რესტორნებისთვის ე. წ „დელივერის სერვისის“ დაშვების გადაწყვეტილება ხარვეზებს შეიცავს, - განუცხადა ბიზნესპარტნიორს საქართველოს რესტორატორთა ასოციაციის თავმჯდომარე კოტე გაბრიჩიძემ. მისი განმატებით, პრობლემა ისაა, რომ თუ რესტორანი სამზარეულოს ამუშავებს, ამ შემთხვევაში მომსახურე პერსონალი დილის 05:00 საათამდე უნდა გააჩეროს.

„ხალხი რომ სახლში წაიყვანო, ამის უფლებას არ გაძლევენ, საშვებსაც არ გასცემენ. ყველა შემთხვევაში უნდა დატოვო დილის 05:00 საათამდე, რაც ბევრისთვის გადაუწყვეტელი პრობლემაა. ვიღაც შეძლებს ასე მუშაობას, თუმცა, უმრავლესობისთვის ეს ვერ იმუშავებს. დამატებითი პირობაა ისეთი ჩადებული, რაც ამ სიტუაციას ართულებს. „დელივერის სერვისის“ მუშაობა დაშვებული იყო აქამდეც, მეორე თუ არ გადაადგილდები და ხარ ერთ ადგილზე, არ არღევ კომენდანტის საათს. არაფერი შეცვლილი არ არის, კაფეში ვიღაც დარჩება და სამზარეულოში იმუშავებს. უბრალოდ, 05:00 საათამდე დამწყვდეულია რომ კანონი არ დაარღვიოს “-აცხადებს კოტე გაბრიჩიძე.

მისი განცხადებით, სექტორი მუშაობს მთავრობასთან, რომ მოხდეს მათთვის სწორი ინფორმაციის მიწოდება და ქმედებაც შესაბამისად მათი მხრიდან ადეკვატური იყოს. „მთავრობამ ხომ არ იცის ეს ნიუანსები, ამიტომ უნდა მივაწოდოთ ინფორმაცია,“ - აცხადებს გაბრიჩიძე.

მისივე განცხადებით, დღევანდელი მოცემულობით, უპრობლემოდ ხდება იმ რესტორნების კურიერებისთვის საშვების დაშვება, რომლებსაც „დელივერი სერვისი“ აქვს.

შეგახსენებთ, მთავრობის გადაწყვეტილებით, 22:00 საათიდან, 07:00 საათამდე რესტორნები, კაფეები და ბარები დახურულია. შეზღუდვა არ ეხება მათ მიერ მიტანის მომსახურეობას, ე.წ. „დელივერი სერვისს“.

„იზოლაციისა და კარანტინის წესების დამტკიცების შესახებ“ მთავრობის 2020 წლის 23 მაისის №322 დადგენილებაში ცვლილების შეტანის თაობაზე შესაბამის დადგენილებას პრემიერ-მინისტრმა გიორგი გახარიამ მოაწერა ხელი და საკანონმდებლო მაცნეში უკვე გამოქვეყნდა.

business-partner.ge