დაახლოებით 2  წლის წინ, ველოსიპედების პირველი ქართული ბრენდის შექმნის იდეა შალვა ბაბილუას გაუჩნდა.  მიზეზი იყო ის, რომ ქართულ ბაზარზე ამ მხრივ თავისუფალი სივრცე არსებობდა და  როგორც Ridex Bikes_ში აცხადებენ, ბაზარზე იყო იმის საჭიროება, რომ ქართული  ნაწილები და ქართული სერვის ცენტრი ქვეყანაში ხელმისაწვდომი ყოფილიყო. ქართული ველოსიპედები ფოთის საწარმოში ეწყობა, სადაც 14 ადამიანია დასაქმებული.

„ ეს არის ხელმისაწვდომი ველოსიპედი გარანტიით, კარგი  ხარისხით. რაც საქართველოში გარანტიით იყიდება საკმაოდ ძვირიანია და ნაწილებზე  გარანტიას აქ არავინ იძლევა,  რადგან რომელიმე ბრენდის ოფიციალური  წარმომადგენლობა არ გვაქვს.

მთავარი ისააა, რომ ჩვენ ვართ პასუხისმგებლები და  გარანტორები იმისა, რომ თუ  ველოსიპედზე  რაღაც პრობლემაა,  საზღვარგარეთ  არ მოგიწვს იმის  გარკვევა თუ რა  დაემართა.

დავიწყეთ პროტოტიპის დამზადება, შევუკვეთეთ ნაწილების რამდენიმე  ვარიაცია და ავაწყვეთ დაახლოებით 5-7 მოდელი სხვადასხვა კომპლექტაციით.  შემდეგ დავთვალეთ საბაზრო ღირებულება და ერთ-ერთი პირველი მოდელი  შევიმუშავეთ,  ხელმისაწვდომი ხარისხიანი ველოსიპედი გარანტიით.  დიდი რაოდენობით  შევუკვეთეთ ჩარჩოები,  დავბრენდეთ, ველოსიპედები ავაწყვეთ და დავიწყეთ გაყიდვა მარტში,“- განმარტავს Ridex Bikes-ის დამფუძნებელი შალვა ბაბილუა.

Ridex Bikes-მა უკვე ორი სხვადასხვა მოდელის 700 ველოსიპედი დაამზადა, რომელიც გაყიდვაშია, როგორც კომპანიის სერვის ცენტრებში, ასევე ონლაინ პლატფორმებზე.

ბიზნესის საინვესტიციო მოცულობამ 250 000 ლარი შეადგინა.

„ ჩვენ თბილისში გვაქვს   მაღაზიათა სერვის ცენტრი,  ონლაინ მაღაზიებში - „ექსტრასა“ და „ვენდუზე“ . ჩვენი მიზანია, რომ სეზონზე დაახლოებით 3000 ზე მეტი ველოსიპედის გაყიდვა მოვახერხოთ, რათა აზრი ჰქონდეს დანადგარების ჩამოტანას, რომ  ჩვენი  ქართული ჩარჩოების წამოება  დავიწყოთ.

ველოსიპედის ფასი დაახლოებით 400-დან 600 ლარამდე მერყეობს. სამწუხაროდ,  ჯერჯერობით უფრო დაბალფასიანებს ვერ ვაკეთებთ, რადგან ისეთი მასშტაბური წარმოება არ გვაქვს. რაც არ უნდა იყოს, სერვის ცენტრის ქონაც დამატებით ხარჯებთანაა დაკავშირებული. ამ  ყველაფერთან ერთად, მაინც კონკურენტუნარიანი ფასია, — აღნიშნავს შალვა ბაბილუა.

Ridex Bikes-მა უკვე ქუთაისის საერთაშორისო უნივერსიტეტისგანაც 20 ველოსიპედის შეკვეთა მიიღო, რაც იმას ნიშნავს, რომ ქართველი და უცხოელი სტუდენტები სწორედ ქართული ველოსიპედით იმოძრავებენ.

„ქუთაისის  საერთაშორისო უნივერსიტეტმა დაახლოებით 20 ცალი ველოსიპედი შეგვიკვეთა და შესაძლოა ცოტა ხანში შეკვეთა გაიზარდოს. საერთაშორისო უნივერსიტეტია, უცხოელები სწავლობენ - ველოსიპედი დამატებითი კომფორტის საშუალებაა სტუდენტებისთვის.

სამომავლოდ, გვინდა უფრო  დიდი ინვესტორები მოვიზიდოთ და ჩვენს მეზობელ ქვეყნებში გავიტანოთ ქართული ველოსიპედები. ორი წლის  თავზე ვგეგმავთ, რომ დავიწყოთ ქარხნის დაგეგმვა ქართლი ჩარჩოებისთვის და მისი აშენება,“ - ამბობს შალვა ბაბილუა.

 მარიამ მორგოშია