სამწლიანი პაუზის შემდეგ, 2021 წელს კრიპტობაზარი კვლავ აქტუალური გახდა. საერთო კაპიტალიზაციამ, პირველად $1 ტრლნ-ს გადააჭარბა. ციფრული ვალუტების ნაწილმა ღირებულების ახალი რეკორდი მოხსნა, ნაწილს ჯერ კიდევ ბევრი უკლია, თუმცა ზრდის ტემპი მათ შემთხვევაშიც შთამბეჭდავია. ცნობილი კრიპტოვალუტებიდან ბოლო პერიოდში ყველაზე მეტად რიპლი გამყარდა. ერთ კვირაში მისი ფასი 135%-ით გაიზარდა.
რიპლი 2012 წელს შეიქმნა. პირველი 5 წელი მის შესახებ ბევრს არაფერი სმენოდა. 2017 წელს, როდესაც კრიპტობაზარი 36-ჯერ $18 მლრდ-დან $650 მლრდ-მდე გაიზარდა, სხვა ალტკოინებთან ერთად ინვესტორები რიპლითაც დაინტერესდნენ. აპრილში მისი ღირებულება ჯერ 2 ცენტიდან 20 ცენტამდე გაიზარდა, შემდეგი ზრდა დეკემბერში დაიწყო და 2018 წლის იანვარში $3.84 გახდა. იმ პერიოდში მისმა კაპიტალიზაციამ ეთერიუმისას გაუსწრო და $150 მლრდ-ს მიაღწია. 15.2%-ანი წილით 3 წლის წინ რიპლს მთელს კრიპტოკაპიტალიზაციაში ბიტკოინის შემდეგ მეორე ადგილი ეკავა.
უკვე 2017 წლიდან კრიპტოვალუტების წინააღმდეგ სხვადასხვა სახელმწიფოებმა და ცენტრალურმა ბანკებმა მონეტარულ პოლიტიკაზე გავლენის დაკრაგვის შიშით მთელი რიგი რეგულაციები შემუშავეს. შედეგად თუ 2018 წლის იანვარში კრიპტოკაპიტალიზაცია $830 მლრდ-ს შეადგენდა, იმავე წლის აპრილში $265 მლრდ-მდე შემცირდა. არსებობდა უარესის მოლოდინი, რომლის თანახმადაც ციფრული ვალუტები საერთოდ უნდა გამქრალიყო. პესიმისტური პროგნოზი არ გამართლდა.
8300-ზე მეტი ციფრული ვალუტიდან სულ რამდენიმეა ისეთი, რომელსაც სხვებიგან გამორჩეული სპეციფიკური დანიშნულება გააჩნია. თუ ბიტკოინი რეალური ფულის ალტერნატივა და ციფრული ოქროა, ხოლო ეთერიუმი „ჭკვიანი კონტრაქტების“ აღსრულებაზეა ორიენტირებული, რიპლი საერთაშორისო გადარიცხვებისთვის გამოიყენება. მისი უპირატესობა სისწრაფე და დაბალი საკომისიოა. ანგარიშზე თანხა 3 დღის ნაცვლად სულ რაღაც 4 წამში ჯდება.
წლის დასაწყისში რიპლი 22 ცენტი ღირდა. რამდენიმე დღეში ფასი 30 ცენტამდე გაიზარდა და სამი კვირით დაპაუზდა. ხელახალი ზრდა კი 30 იანვრიდან დაიწყო და 1-ელ თებერვალს უკვე 66 ცენტი გახდა. მისი კაპიტალიზაცია ამჟამად $29 მლრდ-ს აღწევს, მთელი კრიპტოკაპიტალიზაციის 2.9%-ს. ამ პარამეტრით ის მხოლოდ ბიტკოინსა და ეთერიუმს ჩამორჩება.
ციფრული ვალუტების სამყაროში პროგნოზი ხშირად არ მართლდება, თუმცა დღეს არსებულ ინფორმაციაზე დაყრდნობით გაკეთებული ანალიზით, მიმდინარე წელს რიპლის ფასმა $2-ს უნდა მიაღწიოს, 2023 წლისთვის $3-ს და 2030 წლისთვის $17-ს უნდა მიაღწიოს.
გიორგი ელიზბარაშვილი