1-ლი დეკემბრიდან რეგიონებში კომერციული სექტორისთვის ბუნებრივი გაზის ტარიფი 21%-ით 1 მ3-ზე 95 თეთრიდან 1.15 ლარამდე იზრდება, პურის მწარმოებელ კომპანიებს ძველი ფასი 86 თეთრი შეუნარჩუნდებათ, გაძვირება არც თბოსადგურებს შეეხებათ.
როგორც კომერსანტს „სოკარ ჯორჯია გაზიდან“ აცნობეს გაძვირების მიზეზი საინვესტიციო ხარჯები და კურსის ცვალებადობა გახდა. კომპანიებს ტარიფის ზრდის შესახებ კანონის თანახმად 1 თვით ადრე ეცნობათ.
რეგიონებამდე 10 თვით ადრე „თბილისი ენერჯიმ“ კომერციული ტარიფი 28%-ით 86 თეთრიდან 1.10 ლარამდე თბილისში გაზარდა. რეგიონების მსგავსად დედაქალაქშიც ძველი ტარიფი მხოლოდ პურის მწარმოებელ კომპანიებს შეუნარჩუნდათ.
ივლისიდან მოყოლებული საქართველოში ორნიშნა ინფლაცია ფიქსირდება, რომლის ერთ-ერთი მიზეზიც საწვავის გაძვირებასთან ერთად კომუნალური ხარჯების გაზრდაც გახდა. ბუნებრივი გაზის გარდა 2020 წლის იანვრიდან კომერციულ სექტორს მთელი ქვეყნის მასშტაბით ელექტროენერგია 55-70 პროცენტით 1 კვტ/სთ-ზე 27.4-32.9 თეთრამდე (გააჩნია ძაბვას) გაიზარდა. წყლის ტარიფი კი 48%-ით ტონაზე 6.5 ლარამდე, რაც საყოფაცხოვრებო ტარიფზე 1200%-ით მეტია.
2020 წელს ტარიფების ზრდა ფიზიკურ პირებსაც შეეხოთ და ელექტროენერგიის საფასური 1 კვტ/სთ-ზე 3.5 თეთრით გაეზარდათ. (თელასის აბონენტებისთვის 0-100 კვტ/სთ-ზე 14.5 თეთრიდან 18 თეთრამდე, 101-300 კვტ/სთ-ს მოხმარებაზე 18.5 თეთრიდან 22 თეთრამდე და 300 კვტ/სთ-ს ზევით 23 თეთრიდან 26.5 თეთრამდე, ტარიფები 0.3 თეთრით ნაკლებია ენერგოპრო ჯორჯიას აბონენტებისთვის). თუმცა მთავრობის გადაწყვეტილებით იმ აბონენტებს, რომლებიც 300 კვტ/სთ-მდე მოიხმარდნენ, ასეთი კი მოსახლეობის 95%-ა, ნამატი ფასი ბიუჯეტიდან დაუსუბსიდირდათ. სუბსიდია ერთწლიანი იყო და თუ რამე არ შეიცვალა 2021 წლის დეკემბერში დასრულდება.
თბილისში ფიზიკური პირებისთვის იანვრიდან წყლის ტარიფი ტონაზე გამრიცხველიანებული აბონენტებისთვის 33 თეთრიდან 50 თეთრამდე გაიზარდა, გაუმრიცხველიანებლებისთვის სულზე 3.89 ლარიდან 4.52 ლარამდე. 1-ლი ივნისიდან დედაქალაქის მოსახლეობისთვის ბუნებრივი გაზიც გაძვირდა ტარიფი 7.8 თეთრით 46.2 თეთრიდან 54 თეთრამდე გაიზარდა. რეგიონებში ტარიფი ისედაც 57 თეთრი იყო და გაძვირება მათ არ შეხებიათ. გაზის მსგავსად რეგიონებში არ წყალი გაძვირებულა, სადაც ფიზიკური პირებისთვის ტარიფი ისედაც ტონაზე 50 თეთრი იყო, კომერციული სექტორისთვის 4.5 ლარი.
საქსტატმა იანვარში მეთოდოლოგია შეცვალა და სუბსიდირებული ფასები გაძვირებად აღარ ჩათვალა. 2022 წლის იანვრიდან თუ სუბსიდია აღარ გაგრძელდა ის უკვე ჩაითვლება ინფლაციაში.
მაშინაც კი თუ ტარიფი მხოლოდ კომერციულ სექტორს ეზრდება, სხვაობას მაინც მომხმარებელი გაძვირებული პროდუქციის შეძენის მომენტში იხდის. რეალურად სუბსიდიაც მომხმარებელს აწვება, რადგან სახელმწიფო ბიუჯეტი გადასახადებით ივსება. სახელმწიფო ვალსაც თავისი საპროცენტო ხარჯის დამატებით მხოლოდ და მხოლოდ მოსახლეობა ფარავს.
გაზი
