„თუ მთავრობა სილამაზის სალონების მსგავსად გარკვეულ რეგულაციებს დაგვიწესებს, რომლის ფარგლებშიც შეგვეზღუდება საქმიანობა, მუშაობაში ხელი შეგვეშლება და არ ღირს. მაგალითად, თუ დააწესებენ იმას, რომ აკრძალავენ აუზზე ერთდროულად 50 ადამიანზე მეტის შემოსვლას,ობიექტის გახსნას აზრი არ აქვს“,- ამის შესახებ „კომერსანტს“ ოლიმპიური აუზის მენეჯერმა მარიამ მაჭარაძემ განუცხადა.
როგორც ცნობილია, პანდემიის გამო საცურაო აუზებს წლის ყველაზე აქტიურ, გაზაფხულის სეზონზე შემოსავლების მიღების ყველა საშუალება შეუწყდათ. ობიექტები მეექვსე ეტაპს და რეგულაციებს ელოდებიან, რის მიხედვითაც გაირკვევა არის თუ არა კომპანიებისთვის რეგულაცია მისაღები და გააგრძელებენ თუ არა საქმიანობას.
„აუზის გახსნას, მენეჯმენტი მას შემდეგ გადაწყვეტს, როდესაც რეგულაცია იქნება ცნობილი. ჯერ უცნობია რა ფორმით შევძლებთ ფუნქციონირებას. ჩვენი აუზი დღეში 2000 ადამიანს, ერთ ჯერზე კი 500 სტუმარს მასპინძლობდა. თუ რეგულაციის მიხედვით ერთ ჯერზე მათი რაოდენობა 50 კაცამდე შემცირდა აზრი არ აქვს აუზის გახსნას, რადგან ხარჯი საკმაოდ მაღალია და არ უღირს კომპანიას ასეთ ზარალზე წასვლა. თუ რეგულაციამ ერთდროულად 50-ზე მეტი ადამიანის შემოყვანის უფლება მოგვცა, გვაქვს გეგმა,აბონიმენტების გაყიდვები სრულიად ონლაინ რეჟიმზე გადავა და აუზზე დრო გადანაწილებული იქნება. მაგალითად, მხოლოდ 3 საათი გაჩერდება შემომსვლი, რომ ნაკადის ცირკულაცია მოხდეს და შედარებით მეტმა მომხმარებელმა შეძლოს აუზით სარგებლობა “,-აღნიშნა მაჭარაძემ.
ოლიმპიური აუზის მენეჯერი „კომერსანტთან“ საუბრისას იმ ზარალზეც საუბრობს, რომელიც ამ დრომდე კომპანიას მიადგა. მაჭარაძის თქმით, რთული მდგომარეობის მიუხედავად კომპანიამ თანამშრომლების შენარჩუნება სრულად შეძლო. რაც შეეხება სამომავლო გეგმებს, საუბარი უჭირს და აცხადებს, რომ კომპანია მხოლოდ რეგულაციის მოლოდინშია და ქვეყანაში მდგომარეობის დასტაბილურებას ელოდება.
„კომპანიას აქვს ძალიან ბევრი ობიექტი, მხოლოდ აუზით არ შემოვიფარგლებით, გვაქვს ტანვარჯიშის არენა, ფრენბურთის მოედანი და სხვა სპორტული ობიექტები. დღეს ყველა დახურულია და ჩვენი შემოსავლის ყველა წყარო გაჩერებულია.ამ ეტაპზე ზარალის ზუსტი ოდენობა არ ვიცით, თუმცა წლის შეჯამების შემდეგ საკმაოდ დიდ რიცხვზე იქნება საუბარი. მდგომარეობის სირთულის მიუხედავად შევძელით თანამშრომლების სრულად შენარჩუნება. სეზონური თანამშრომლები კი ჯერ არ აგვიყვანია, რადგან არ ვიცით სამომავლოდ რა გადაწყვეტილების მიღება მოგვიწევს, დავბრუნდებით თუ არა ზაფხულის სეზონზე ბაზარზე“,-აღნიშნა მარიამ მაჭარაძემ.
ნათია ლომიძე