მოსალოდნელია თუ არა ქვეყანაში სურსათის ფასების გაიაფება? როგორც ცნობილია საქართველო ამ მხრივ დიდწილადაა დამოკიდებული საერთაშორისო ბაზარზე არსებულ ვითარებაზე. ანალიტიკოსების გათვლებით, მომავალ წელს სასურსათო პროდუქციაზე ფასები მიმდინარე წელთან შედარებით მნიშვნელოვნად შემცირდება.

თუ კი საერთაშორისო ბაზრებს გადავხედავთ, FAO-ს მონაცემების მიხედვით, 2022 წლის ივნისი მიყოლებით მესამე თვეა, როცა მსოფლიოში სასურსათო საქონლის ფასები ოდნავ შემცირდა. ეს კი უკვე შეიძლება პოზიტიურ სიგნალად მივიჩნიოთ.

როგორც ბიზნეს ფორმულასთან საუბრისას იმპორტიორი კომპანია „მზიურის“ დირექტორმა დიმიტრი რამიშვილმა განაცხადა, ფასების ზრდის ტემპი რაღაც ნიშნულზე ავიდა და ახლა მოსალოდნელია მისი დაღმასვლა.

„გადათამაშდა სიტუაცია, ჩვეულებრივი, ბუნებრივი მოვლენაა. ფასებმა მიაღწია რაღაც პიკურ დონეს. ახლა კი ადაპტირებულად გადათამაშდება და დაჯდება, რაღაც დონეზე. რაც ავტომატურად ნიშნავს, რომ სურსათი წინა პარტიებთან შედარებით ახალი პარტიები იაფი იქნება. 

მაგალითად, თუ სუპერმარკეტებში გახვალთ ნახავთ, რომ 1 ლიტრი ზეთი ფასი 7,5 ლარიდან 10 ლარამდე მერყეობს.

ძირითადად ეს დიაპაზონია: გააჩნია რა ბრენდია, რა ხარისხია და ვისი წარმოებაა. შეიძლება ეს დიაპაზონი შემცირდეს და გახდეს 6-დან 8 ლარამდე, - აცხადებს „მზიურის“ დირექტორი დიმიტრი რამიშვილი.

დისტრიბუტორთა ასოციაციის” ხელმძღვანელი ივა ჭყონია ამბობს, რომ საქართველოში საკმაოდ დიდი კონკურენციაა და საერთაშორისო ბაზარზე ფასების კლება ადგილობრივ ბაზარზეც მყისიერად აისახება.

„საერთაშორისო ბაზარზე ფასების კლება ერთ-ერთი ფაქტორი იქნება იმის, რომ ინფლაციის მაჩვენებელი თვიურ ჭრილში მეტით არ გაიზრდება. საქართველოში ბერი კომპანიაა, კონკურენციაა საკმაოდ მაღალი და განსაკუთრებით პირველადი მოხმარების პროდუქტებზე, რომელიც სწრაფად ბრუნვადია და ფასის ცვლილება საკმაოდ სწრაფად აისახება.  შესაბამისად საერთაშორისო ბაზარზე თუ ფასები გაიაფდება დამერწმუნეთ, რომ საქართველოში წარმოუდგენელია ის ფასები შეინარჩუნო რაც არის კონკურენციიდან გამომდინარე და ძალიან სწრაფად მოხდება ფასების დადებითოსკენ ცვლილება“, - აცხადებს ივა ჭყონია. 

აღსანიშნავია, რომ FAO-ს სურსათის ფასების ინდექსმა მაისის შემდეგ 2.3 პროცენტით იკლო და 2022 წლის ივნისში საშუალოდ 154.2 ქულა შეადგინა. თუმცა, ის 2021 წლის ივნისის მაჩვენებლებს 23.1 პროცენტით უსწრებს. ინდექსი სასურსათო საქონლის საერთაშორისო ფასებზე ყოველთვიურ ცვლილებებს ასახავს.

ივნისში მისი კლება აისახა მცენარეული ზეთის, მარცვლეულისა და შაქრის ფასებზე, ხოლო რძის პროდუქტისა და ხორცპროდუქტის ფასები გაიზარდა. 

FAO-ს მარცვლეულის ფასების ინდექსმა ივნისში საშუალოდ 166.3 ქულა შეადგინა და მაისთან შედარებით 4.1 პროცენტით დაეცა. თუმცა, გასული წლის ამავე თვის მონაცემებს 27.6 პროცენტით აჭარბებს. საერთაშორისო ფასები ხორბალზე ივნისში 5.7 პროცენტით შემცირდა, ხოლო წინა წლის მაჩვენებელს 48.5 პროცენტით აღემატება. ივნისის ვარდნა ჩრდილოეთ ნახევარსფეროში მოსავლის აღებამ  და სეზონურმა ხელმისაწვდომობამ გამოიწვია, ასევე, ზოგიერთ მთავარ მწარმოებელ ქვეყანაში მოსავლის აღების გაუმჯობესებულმა პირობებმა და რუსეთის ფედერაციაში მაღალი  მოსავლიანობის პროგნოზმა. ასევე შემცირდა სიმინდის ფასი - 3.5 პროცენტით, რომლის მიზეზიც არგენტინასა და ბრაზილიაში სეზონური ხელმისაწვდომობა და აშშ-ში მოსავლის აღების გაუმჯობესებული პირობები გახდა.