდუქტებზე განსაკუთრებით სწრაფად აისახება ფასების ცვლილება და დაველოდოთ“, —აღნიშნა ივა ჭყონიამ.
გაეროს ინდექსი (UN index) მეოთხე თვეა დაეცა, რაც გარკვეულ შვებას სთავაზობს მომხმარებლებს, რომლებიც განიცდიან ცხოვრების ხარჯების მნიშვნელოვან ზრდას. აღნიშნული მოიცავს ყველაფერს, ენერგიიდან დაწყებული ტრანსპორტით დამთავრებული. სურსათის ფასები გაიზარდა პანდემიის დროს, რადგან პრობლემებმა ლოგისტიკური აურზაური გამოიწვია და მოთხოვნამ გადააჭარბა მიწოდებას.