8 ივნისს გაუქმებულ შეზღუდვებს საქართველოს მოქალაქეებისთვის ახალი რეალობის დადგომა მოჰყვა. გაძვირდა საქალაქთაშორისო ტრანსპორტის მგზავრობის საფასური თითქმის ყველა მარშრუტზე.მძღოლები აცხადებენ, რომ დიზელის ფასის დაკლების მიუხედავად, მათთვის გადასახდელი ფასი მაინც მაღალია და იქ, სადაც ფასი შედარებით ნაკლებია, საწვავი არ ვარგა.

მგზავრობის მსურველებს უტარდებათ თერმოსქრინინგი და ტრანსპორტში პირბადის გარეშე არ დაიშვებიან. კონტროლიორს, რომელიც მოქალაქეებს თერმოსქრინინგს უტარებს, უფლება აქვს, 37 გრადუსის დაფისირების შემთხვევაში მგზავრი გააჩეროს, ორი წუთის შემდეგ გადაამოწმოს და იგივე ტემპერატურის დაფიქსირების შემთხვევაში ტრანსპორტში აღარ აუშვას.

მძიმე შეზღუდვები დაწესდა სარესტორნო ბიზნესისთვისაც. ბარებსა და რესტორნებს მოეთხოვებათ დეზობარიერების, დეზინფექციისა და სოციალური დისტანციის დაცვა.

პირველ რიგში სტუმრები გადიან თერმოსქრინინგს. თერმოსქრინინგის აღრიცხვაც ხდება, სტუმრებს აღვრიცხავთ და ვინიშნავთ ტემპერატურას. შემდეგ ვუტარებთ ხელებზე დეზინფექციას, ასევე ვატარებთ მაგიდების დეზინფექციას. ვიცავთ ორმეტრიან ბარიერს მაგიდებს შორის, - ამბობს ერთ-ერთი რესტორნის მენეჯერი ლიზა კოტრიკაძე.

რესტორნების წარმომადგენლები ადასტურებენ, რომ მომხმარებლებს პირბადე აუცილებლად უნდა ეკეთოთ და პირბადეს მოიხსნიან მხოლოდ საკვების მირთმევის დროს.

„მთავარი არხი“