ტელეგრამის არხი Respublica აქვეყნებს გერმანული კომპანიის FVT–Group & Partner-ის წერილს (დსთ-ში წარმომადგენლობის სახელწოდებაა სააქციო საზოგადოება ХК «Партнер+») აფხაზეთის დე ფაქტო რესპუბლიკის ე.წ. პრემიერ-მინისტრის ალექსანდრ ანქვაბისადმი. დოკუმენტის თანახმად, კომპანია აფხაზეთში 6 მლრდ ევროს ინვერსტიციას სთავაზობს ქალაქური ტიპის დასახლების ან 10-12 ათას კაციანი „მცირე საკურორტო ქალაქის“ მშენებლობისთვის.

ამასთან კომპანიაში აცხადებენ, რომ, ეს „ჰუმანიტარული პროექტია“ და თანხები „საქველმოქმედო სახსრების ფარგლეში“ გამოიყოფა.

ინვერსტორი მშენებლობისთვის 5 კვადრატული კილომეტრის ფართობის გამოყოფას ითხოვს (500 ჰა) ამასთან წარადგენს მიზნების შესახებ დეკლარაციას, რომლითაც მოითხოვს 6 მლრდ ევროს ოდენობის სახელმწიფო გარანტიას ხელისუფლების შევცვლის და სხვა შემთხვევებში საინვესტიციო კრახის თავიდან ასაცილებლად.

„პროექტით გათვალისწინებულია, სკოლების, საბავშვო ბაღების, 100-ადგილიანი კლინიკის, ადმინისტრაციული შენობების, საგანგებო სიტუაციების სამსახურის, პოლიციის, სახანძრო და სხვა შენობების მშენებლობა, დასრულებულ პროექტს აფხაზეთის რესპუბლიკის ადმინისტრაციულ ორგანოებს უსასყიდლოდ გადასცემენ“,- ნათქვამია წერილში.

Respublica-ს თანახმად, გერმანულ კომპანიას დე ფაქტო რესპუბლიკის ე.წ. პრემიერ-მინისტრის ნაცვლად „პრეზიდენტმა“ ასლან ბჟანიამ უპასუხა.

„გავეციანით შემოთავაზებულ ჰუმანიტარულ პროექტს „საკურორტო ქალაქისა და სამედიცინო ცენტრის მშენებლობის“ შესახებ, აფხაზეთის რესპუბლიკის ხელმძღვანელობა გამოთქვამს თანამშრომლობისთვის მზადყოფნას და სრული ნდობით იძლევა დაგეგმილი მიზნებისთვის მიწის ნაკვეთის უზრუნველყოფის გარანტიას, კომუნიკაციების მშენებლობისა და კავშირგაბმულობის ნებართვების საჭირო პაკეტით: წყალმომარაგება, ელექტროენერგია და ა.შ.“, - ნათქვამია საპასუხო წერილში, რომელიც ბჟანიამ გაუგზავნა გერმანული კომპანიის წარმომადგენელს მიმდინარე წლის 13 მაისს.

წყარო: www.radiotavisupleba.ge