თბილისის მერიის გადაწყვეტილებას გაეკონტროლებინათ მეტროსადგურებში მგზავრთნაკადი უკუშედეგი გამოიღო. ბარიერების აღმართვის შემდეგ რიგები დაგრძელდა და დისტანციის დაცვა შეუძლებელი გახდა.
6 ნოემბრიდან კორონავირუსის გავრცელების შემცირების მიზეზით, თბილისის 4 ყველაზე ხალხმრავალ მეტროსადგურში: „ვარკეთილი,“ „სადგურის მოედანი,“ „დიდუბე“ და „ახმეტელის თეატრი“ მგზავრთნაკადის კონტროლი დაიწყო. შესასვლელში ზიგზაგისებურად რკინის ბარიერები დაიდგა და მხოლოდ 1 კარი დარჩა ღია. გადაადგილების კონტროლი პოლიციას დაევალა. იმ ფაქტმა, რომ მგზავრთა რაოდენობა პრაქტიკულად არ შეცვლილა და მათ ახლა 2 ან 4 კარის ნაცვლად 1 კარში უწევთ შესვლა, რიგები გაზარდა და დისტანცია შეამცირა.
სოციალურ ქსელში 13 ნოემბრით დათარიღებული „ახმეთელის თეატრის“ შესასლელთან გადაღებული ფოტოები გავრცელდა, სადაც ნათლად ჩანს, რომ მგზავრებისთვის კოვიდრეგულაციების შესრულება უბრალოდ შეუძლებელია.
ცოტა ხნის წინ, თბილისის მერიამ აღნიშნულთან დაკავშირებით განცხადება გაავრცელა, სადაც ნათქვამია რომ მუნიციპალიტეტი მგზავრთა ნაკადის მართვისთვის შესაბამის ზომებს მიმართავს. მათი თქმით, „ახმეტელის მეტროსადგურთან“ პიკის საათის პერიოდში ღია სივრცეში რიგის შეკავება, რათა ქვედა სივრცეში უფრო თავისუფლება ყოფილიყო, სწორედ ამ მართვის ნაწილი გახლდათ.
„გვინდა, გამოვეხმაუროთ დღეს, პიკის საათის პერიოდში, მეტროსადგურ„ახმეტელის თეატრის“ შესასვლელთან მგზავრთა ნაკადის შესახებ გავრცელებულ ინფორმაციას.
კიდევ ერთხელ შევახსენებთ საზოგადოებას, მაშინ, როდესაც ქვეყანაში მძიმე ეპიდემიოლოგიური სიტუაციაა და ცენტრალური ხელისუფლების მხრიდან ყოველდღიურად ხდება ვირუსის გავრცელების წინააღმდეგ განსაკუთრებული ღონისძიებების გატარება, რასაკვირველია, თბილისის მუნიციპალიტეტი, საკოორდინაციო საბჭოსთან შეთანხმებით, შესაბამის ზომებს მიმართავს.ერთ-ერთი ასეთი ღონისძიებაა მეტროპოლიტენში მგზავრთა ნაკადების მართვა. მართვის შედეგად ხდება მეტროსადგურების შიგნით მგზავრთა ნაკადის განტვირთვა და რიგის მართვა გარეთ, ღია სივრცეში. შედეგად, ქვედა ვესტიბიულებში ნაკადი იკლებს და მცირდება ვირუსის გავრცელების რისკი.
სწორედ მსგავსად იმართებოდა რიგი დღეს დილით, პიკის საათის პერიოდში - მეტროსადგურ „ახმეტელის თეატრის“ შესასვლელში, ღია სივრცეში შეკავდა რიგი, ხოლო მეტროს ვესტიბიულში იყო სიხალვათე.
მოვუწოდებთ მოსახლეობას, დაიცვან სოციალური დისტანცია როგორც დახურულ, ისე ღია სივრცეში, მეტროსადგურების შესასვლელებთან არსებულ ბარიერებში, რათა მაქსიმალურად ავირიდოთ თავიდან ვირუსის გავრცელების რისკი,“ - ნათქვამია განცხადებაში.