სამკურნალო საშუალებების ევროპული სააგენტო (EMA) წლის ბოლომდე ვერ მიიღებს გადაწყვეტილებას COVID-19-ის საწინააღმდეგო რუსული ვაქცინა Sputnik V-ის დამტკიცების თაობაზე. ამის შესახებ Reuters-ი იტყობინება წყაროზე დაყრდნობით. მისი სიტყვებით, რუსული პრეპარატის აღიარებისთვის აუცილებელი რამდენიმე მონაცემი ჯერაც არ მოიპოვება.
თუკი რუსეთი მათ ნოემბრის ბოლომდე წარმოადგენს, „სავსებით შესაძლებელია, ევროპულმა სამედიცინო მარეგულირებელმა მომავალი წლის პირველ კვარტალში მიიღოს გადაწყვეტილება,“ დასძინა სააგენტოს რესპონდენტმა.
სამკურნალო საშუალებების ევროპულმა სააგენტომ Sputnik V-ის დამტკიცების პროცედურა მიმდინარე წლის მარტში დაიწყო. ივნისში Reuters-ი იტყობინებოდა, რომ ევროპაში Sputnik V-ის რეგისტრაცია იმის გამო ყოვნდება, რომ ვაქცინის შემქმნელმა, „გამალეის ცენტრმა“, ЕMA-ს არ წარუდგინა მონაცემები პრეპარატის კლინიკური გამოცდის შესახებ.
სექტემბერში ჯანდაცვის მსოფლიო ორგანიზაციამ (WHO) ასევე განაცხადა Sputnik V-ის დამტკიცების პროცესის შეჩერების შესახებ. მიზეზი გახდა დარღვევები ერთ-ერთ ქარხანაში, სადაც ვაქცინას უშვებენ. გუშინ WHO-მ განაახლა სასწრაფო გამოყენებისთვის რუსული ვაქცინის დამტკიცების პროცესი.
როგორც ჯანდაცვის მსოფლიო ორგანიზაციის წარმომადგენელმა ბრუს ეილვარდმა უთხრა BBC-ის, სრულიად შესაძლებელია, რომ COVID-19-ის პანდემია 2022 წლის მნიშვნელოვანი ნაწილის განმავლობაში გაგრძელდეს ღარიბ ქვეყნებში ვაქცინების დეფიციტის გამო. მისი სიტყვებით, მდიდარი ქვეყნები არ ასრულებენ ნაკისრ ვალდებულებებს ყველაზე ღატაკი ქვეყნებისთვის ვაქცინების მიწოდების პროგრამის ფარგლებში.
radiotavisupleba.ge