რესპუბლიკური საავადმყოფოს დირექტორის, ლევან გობროძის განცხადებით, გუშინ ღამით კლინიკაში დაკვირვების მიზნით, 13 პაციენტი შეიყვანეს.

ლევან გობროძის თქმით, მათ კორონავირუსისთვის დამახასიათებელი მკვეთრად გამოხატული სიმპტომები არ აღენიშნებათ.

ლევან გობროძის განმარტებით, 13-დან მხოლოდ ოთხს დაუფიქსირდა დაბალი ტემპერატურა და ყველა მათგანის მდგომარეობა ამ დროისთვის სტაბილურია.

„გუშინ ღამე კლინიკაში შემოყვანილი იქნა 13 პაციენტი, რომლებსაც არ აღენიშნებათ კორონავირუსისთვის დამახასიათებელი მკვეთრად გამოხატული სიმპტომები. ეს პაციენტები კლინიკაში გადმოყვანილნი არიან დაკვირვების მიზნით, მათგან უმეტესობას არც ტემპერატურა არც სხვა რამე სიმპტომი არ აღენიშნება, მაგრამ კარანტინის წესები მოითხოვს იმას, რომ პაციენტები იყვნენ მაინც იზოლირებულები და დაკვირვების ქვეშ. ამიტომაც ეს პაციენტები იქნენ ჩვენს კლინიკაში შემოყვანილები. ღამის განმავლობაში მათი მდგომარეობა იყო სტაბილური, მხოლოდ 13-დან ოთხს აღენიშნა ტემპერატურა 37 და 37,2- ის ფარგლებში, სხვა კორონავისრუსისთვის დამახასიათებელი გამოხატული სიმპტომები მათ არ აქვთ“ ,- განაცხადა რესპუბლიკური საავადმყოფოს დირექტორმა.

ლევან გობროძე ამბობს, რომ დღეს გადაწყდება, რამდენი პაციენტი დატოვებს რესპუბლიკურ საავადმყოფოს.

„დღეს თითოეულ მათგანს ჩაუტარდება ინფექციონისტის კონსულტაცია, ქალბატონი მარინა ეზუგბაია მოვა ჩვენთან და გადავწყვეტ, რამდენს გავუშვებთ და რამდენს დავტოვებთ. ეს პაციენტები რამდენიმე დღე იმყოფებოდნენ ინფექციურ საავადმყოფოში დაკვირვების ქვეშ. უბრალოდ ვინაიდან იქ მოიმატა დასაკვირვებელ პაციენტთა რაოდენობამ, ყველაზე მსუბუქი პაციენტები დაკვირვების მიზნით გადმოყავანილი იქნენ ჩვენს კლინიკაში. საკარანტინო ზომები კლინიკაში მიღებულია. თქვენ ხედავთ, რომ პერიმეტრი ჩაკეტილია. საკარანტინო ზონები გამოყოფილია და მთლიანად იზოლირებულია ერთმანეთისაგან, რასაც მოითხოვს კარანტინის ზომები“ ,- განაცხადა ლევან გობროძემ.

კითხვაზე, რამდენად მიზანშეწონილია ქალაქის ცენტრში საკარანტინო ზონა, მან უპასუხა, რომ საკარანტინო ზონის მოწყობასთან დაკავშირებით რისკები არ არსებობს.

„თუ გავითვალისწინებთ, რა მექანიზმით ვრცელდება კორონავირუსი, ეს არის წვეთოვანი გზა, საკმარისია ერთ მეტრზე მეტი დისტანცია ადამიანთან და უკვე გადაცემა არ ხდება. ქალაქ გარეთ ამ ხალხის იზოლირების საჭიროება არ არის“ ,- განაცხადა ლევან გობროძემ.

1tv.ge