რესპუბლიკური საავადმყოფოს საკარანტინო ზონაში მოთავსებულ 13 პაციენტს, დღის განმავლობაში, ინფექციური საავადმყოფოს სამედიცინო დირექტორი, მარინა ეზუგბაია მოინახულებს და მათ მდგომარეობას ადგილზე შეამოწმებს.
ამ პაციენტებს მანამდე ინფექციურ საავადმყოფოში დაკვირვების ქვეშ იმყოფებოდნენ. რადგან მათი მდგომარეობა ყველაზე მსუბუქი იყო, ისინი რესპუბლიკურ საავადმყოფოში გადაიყვანეს.
რესპუბლიკურ საავადმყოფოში საკარანტინე ზომები სრულად არის მიღებული. გადაკეტილია პერიმეტრი, ტერიტორიას დაცვის პილიცია და საპატრულო პოლიციის რამდენიმე ეკიპაჟი იცავს.
გუშინ საღამოს, რესპუბლიკურ საავადმყოფოში 13 პაციენტი მოათავსეს, რომლებსაც კორონავირუსისთვის დამახასიათებელი მკვეთრად გამოხატული სიმპტომები არ აღენიშნებათ, თუმცა ისინი საკარანტინო ზონაში არიან განთავსებული.
საქართველოში კორონავირუსის პირველი შემთხვევა 2020 წლის 26 თებერვალს დადასტურდა. ჯანდაცვის მინისტრის, ეკატერინე ტიკარაძის თქმით, დაავადებული საქართველოს მოქალაქეა, რომელიც 26 თებერვალს აზერბაიჯანის გავლით ირანიდან შემოვიდა. საუბარია 50 წლის კაცზე. პაციენტი ინფექციურ საავადმყოფოშია გადაყვანილი და მის სიცოცხლეს საფრთხე არ ემუქრება. კორონავირუსის მეორე შემთხვევა საქართველოში 2020 წლის 28 თებერვალს 28 თებერვალს, მესამე კი 29 თებერვალს დადასტურდა.
ჩინეთში გარდაცვლილთა რაოდენობამ 2 870-ს მიაღწია, ინფიცირებულთა რიცხვი კი 79 824-ს შეადგენს. მსოფლიო მასშტაბით, ვირუსი უკვე 50-ზე მეტ ქვეყანაშია გავრცელებული, სადაც გარდაცვლილთა რაოდენობამ 2970-ს გადააჭარბა. 86 992 ინფიცირებულიდან გამოჯანმრთელებული კი 42 334-ია.
26 თებერვალს ჯანმომ განაცხადა, რომ კორონავირუსის პანდემიად გამოცხადების საფუძველი ჯერ არ არსებობს.
30 იანვარს ჯანდაცვის მსოფლიო ორგანიზაციამ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.
21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა. ჩინეთში საქართველოს საელჩოში კი ცხელი ხაზი მოქმედებს.
მართალია თუ არა, რომ კორონავირუსმა უხანის სამეცნიერო ლაბორატორიიდან გაჟონა? ამ ბმულზე ნახეთ.
Imedinews.ge