15 ივნისიდან როგორც ყველა რეგიონი ასევე სურამიც მზადაა დამსვენებლებს უმასპინძლოს. რეგულაციის ყველა წესს იცავენ საოჯახო ტიპის სასტუმროებიც, სადაც დამსვენებელთა უდიდესი ნაწილი ბავშვები არიან. რეგიონში მიმდინარეობს, როგორც ინფრასტრუქტურული, ასევე წყალმომარაგებასთან დაკავშირებული პრობლემური საკითხების მოგვარება.
„სურამი დამსვენებლებისთვის ყოველთვის ხელმისაწვდომი იყო და ახლაც ასე დარჩება,“-ამ სიტყვებით ეხმაურება ხაშურის მუნიციპალიტეტის მერი გიორგი გურასპაშვილი რეგიონში ტურისტული სეზონის მოახლოებას.
„მას შემდეგ რაც შესუსტდა აკრძალვები რეგიონი ელოდება ტურისტული სეზონის გააქტიურებას. მუნიციპალიტეტი ინფრასტრუქტურული კუთხით ყველაფერს აკეთებს, რომ სურამში განვითარდეს წყალმომარაგება, სპორტული მოედნები და საგზაო ინფრასტრუქტურა. ბევრი რაღაცის გაკეთება შეიძლება სამომავლოდ, მაგრამ ახალ უპირველესი გზის მოწესრიგებაა, რომ ადგილობრივებს და უცხოელ ვიზიტორებს არ შეექმნათ გადაადგილების პრობლემა. სხვა დანარჩენი ხალხის აქტიურობასა და სურვილზეა დამოკიდებული, თუ მოინდომებენ ჩვენს რეგიონში დასვენებას ჩვენ მზად ვართ. ფასებს რაც შეეხება სურამი დამსვენებლებისთვის ყოველთვის ხელმისაწვდომი იყო და ახლაც ასე დარჩება“,- განაცხადა გიორგი გურასპაშვილმა.
„კომერსანტთან“ საუბრისას საოჯახო ტიპის სასტუმროს მეპატრონეები აღნიშნავენ, რომ დისტანციის დაცვის გამო შესაძლოა მათ სივრცეში ვიზიტორების რაოდენობა განახევრდეს. „ ის სტანდარტული რეგულაციები რომელიც ჯანდაცვის სამინისტრომ დაგვიწესა გათვალისწინებული გვაქვს.დისტანციიდან გამომდინარე არამგონია სასტუმრო სრულად დაიტვირთოს, თუმცა ეს არის პირველი წელი. არც ველოდები, რომ რამე განსაკუთრებული სიახლე გვექნება. უბრალოდ დაპაუზებული სექტორი და ტურიზმი ამუშავდება. როგორ და რა მოგებით ეს ყველასთვის უცნობია,“-აცხადებს სურამში მდებარე საოჯახო სასტუმროს მეპატრონე.
15 ივნისისთვის ემზადება მარიამ წიქარიშვილი, რომელიც საოჯახო სასტუმროს ათი ბოლო წელია ამუშავებს. წიქარიშვილის თქმით, მათი სასტუმროში ვიზიტორების რაოდენობა ყოველწლიურად იზრდება,თუმცა წლევანდელი წელი განსხვავებულია და არ იცის, განახევრდება თუ არა ვიზიტორების რაოდენობა.
„ყველა რეგულაციას ვითვალისწინებთ რაც ჯანდაცვის სამინისტროს მიერაა გაცემული. ყველა დეტალს დიდ მნიშვნელობას ვანიჭებთ, რადგან ჩვენთან ოჯახები ისვენებენ პატარა ბავშვებით. დაინტერესება დიდია, მაგრამ ივნისის ბოლომდე მინდა დაველოდო სიტუაციის დასტაბილურებას და შემდეგ დავიწყებ სტუმრების მიღებას. მირჩევნია მაქსიმალურად ვუზრუნველყო ჩემი სტუმრების ჯანმრთელობა. ბოლო ათი წელია სასტუმროს ვამუშავებ და ყოველ წელს იზრდებოდა ვიზიტორთა რაოდენობა, წელს უნდა დავაკვირდეთ რა მოხდება, რადგან კორონავირუსის გამო ბევრი რაღაც შეიცვალა ქვეყანაში,“-აღნიშნა სასტუმროს მეპატრონემ.
ნათია ლომიძე
სურამი
