ყველაზე ცოტა რაც უკრაინას ეკონომიკური აღდგენისთვის დასჭირდება 600 მლრდ აშშ დოლარია, ზოგი დათვლით უკვე 1 ტრლნ. ომის პარალელურად ნგრევა და ზარალის მოცულობაც იზრდება. ძირითადი ტრანშები ომის დასრულების შემდეგ გადაირიცხება. გარვეული მონახაზები კი უკვე არსებობს. ევროკომისიის პრეზიდენტმა ურსულა ვონ დენ ლაიენმა განაცხადა, რომ ბრიუსელი კიევს დამატებით 9 მლრდ ევროს გამოუყოფს. ინფრომაციას ამის შესახებ Reuters ავრცელებს.
დახმარების ყველაზე დიდ წყაროდ რუსეთისთვის გაყინული $300 მლრდ-ის რეზერვები განიხილება. ევროკავშირის გარდა უკრაინას დახმარებას პერსონალურად G7-ის წევრი ქვეყნებიც ჰპირდებიან. მსხვილ დონაციას მსოფლიო ბანკი, სავალუტო ფონდი და სხვა საერთაშორისო ფინანსური ინსტიტუტებიც გეგმავენ.
ომის დაწყებიდან 80 დღეში ევროკავშირმა უკრაინას €4.1 მლრდ-ის დახმარება გაუწია. უკვე გადაცემული დახმარებაც და უახლოეს პერიოდში გადასარიცხი ტრანშებიც ძირითადად ჰუმანიტარულ ფუნქციასა და სოციალური სერვისების გაწევისთვისაა მიმართული. ხელახალი შენებისთვის არც დროა, არც ადამიანური რესურსი.
დასავლეთში ახალი მარშალის გეგმაზე სულ უფრო ბევრი ადამიანი საუბრობს. 1947 წელს შეერთებულმა შტატებმა ევროპას $13 მლრდ გამოუყო, რაც ამჟამინდელი კურსით $168 მლრდ-ს შეადგენს.
მარშალის გეგმამ ევროპის ქვეყნების აღდგენა მნიშვნელოვნად დააჩქარა, მას მეორე დატვირთვაც ჰქონდა, არსებობდა საფრთხე, რომ სიღარიბის გამო მოსახლეობაში კომუნისტური იდეები გახდებოდა პოპულარული. მასშტაბური ფინანსური დახმარების შედეგად ეს საფრთხეც აღმოიფხვრა.
უკრაინა ომამდეც ღარიბი სახელმწიფო იყო. მსოფლიო ბანკის პროგნოზით მიმდინარე წელს მისი ეკონომიკა დაახლოებით 45%-ით შემცირდება, იმდენივეთი რამდენითაც საქართველოს ეკონომიკა შემცირდა 1992 წელს. სწრაფი და მასშტაბური ეკონომიკური დახმარების გარეშე უკრაინისთვის ხელახალი ინტერვენციის რისკის საფრთხე იზრდება. სიღარიბის ზრდა გარდაუვალი იქნება და თითქმის გარდაუვალი კრიმინალის ზრდაც.
1945 წლის შემდეგ ევროპაში ყველაზე დიდი ომი 2022 წლის 24 თებერვალს რუსეთის უკრაინაში შეჭრით დაიწყო. ბლიც-კრიგი ჩავარდა. მოსკოვმა კიევი ვერც 72 საათში აიღო და ვერც 72 დღეში. რუსეთს ხარკივიდან უკან დახევაც მოუწია. კიევი არ დაცემულა, მაგრამ ომი გრძელდება, სრული დეოკუპაციისთვის კი დამატებითი შეიარაღება და დროა საჭირო. 9 მაისს ხელმოწერილი ისტორიული ლენდ-ლიზი 2-ის პროგრამა სავარაუდოდ ივნისიდან ამოქმედდება.