ჩვენმა მთავრობამ ყველაფერი გააკეთა იმისთვის, რომ ქვეყანაში არის მშვიდობა, სტაბილურობა, მაღალი ეკონომიკური ზრდა. უმუშევრობა და სიღარიბე არის ისტორიულ მინიმუმზე დასული, - ამის შესახებ საქართველოს პრემიერ-მინისტრმა ირაკლი ღარიბაშვილმა, მთავრობის სხდომაზე განაცხადა.

ფინანსისტი გიგა ბედინეიშვილი „კომერსანტთან“ ამბობს, რომ პრემიერ-მინისტრის მიერ დასახელებულ მაჩვენებლებში ერთადერთი საამაყო მაღალი ეკონომიკური ზრდაა, რომელიც ძირითადად რუსების დამსახურებაა და არა მთავრობის მიერ შემუშავებული მდგრადი ეკონომიკური მოდელის.

„ეკონომიკური ზრდა ნამდვილად მაღალია, ამაში პრემიერს ვერ შეეკამათები, მაგრამ ძირითადად იმის გამო, რომ ბევრი რუსია ჩამოსული და აქ ხარჯავს თავის დანაზოგს და არა მთავრობის პოლიტიკის გამო. მდგრადი ეკონომიკური მოდელი ქვეყანაში არ არსებობს.  მაღალი ეკონომიკური ზრდა გვაქვს მთავრობის ქმედებების მიუხედავად, მათ ამისთვის არაფერი გაუკეთებიათ. რაც შეეხება სიღარიბეს, მისი გაზომვა არის ძალიან მანიპულაციური. სიღარიბეს ზომავენ თუ გაქვს შემოსავალი რაღაც კონკრეტული თანხის ქვემოთ, რომელსაც თვითონ აწესებენ. უმუშევრობის დათვლაშიც არის პრობლემა, რადგან ეს არის თუ რამდენი ადამიანი ვერ პოულობს სამსახურს იმასთან შედარებით თუ რამდენი ეძებს. რამდენი ეძებს ეგ ციფრი შეიძლება შემცირდეს კიდევაც და შესაბამისად უმუშევრობის თვალსაზრისით უკეთესი სურათი დაიხატოს. თუმცა სამუშაოს მაძიებელთა რიცხვის შემცირება შეიძლება მოხდეს იმის გამო, რომ ხალხი გაქცეულია ქვეყნიდან ან სოციალურ გადახდებზე ყოფნა ურჩევნია ვიდრე სამსახურის ძებნა და ა.შ. 

პრემიერის ჩამონათვალში ერთადერთი საიმედო ციფრი არის ეკონომიკური ზრდა, რომელიც ნამდვილად მაღალი გვაქვს, მაგრამ როგორც კი რუსები წავლენ ქვეყნიდან, ყველაფერი შეიცვლება, ამიტომ არამგონია ღარიბაშვილს ამ მაჩვენებლებში რაიმე საამაყო წვლილი ჰქონდეს. ეკონომიკური ზრდა გვაქვს უკრაინასთან დაკავშირებული მოვლენების გამო,“ — აღნიშნა გიგა ბედინეიშვილმა.

ეკონომისტი აკაკი ცომაიაც ვერ ხედავს 2022 წელს საქართველოს ეკონომიკის ორნიშნა ზრდაში მთავრობის წვლილს და პრემიერის სიამაყის მიზეზს. მისი თქმით, გასულ წელს არც ეკონომიკის სტრუქტურა შეცვლილა და არც დიდი ტექნიკური პროგრესი გვქონია და რასაც ადრე ვაკეთებდით, იგივე კეთდებოდა.

„მთავრობის ეკონომიკური პოლიტიკის დამსახურება რომ იყოს, მთავრობამ ან ეკონომიკური პოლიტიკა უნდა შეცვალოს ან ეკონომიკური რეფორმები განახორციელოს, რომლებსაც ასეთი სწრაფი შედეგი არ აქვთ. ამიტომ სიამაყის საფუძველი არ აქვთ, რადგან, შარშანდელ ორნიშნა ეკონომიკურ ზრდასთან მთავრობის ეკონომიკური პოლიტიკა არაფერ შუაშია. 

გასულ წელს ორნიშნა ზრდა განაპირობა პანდემიის შემდგომმა პერიოდმა, რადგან ეს ისედაც მოსალოდნელი იყო და ასევე ამას დაემატა რუსეთ-უკრაინის ომი. რუსეთის და ბელარუსის მოქალაქეების დიდი რაოდენობა შემოვიდა ქვეყანაში და უპრეცედენტოდ გაიზარდა ფულადი გზავნილები. ეს არის ძირითადი ფაქტორები, რამაც ეკონომიკის ზრდის მაღალი ტემპი განაპირობა. რაც შეეხება სხვა ფაქტორებს, ესეც ერთგვარი მანიპულაციაა“, - განმარტა აკაკი ცომაიამ.