„რესტორანი სრული დატვირთვით მხოლოდ მაშინ იმუშავებს,როდესაც საზღვრები გაიხსნება და მასშტაბური ღონისძიებების ჩატარების შესაძლებლობა გვექნება“,-ამის შესახებ „კომერსანტს“  ერთ-ერთი ცნობილი ბრენდის „G.G Group“-ის რესტორნების „MARANI HALL“ მცხეთისა და „MARANI RESTAURANT & BAR“- ის დირექტორმა მალხაზ ნუცუბიძემ განუცხადა.  მისი თქმით, რესტორნების ქსელი ახლა მუშაობენ იმისთვის რომ გადარჩნენ, თუმცა ნუცუბიძეს იმედი აქვს, რომ უახლოეს მომავალში ყველაფერი დალაგდება. პოსტპანდემიურ პერიოდში ტურიზმის გადარჩენის ერთადერთი გზა შიდა ტურიზმია, თუმცა რესტორნის დირექტორი აცხადებს, რომ შიდა ტურიზმით რესტორანი 60 პროცენტით დაიტვირთება:

„თბილისშიც და მცხეთაშიც მუშაობა განვაახლეთ, ვიცავთ ყველა არსებულ რეგულაციას. მცხეთის „მარანში“ უმეტესად დღესასწაულები ტარდებოდა, თუმცა არსებულ მდგომარეობას მოვერგეთ და მცირე ღონისძიებები დავგეგმეთ, ვიწვევთ მომღერლებს და მსახიობებს , ასევე აქტიური მარკეტინგული კამპანია დავიწყეთ სოციალურ ქსელში.  თბილისში ყველაფერი ნორმალურად მიმდინარეობს, თუმცა, სრულად მუშაობისთვის ტურისტი ჩვენთვის აუცილებელია, რადგან წილობრივად ჩვენს სტუმრებში ტურისტებს საშუალოდ 40 პროცენტი ეკავა. რა თქმა უნდა სრული დატვირთვა არ გვაქვს, ახლა ბიზნესის შენარჩუნებაზე ვართ ორიენტირებულები. აღსანიშნავია ისიც, რომ შიდა ტურიზმით რესტორანი 60 პროცენტით დაიტვირთება, რადგან მოსახლეობა უმეტესად რეგიონებში გადის“, - განმარტავს მალხაზ ნუცუბიძე.

კიდევ ერთი საკითხი რომელზეც „G.G Group“-ის დირექტორი „კომერსანტთან“ საუბარში ამახვილებს ყურადღებას გაზრდილი ხარჯებია, რომელიც წესით მენიუზე უნდა ასახულიყო, თუმცა მალხაზ ნუცუბიძე აცხადებს, რომ მარანის რესტორნების ქსელში მენიუს ფასები არ შეცვლილა.

„ჩვენ დავტოვეთ ის თანხები, რომელიც პანდემიის გავრცელებამდე იყო , რადგან ვთვლით რომ ბიზნესზე გაზრდილი ფასები უარყოფითად აისახება, შემოსავლები მომხმარებლებსაც შეუმცირდათ და მგონია, რომ გაზრდილი თანხის გადახდა გაუჭირდებათ. ზარალს რაც შეეხება, ჩვენ ზარალი არ გვაქვს, რადგან პროდუქციას ყოველდღე ვყიდულობდით, ჩვენ პროდუქტი არ გვქონდა შენახული, საწყობში პროდუქცია თვეობით არ გვაქვს, თუ რამე გვქონდა ჩემს თანამშრომლებს დავურიგე და მცირე დახმარება გავუწიე ამით. რაც შეეხება იჯარას, პირველ რიგში ადამიანი უნდა იყო, რომ შექმნილი მდგომარეობა გაითვალისწინო, ხელშეკრულებაშიც წერია ფორსმაჟორი, ყველაფერი ისე დაანგარიშდა როგორც საჭიროა და მადლობა ჩვენს მოიჯარეებს, რომ ყველანაირად ხელი შეგვიწყვეს, პანდემიის პერიოდში არანაირ იჯარაზე არ იყო საუბარი“, - აცხადებს მალხაზ ნუცუბიძე.

ბაჩო ადამია